سکرتێرە 35

گەیشتمە مام عەوڵاو جەعۆی، مەجالیان نەدام سەلامیان لێبکەم، باوەشیان تێهەرینام و هەرئێکەی هەشت نۆ ماچیان لێکردم، گۆتم : مام عەوڵا، ئەتوو بەخۆت عەمەلیات کرای، ئەو ئەزیەتت لۆ دەخواردو دەهاتی ! گۆتی : ئوستاج ئەوە قسەیە دەیکەی، ئەمە هەیتمان نیتمان ئەتوو، ئەدی ئەتوو وەزیرۆکێ مەنی، کوو نایێم ! گۆتم : مەمنون بژی، جەعۆ جانتایەکەی لێ وەرگرتم و هاویشتیە ناو تڕومبێلی، مام عەوڵا دەرکەی پشتەوەی لۆ کردمەوە سواربم، جەعۆ پێشی لێگرتم و گۆتی : کا گەڵبەکانی من، حووببەکانی من ؟ خۆم لە گێلی داو گۆتم : گەڵب و حووببی چ جەعۆ ؟ گۆتی : بەبەغایە سوودانەکیان، پێم برێ بزانم چت لێکردیە، قاتی لە مەتاری نەتفرۆشتیتەوە بە قازانج، یان لەناو تەیارەی لێت بەرەڵلا بووینەو فڕینە !؟ گۆتم : دە لێگەڕێ باسواری تڕومبێلی بم، ئەوجە بەسەرهاتی بەبەغایەکانت لۆ باس دەکەم ! گۆتی : پیشانم دەو دەڕۆین ! گۆتم : جارێ وەختی نیە بابڕۆین، مام عەوڵا گۆتی : سەی خۆڕی لاکەوە لەپێش ئوستاجی، باسواری تڕومبێلی بی، ئەوجە باس لە سیسارکە کەچەرەکانی توو دەکەین ! جەعۆ سوڕاوەو سواری تڕومبێلی بوو، گۆتیە مام عەوڵای : سیسارکە کەچەر نیە هەی کائینات، بەبەغایە بەبەغا، ئەوجە سوودانیش !؟ مام عەوڵا گۆتی : ماشەڵلا کەری، کەس داوای بەبەغای سوودانی کردیە، ئاخر ئەو بەبەغایانە وەکی قیڕینە، جەعۆ گۆتی : ئەوە بەدەر کەت ئەتوو گونی خۆت و گێزەری لێک ناکەیەوە، خۆ شەرت نیە هەر چشتەک سوودانی بی ڕەش بی، گۆتمە جەعۆی : هەونکە ئەتوو ناتەوێ دوو بەبەغای سوودانیت لەناو دەستی بنێم ؟ جەعۆ گۆتی : با ! گۆتم : دە تەواو، دەنگێ مەکە هەتا تەسلیمت دەکەم..! جەعۆ زەردەخەنەکی هاتێ و دەستی بە چەپرە لێدانێ کردو گۆتی : وەڕ وەڕ وەڕ وەڕ گدۆ..! وەڵلا پیاوی..!
