لەگەڵ ئەوەی بەهۆی سروشتە جوانەکەی و فێنکی کەشوهەواکەیەوە لە بۆنە و وەرزە جیاوازەکاندا گەشتیارێکی زۆر ڕوو لەناوچەی #هەورامان# دەکەن، بەڵام بە وتەی یەکێک لەو گەشتیارانە گرانیی نرخی شمەک کاڵاکانی بازاڕەکانی هەورامان بێزاری کردوون، دوکاندارێکیش هۆکاری گرانییەکە ڕوون دەکاتەوە.
لە ناوچە جیاجیاکانی هەوراماندا ژمارەیەک دوکان و بازاڕ کراونەتەوە کە تایبەتن بە فرۆشتنی کاڵای کەلەپوری و ئیشی دەستی، بەڵام بەهۆی ئەوەی نرخی بەشێک لەو کەلوپەلە کەلەپوریانە بەرزە گەشتیاران ناتوانن بەدەستیان بخەن.
جوانمێر لەتیف، یەکێک لەو گەشتیارانەی کە لە کەرکووکەوە هاتبووە هەورامان، بە ڕۆژنیوزی ڕاگەیاند:ناوچەی هەورامان بەگشتی شوێنێکی زۆر سەرنجڕاکێش و گەشتیارییە و دەبوو حکومەتی هەرێم و لایەنە پەیوەندیدارەکان زیاتر گرنگییان بەم ناوچە بدایە، هەروەها لەبازاڕەکانی هەورامان بەتایبەت شارەدیی بیارە چەند دوکانێکی کەلەپوری کوردەوارییان تێدایە کە هێندەی تر سیمای هەورامانیان جوانتر کردووە.
ئەو گەشتیارە ئاماژەی بەوەش کرد:ئەوەی جێگەی نیگەرانی و سەرنجی ئێمەیە ئەوەیە کە نرخی کاڵا و شمەکەکان زۆر بەرزە و نرخێکی زۆریان خراوەتە سەر، بەتایبەت شمەک و کەلوپەلە کەلەپورییەکان، چونکە هەندێک کاڵا هەیە ئەگەر لە کەرکووک بە هەزار دینار بێت لێرە بە سێ هەزار دینارە، هەروەها هەست دەکەین کەلوپەلە کەلپورییەکانیش بەهەمان شێوە نرخیان زۆر گرانە و هەندێک کەس هەیە هەر چەندە زۆریش حەزیان لێ دەکات بەڵام ناتوانێت بیانکڕێت.
ئەو گەشتیارە ئەوەشی وت:پێش ئەوەی حکومەت چاودێری ئەو دوکانانە بکات و لێپێچینەوەیان لەگەَڵدا بکات، دەبێت ئەوان بۆخۆیان کارێکی وابکەن بەهەرزانکردنی کاڵاو کەلوپەلەکانیان گەشتیاری زیاتر بۆناوچەکە ڕابکێشن، چونکە ئەگەر بەردەوام بن لەم گرانییە و بەرزی نرخەکانیان، بەدڵنیاییەوە کاریگەری خراپ لەسەر خۆیان و ناوچەکەش جێدەهیڵێت، ژمارەیەکی کەمتر لە گەشتیار ڕوو لەناوچەکە دەکات.
لەبەرامبەردا یەکێک لە خاوەن دوکانە کەلەپوریەکانی بازاڕی شارەدێی بیارە بەناوی سەرهەنگ عوسمان، بۆ ڕۆنیوز ئەوەی خستەڕوو، گەشتیاران مافی خۆیانە نیگەران بن لە بەرزی نرخی هەندێک لە کاڵا و کەلوپەلی کوردەواری و کەلەپوری، بەڵام دەبێت ئەوەش بزانن کە ئێمە دەچین ئەم کاڵایانە لە دیوی ڕۆژهەڵاتی کوردستانەوە دێنین و نرخێکی زیاتر لەسەر ئێمەش دەکەوێت، ئەوە سەرەڕای ئەوەی کە لەهەموو دنیادا ئیشە دەستیان زۆر گرانن و دەستەڵاتی ئێمەی تێدا نییە.
ئاماژەی بەوەش کرد، ڕاستە لە بۆنە و جەژنەکاندا ژمارەیەکی زیاتر لە گەشتیاران ڕومان تێدەکەن، بەڵام هەرگیز ئەوەمان نەقۆستوەتەوە کە نرخەکان بەرز بکەینەوە، بەڵکوو بەپێچەوانەوە نرخی زۆرێک لەکاڵاکانمان دابەزاندووە بۆئەوەی هەرچۆنێک بێت ئەو کاڵایانە بفرۆشین و کاڵای نوێ بێنین، هەر خاوەن دوکانێکیش نرخی بەرزکردبێتەوە بەدڵنیاییەوە زیانی بەخۆی و بازاڕی ئێمەش گەیاندووە.
ئەو خاوەن دوکانە کەلەپورییەی شارەدێی بیارە ئەوەشی وت: ئەگەر بهاتایە ئەو کەرەستە و ئیشە دەستیانە لە ناوخۆی هەرێمدا دروستبکرانایە، ئەوا ئێمەش بەنرخێکی کەمتر دەمانفرۆشت بەگەشتیاران، بەڵام ئێمە دەچین لە پارێزگای هەمەدانی ئێران گۆزە دێنین لە هەورامانی ڕۆژهەڵات بەرگی تێدەگرین تا دەیهێنینەوە بۆ هەورامانی خۆمان 11 هەزار دینار لەسەرمان دەکەوێت، ئێمە دەیفرۆشینەوە بە 13 هەزار دینار.
02-07-2017