گەیشتینەوە لای مارێ، دەبینم کۆران هەمووی خڕ بوویتەوە، پیرداود بێ ددان لە پێشی هەمووان ڕاوەستابوو، دەمزانی لۆ من نەهاتیە، لۆ چای مۆرینگۆی هاتیە..! جەعۆ تڕومبێلی ڕاگرت و مام عەوڵا هاتە خوارێ و دەرکەی لۆ کردمەوە، هەر هاتمە خوارێ بووە چەپرە لێدان، پیرداود بێ ددان پێشی هەمووان خۆی تێکردم و چار پێنج ماچی لێکردم، لەئاخیر ماچی سەری لەبن گێی نام و گۆتی : هینایتت ؟ گۆتم : خوا کەریمە ! بڕەک گرژیەوەو کشاوە پاش، جەماعەت هەمووی دۆقەیان لەگەر کردم و بەخێراتنەوەیان کردم، تەحسین وەلوەلۆک بەپێشم کەت و گۆتی : ئوستاج فەرموو لۆ مارێمە ! گۆتم : خێر ؟ گۆتی : دەوعەتی منی و وا سفرە ڕاهێخرایە، گۆتم : بابە ئەو ئەزیەتەی ناوێ، ئەمن ماندیمەو پێویستم بە ئیسراحەتیە، گۆتی : هەر نۆ ئەولادم بەبە جەنجەڕی کەون دێی، ئەمن ئەو هەموو مەسرەفەم کردیە، ئەتووش دەرێی نایێم ! جەعۆ سەری لەبن گێی نام و گۆتی : گدۆ بابچین، عەلەشیش بە عەلەشیشی دەرێ بالێک، ئەو گۆشت عەلەشیشەش لە قیسەمە نەدەی..! گۆتم : بابە ئەمری ئیلەڵلا، دێم، بەران با سەرەکی لە مارێ بدەم، گۆتیان : دەباشە، بەران زوو وەرە دەرێ و خۆ نەگرخێنی لە ژۆرێ، گۆتم : باشە بەسەر چاو، ئیدی چوومە ژۆرێ و داکی ئەحمەدی و مندارەکان بەرەو ڕووم هاتن، سەلامم کردو ماچم کردن و لەباوەشێم کردن، چووینە ژۆرێ و دانیشتم، داکی ئەحمەدی گۆتی : ئەمن دەکا ئەو نان حازر، ئێک دەققە مساعەدە ! گۆتم : ناوەڵڵا ئەزیەت مەخۆ، دەعوەتی تەحسین وەلوەلۆکیمە، سووندی خوارد دەبی بێیە ماریمە و شیووم کردیە..! داکی ئەحمەدی توڕەبوو، گۆتی : مەعقول ئەوە تەحسین وەلەوەلە کردی ئەو دەعوەت، وەڵلا ئەمن دەبی زەعلان، گۆتم : یاڵلا ئەتوو نانەکەی هەگرە لۆ سبەینێ، ئاخر ناکرێ نەچم، جەماعەت هەمووی چاوەڕێم دەکەن، باشبوو داکی ئەحمەدی ڕازی بوو، هەستام چوومە دەرێ..
لەماری تەحسین وەلوەلۆکی دانیشتم، پیرداود بێ ددان هاتە تەنیشتمە من، سەری لەبن گێی نام و گۆتی : چ هەیە چ نیە ؟ گۆتم : وەڵلا شتەکی وانیە، دەڕوا، گۆتی : چایەی مۆرینگۆی دەرێم مۆرینگۆ، هینایتت یان نا ؟ مام عەوڵا هاواری لە پیرداودی کردو گۆتی : ئەرێ دە هێوەڕوو پیرەسە، ئەوە چیە سەرت لەبن سەری ئوستاجی نایە پسە پستە ! پیرداود گۆتی : ئەتوو لەوچەی نەکەی، ئەمن و ئوستاج ئیشەکی تایبەتمان هەیە و شمولی توو ناکا، جەعۆ گۆتی : گدۆ خێرت دەگاتێ، ئەگەر ئەو چایەی مۆرینگۆیەت هینایە بیدێ و لەکۆرە خۆتی کەوە، وەڵلا وازت لێناینی، گۆتم : جارێ وەختی هەندی نیە، با نانەکەی بخۆین، ئەوجە حیسابەکی لۆ پیرداود بێ ددانی دەکەین..!

هەندەی نەبرد سفرە ڕازاوە، برنجی ئاکرێ و شلەی بامیەو قەیسی گەمەی لەگەر مەعیددەی پیاوی دەکرد، ئەو شیوە هەرمەکی وەهای لەسەر هەر دەستا دەتگۆ بۆنی میسک و عەنبەرو بوخوریە، یەک فەخفوری پڕ گۆشتی عەلەشیشیان بە تایبەتی لە پێشە من دانا، ئەننەما کابرا وەزیرەو دەبی خواردنی سپێشەل بی، سەوزەو تورشی زەردو سۆر ڕێزکرا، ئەو نانە تیریەی خۆمان ڕازاندرابۆوە بە ڕەشکەی هەر لۆیێ باشبوو لە سلۆری ئاوای کەی، ماستاوی سەر بەکەف دەتگۆ کیژی چاردە ساریەو، چاوچاوانێی لەگەر پیاوی دەکرد، تەرتیبات تەواو بوو و تەحسین وەلوەلۆک گۆتی : جەنابی وەزیر ناوی خوای لێبینەو بەرەکەتی باوێ شیوەکەی، ئەمن هێشتا دەستم لۆ مراکی درێژ نەکردبوو، جەعۆ ڕانەکی ئاواکردو هێسکەکەی بە سافی لە دەوی دەرینا، گۆتمە مام عەوڵای بڕەکت ئاگا لەخۆبی ئەتوو تازە عەمەلیات کرای، گۆتی : وەڵلا وەدەکەم ئوستاج، ناوێرم وەکی جاران ڕاست و چەپ بدەمە بەرێ، بەس چەلاوەکەی دەخۆم، دەستمان بە نان خواردنێ کرد، تەق و هۆڕی مراکی دەنگی دەداوە، شەمسەدین گەندەبای جەرگی عەلەشیشەکەی هاویشتە سەر برنجەکەی من و گۆتی : ئوستاج لرفی کە، هەتا جەعۆ سافی نەکردیە، تەماشای جەعۆم کرد دیتم خۆی مۆن کردتەوە لۆ جەرگەکەی، پارچەکم لێکردەوەو دامێ، وەریگرت و هاویشتە ناو پارچە نانەکی، پڕی ناویشی کەوەر و تەڕە توولە و تەماتە کردو، لوولی داو هەتا قەمپار گرتی لێیدا، ئەوجە گۆتی : دەوجە عیزڕائیل بابێ ڕوعم بکێشی، وەڵلا پیاو ئەگەر مردیش بە تێری بمری، نەک قۆڕەی زگی ڕۆژە ڕێیەک بڕوا..!
نانەکەمان خواردو قاپ و قاچاغ هەرگیرا، هەندی دەمێ سەماوەر داندراو گیزەی سەماوەری کاسی کردبووین، فەوری و سەوری چایەیان تێکردو لەپێشیان داناین، خۆشترین چشت ئەوەیە لە پاش نانی چایەکی ئێک ڕەنگی شیرین بخۆیەوە، لە قوڕگت ڕا سافی دەکا هەتا ناو مەعیددەت..! چەند خۆشە دراوسێی ئەوها بێ فەرق و جیاوازیت هەبی و لە خۆشی و ناخۆشی لەگەرت بن، کورد دەرێ پێشی خانی دراوسێی بکڕە، ئەشەدەن و بیلا ڕاستە، ئەو بنیادەمە درساف و باشانە لەکێ مایەو لەکێ دەست دەکەوی ! خۆزیا هەر وەکی جاران خەرک دری باش و ساف بایەو یەک سفرەو یەک بەڕک بوونایە..!
چایەکی دیشم لەسەر کرد، پیرداود بێ ددان جغارەکی پێچرای لۆ ڕاگرتم و گۆتی : دەوجە بەبای کە، گۆتم : وەڵلا ئەمن جغارەی ناکێشم، بەران ئەو جغارە پێچرایەت لەکێ پەیدا کردیە ؟ گۆتی : ئوستاج ئەمن ئەو پاکەت و جغارە باریکانە کوو دەخۆم، دەرێی مارە زیوەیە، خوا بزانی لەچ و لەکێ دروست کرایە، ئێستاش تووتن و پەڕی دەکڕم و بەخۆم دەیپێچم، دوایی سەری لەبن گێی نام و گۆتی : ماخران درم تەقی هەونکە هینایتت یان نا ؟ سەرم لە بن گێی ناو گۆتم : ئەوی ڕاستی بی.. زەنگی مۆبایلەکەم لێیدا، تەماشام کرد بەڕێوەبەری نووسینگەی سەرۆک وەزیرانی بوو، زانیم ڕاپۆرت بە جوملە گەیشتیتە سەرۆک وەزیرانی، وەرامم داوەو گۆتم : فەرموو ! گۆتی : جەنابی وەزیر باشی ؟ گۆتم : بژی سوپاس، ئەتوو کوی ؟ گۆتی : جەنابی سەرۆک وەزیران داوات دەکاو دەرێ فەوری بگاتە ئێرە ! گۆتم : خێرە ؟ گۆتی : نازانم، بەران گۆتی : با بێ، گۆتم : لە کێیە ؟ گۆتی : لە مێوانخانەی تایبەتی خۆی، گۆتم : زۆر باشە، ئەوە بەڕێ دەکەوم..! دیتم : جەماعەت هەمووی تەماشام دەکەن، مام عەوڵا گۆتی : خێرە ئوستاج، ئەوە کێبوو ؟ گۆتم : جەنابی سەرۆک وەزیرانی بوو، دەرێ وەرە دانیشتنمان هەیە، گۆتیان : ئەوجە بەو شەوەی وەختی دانیشتنیە، گۆتم : برێم چ، گۆتیان دەبی بێی ! لۆیێ ڕوخسەتم بدەن با بڕۆم، شەمسەدین گەندەبای گۆتی : کاکە لێی گەڕێن بابڕوا، بەشکو بڕیارەکی باش لۆ فەقیرو هەژاری بدەن، پیرداود بێ ددان گۆتی : بە عەیاتت ئەو بڕیارەی نابینی، وەڵلا وەبیللا هەمووی دەڕوتێنتەوە !
خواحافیزیم لەجەماعەتی کردو زۆر مەمنونی تەحسین وەلوەلۆکی بووم لۆ ئەو دەعوەتە زەریفەی، ئەویش زۆر دری خۆشبوو کە هەموومان چووبووینە دەعوەتەکەی، سواری تڕومبێلی بووم و مام عەوڵا لە پێشەوە دانیشت و جەعۆش پێی لێنا، لەڕێیێ مام عەوڵا گۆتی : ئەرێ ئوستاج دەبزانە ئیزافیمان لۆ سەرف ناکەی ! گۆتم : ئیزافی چ ؟ گۆتی : ئیزافی ئەوەی بەو شەوەی لەگەرتوو دەردەچین ! جەعۆ گۆتی : وەڵلا هەقی هەیە ختوورەشمان لۆ سەرف کەن، ئاخر خۆ هەونکە تەقەمان لێبکەن کێ دەرێ ئەمە پێشی توو ناکوژرێین، ئێ وەڵلا بشکوژرێین لە تڕی سەی دەچین، لەبەرەتوو کێ باسی مە دەکا، کەس نارێ جەعۆ و عەوڵا سەگتۆپ کران، هەر دەرێن وەزیری ژن و منان دیتۆل (تیرۆر) کرا..!

گۆتم : نانا، ئینشاڵلا هیچتان لێنایێ و خوا هەموو لایەکی دەپارێزی، مام عەوڵا گۆتی : ئێ کورە دە دەستت شلکە هەی مارت خرانەبی، ئەمن مردی ئەنگۆ زندی، ئەگەر لەو وەزیراتیەی دەریان نەکردی، ئەمن عەولارۆک نیمە ! جەعۆ گۆتی : ئەوە مسۆگەرە، کوو دەزانم ئەو تڕومبێلە یابانیە، ئەوهاش دەزانم ئەو زەلامە وەزیرایەتیەکەی تەواو ناکا..! ئەمنیش لۆ ئەوەی بابەتەکەی بگۆڕم، گۆتمە مام عەوڵای : ئەرێ زێخەی برادەرت کووە ؟ گۆتی : ئۆۆۆ ئەفەندی دیارە ئاگات لێنیە ! گۆتم : ناوەڵلا، ئاگام لە چبی ؟ گۆتی : بابە عەیبە، چیدی مەرێ زێخە ! گۆتم : ئەدی برێم چ ؟ گۆتی : برێ ست زولەیخا، چونکە تەرفیعی کردیەو بوویتە مەسوولەکی گەورە لەناو وەزارەتی، وەڵلا گدۆ دەبی مەمنون بی ست زولەیخا سەلامت لێبکا..! گۆتم : ئێ دە تێم بگەینە بوویتە چ ! گۆتی : وەڵلا بوویتە سەرۆکی پیشەوەران..! زۆر مهیم بووە زۆر..! بە دەستە خۆم نەبوو پێکەنینم هات، بەران درم نەهات لەبەر مام عەوڵای بەدەر بێخم، گۆتم : دە مادەم وەیە پێی برێ ؛ با دەعوەتەکمان بکا ! گۆتی : بەچاوان ئێستا تەلەفۆنی لۆ دەکەم، بەران شەرت وەیە وەرام بداتەوە ! گۆتم : ئەوجە لۆ وەرام ناداتەوە ؟ گۆتی : ئایییی، دەزانی ئەتوو زۆر عەنتیکەی ها، ئەدی ئەوە پێت نارێم بوویتە مەسوول، ئەو کوردە بۆرە خۆ ڕەنگ نیە سەرە گوریسەکی بکەوتە بەر دەستی، ئێکسەر خۆی لێ دەگۆڕێ..!
گەیشتینە پێش دەرکەی دەرێی مێوانخانەکەی سەرۆک وەزیرانی، یەک دوو پاسەوان غاریان دا بەرایی تڕومبێلەکەی، جەعۆ ڕایگرت و گۆتی : خۆمانین مەترسێن ! وەزیری عورمەو مورمانمان (حورمە) هینایە ! پاسەوانەکە هات تەماشای کردین، ئەوجە نەینۆکەکی لەبن تڕومبێلی دا، پاشان جوان تەماشا ناو تڕومبێلی کرد، ئەوجە گۆتی : بڕۆن ! جەعۆ گێڕی هاویشتە سەر دی و ڕۆیشتین، دەوری سەت مەترەک ڕۆیشتین و گەیشتینە بازگەکی دی، پاسەوانەکە گۆتی : هەونکە بەڕێتان دەکەم، جیهازی بەدەوی وەناو منگەمنگەکی کرد، هەندەی نەبرد سەیەکیان هینا، پەتکەکی بەملی وەبوو، سەری پەتکەکەی لە دەست جاحێرەکی بوو، سەی لە چار دەوری تڕومبێلی گێڕا، سە یەک دوو فڕەی لێدا، ئەو لەسەر قوونی دانیشت و زمانە بە لیکەکەی دەریناو گۆتی : عوووووو ! کابراش ڕووی لەمە کردو گۆتی : فەرموون تێپەڕن ! گۆتم : ئەرێ ئەوە چیە بابە، کەس نما سەی لەمە بەردەدەن، ئاخر ئەمن وەزیرم، گۆتی : جەنابی وەزیر ئەو سەیە یەک دوو ڕۆژە هاتیەو لێرە تەعین بووە، ئەمریان پێکردینە هەر تڕومبێلەک هات دەبی ئەو سەیە بیپشکنی..! جەعۆ گۆتی : لۆ سەش تەعین دەبی ؟ کابرا گۆتی : ئەدی کوو، وەڵلا مووچەکی باشیش وەردەگری، سێ جەمەش هێسکی دەڕنێنتەوە ! مام عەوڵا گۆتی : دیارە سەیەکی پە پەختە..!
گەیشتینە پێش دەرکەی مێوانخانەیی و هاتمە خوارێ، گۆتمە جەعۆو مام عەوڵای : ئەنگۆ لێرە چاوەڕێ بکەن، گۆتیان : بەسەر چاو ئوستاج، سەلام لە سەرۆک وەزیرانی بکە و پێی برێ بزانە معاشی ئەو سەیەی زیاترە یان ئیمە..! سەرەکم باداو چوومە ژۆرێ، سکرتێری سەرۆک وەزیرانی هاتە پێشوازیم و ئەمنی بردە ژۆرێ، چووینە هۆرەکی گەورە و فەرمووی دانیشتنی لێکردم، گۆتی : هەتا ئەتوو قاوەکی دەخۆیەوە، سەرۆک وەزیرانیش دێ دەتبینی، گۆتم : زۆر باشە، هەندەی نەبرد قاوەکیان لۆ هینام، لێی گەڕام هەتا بڕەک سارد بۆوە، ئەوجە فڕەکم لێدا، وەختەکی سەرۆک وەزیران هات، هەستامەوە، سەلامی کردو چاک و چۆنیمان کردو لە نێزیکی من دانیشت، بەخێراتنەوەی کردم و گۆتی : هیوادارم سوودت لە خولەکەی بینی بی، گۆتم : وەڵلاهی هیچ نەبوو، بەس پارە سەرف کردن بوو، گۆتی : کوو ؟ دەنا برادەرەکانت ڕاپۆرتەکی پازدە خاڵیان لۆ نووسیمەو دەرێن بەڕاستی سوودمەند بووەو داوا دەکەن خولەکی دیش لە ئەوڕوپای بکرێتەوە، گۆتم : وەڵلاهی هەر هیچ نەبوو، بەس گەڕان و سوڕان خواردن و خواردنەوە بوو..! پێکەنی و گۆتی : دەیاڵلا، مهیم پیاسەکی خۆشتان کردو جەوەکتان گۆڕی..!
وەختەکی سکرتێرەکەی هات و گۆتی : گەورەم، وەفدە ڕوسیەکە گەیشتن و چاوەڕێی جەنابت دەکەن، گۆتی : بڕۆ نانیان لۆ دانێن لەگەر مەشڕوباتی، هەونکە ئەمنیش دێم، برێ دە دەققەک چاوەڕێ بکەن، ئەویش گۆتی : بەسەر چاو گەورەم، ئیدی کشاوە پاش و ڕۆیی..! پاشان گۆتیە من : ئەرێ ئەتوو نانت خواردیە ؟ گۆتم : ئەرێوەڵلا، پێشی بێم لە ماری تەحسین وەلوەلۆکی نانم خوارد، گۆتی : ماری کێ ؟ گۆتم : تەحسین وەلوەلۆک، سەرۆک وەزیران لە قریتەی پێکەنینێی داو لەسە پشت کەت، گۆتی : ئەو ناوە زۆر عەنتیکەیە دەزانی ؟ گۆتم : بەرێ دەزانم، بەران پیاوەکی زۆر باش و درسافە..! گۆتی : عەلا کووللین، واز لە تەحسین لەولەۆکی بینە، گۆتم : قوربان وەلوەلۆک ! دیسان پێکەنی و ئەوجارە ڕووی لەمن کردو گۆتی : ئەو بەزمە چیە لە لوبنان دروستت کردیە ؟ گۆتم : وەڵلاهی لەسەرم بدەی ناتانم درۆی بکەم ! قسەی هەق و ڕاستم کردیە ! سەرەکی باداو هەستاوە، چووە کن سندوقەکی گچکە لەسەر مێزەکەی بوو، کردیەوەو جغارەکی ئەستووری سەددامی دەریناو پێی کرد، هاتەوە کنە من و گۆتی : ئەتوو ڕیسەکەی لەمە دەکەیەوە خوری و دری سەرێش دەشکێنی و ناتانم بەرگریت لێبکەم، لە هیکڕا سکرتێرەکەی هات و کۆمەرە وەرەقەکی دا سەرۆک وەزیرانی و گۆتی : گەورەم فەرموو ئەوەش ڕەشنووسی گرێبەستی نەفتی لەگەر ڕوسەکان ! ئەویش وەریگرت و تەماشایەکی کردو گۆتیە من : ئێه، ئێستا بابێینەوە سەر بەزمەکەی لوبنان ! ئەمن چ قسەم نەکردو وەرەقەکم لە گیرفانم دەرهیناو دامێ ! گۆتی : ئەوە چیە ؟ گۆتم : وازنامەی منە لە وەزیراتی..!

سەرۆک وەزیران بەینەکی تەماشای کردم، ئەوجە دەستی درێژ کردو وەرەقەکەی هەرگرت، کردیەوەو تەماشای کرد، خیندیەوەو پاشان لەسەر تەبلەکەی داناوەو تێر تێر پێکەنی ! گۆتم : بەچ پێدەکەنی ؟ گۆتی : خەرک شەڕی لەسەر وەزارەتی و بوون بە وەزیراتی دەکا، هەیە دەچی دەستی هەرچی ئەندامی مەکتەب سیاسی و سەرکردایەتی حیزبەکەی هەیە دەلێستەوەو ماچ دەکا، هەتا ناوی بنووسن لۆ وەزیری یان بەڕێوەبەرەکی گشتی، ئەتووش بەدەستی خۆت وازنامەی پێشکێش دەکەی ! گۆتم : ئەمن وامزانی ئەگەر ببمە وەزیر دەتانم چاکسازی بکەم و خزمەتی خەرکی بکەم، بەران دەبینم ئەو وراتە خنکایە لەناو گەندەڵی و کەس هیچی پێناکرێ، ئەگەر لە تۆقی سەرێ هەتا خوارێ هەمووی نەگۆڕێ، ئەو وەزعە قەت چانابی، گۆتی : باچشتەکت پێبرێم ؛ ئەمە سارەهای سار سەرماو سۆر و گەرماو ماندی بوون و دەربەدەری کووشتن و بڕینمان دیت، ژیانمان هەمووی ئاوارەیی و دەربەدەری بوو، ئەو میللەتەش بەشی زۆری لەمارێ دانیشتبوو، جستانان ئەمە لەچیای لەسەرمان ددانمان قرچەقرچی بوو، لەناو بەفرو بارانی شەومان بەڕێ دەکرد، خەرکیش خۆی لەناو لێفی گەرم پێچابوو، هاوینانیش لەبەر موبەڕڕیدەی دەنووستن، هەونکەش وەزعەک دروست بوو و ئەمە هاتینەوە، ئیدی وەختی ئەوەیە ئەمەش ئیسراحەت بکەین و خۆشی و لەزەتی ببینین، تاقەتی ئەوەمان نیە، هەر کەسەکی نوزەی هات برێین یا ئەڵلا خێر با فریای کەوین، مهیمترین شت ئەوە ئەمن و ئەمانمان دابین کردیە، خەرکیش کوو دەژی کەیفی خۆیتی ! گۆتم : دەنا هەر ئەنگۆ بوون دەتانگۆ : ئەمە لەبەر خاتری ئەو میللەتە ڕەش و ڕووتەی هاتینە دەرێ و شەڕە تفەنگی دەکەین، ئەگەر ئەو وەختی بتانگۆتبا لۆ خۆش گوزەرانی خۆمان هاتینە ئەوە شتەکی دیبوو..! سەرۆک وەزیران هەستاوەو پیاسەکی کرد، چووە لای پەنجەرە گەورەکەی هۆرەکەی و ڕاوەستاو تەماشا دەرێی دەکرد، پاشان گازی منی کردو گۆتی : تەماشاکە، لەوبەری ئەو جادە دوورەی چ دەبینی ؟ تەماشام کرد، گۆتم : وەڵلا ئەوە کۆمەرە دوکانەکە خەرکی فەقیرو هەژار کاسبی تێدا دەکاو مارو منداری پێ بەخێو دەکا، گۆتی : دەزانی جێیەکی زۆر ستراتیجیان هەیە، گۆتم : بەرێ وایە، گۆتی : نازانم کوو لەوێ دەریان کەم لەو جێیە باشەی مۆڵەکی زۆر گەورە دروست کەم و بە فەردە پارەم لۆ بینی، یان کۆمەڵگەکی نیشتەجێبوونی لێ دروست کەم و نازناوی ستیەکی پێوەنێم و دەیان ملیۆن دۆلارم پێ ببڕێ ! گۆتم : کوو درت دێ ئەو هەموو خەرکەی دەربەدەرکەی و نانیان ببڕی ! گۆتی : نانیان نابڕم، لەجێیەکی دی ئێک و پارچە عاردیان دەدەمێ، بالۆ خۆیان ئاوەدانی بکەنەوە، چ زۆرە عاردی شارەوانی زۆرە، خۆ پارەی تێناچی، گۆتم : بەڕاستی ئەوە زولمە لەو خەرکەی دەکرێ، خوا قبور ناکا، گۆتی : خەرک لەگەر ئەو وەزعەی ڕاهاتیە و لۆمان دەچتە سەری، تەماشایەکی کردم و گۆتی : دەزانی چیە، هەتا لۆمان بچتە سەری ئەوها دەکەین، ئەوڕۆ پارە و هێز دنیای بەڕێوە دەبا، هەر دەولەت و لایەنەک هێزو پارەی نەبی کەس حسابی لۆ ناکا، ئەمە ئەوڕۆ هەردووکمان هەیەو لۆمان دەچتە سەری..!
ماوەکی باش قسەمان کردو نەگەیشتینە هیچ، گۆتم : دەتوو واژووەکی لەسەر وازنامەکەم بکە، با ئەمن نەجاتم بی ! ئەو هەر ڕووی لە ڕێزە دوکانەکەی بوو، ئاوڕی لەمن داوەو گۆتی : دەتوو واز لەو شتانە بینەو ڕێیەکم لۆ ببینەوە کوو دەست بەسەر ئەو دوکانانە دابگرم، گۆتم : ببورە ئەوە بەمن ناکرێ، گۆتی : ئاسانە ئێستا دەنێرمە دوو وەزیری شارەوانی و چەند وەزیرەکی دی و ڕێیەکم لۆ دەبیننەوە ! گۆتم : هەزار ڕەحمەتت لێبی ئیبن خەلدون ! گۆتی : ئیبن خەلدون کێیە ؟ گۆتم : مێژوو نووسەکی ئیسلامی بوو، پێش سەتان ساری گۆتیتی : لەهەر وراتەکی سیاسیەکان خەریکی بازرگانی بن، هەم حوکمڕانی هەم بازرگانی تێک دەچی و بۆگەنی دەبی، گۆتی : با لۆخۆی وەبرێ، دنیا دنیای بازرگانی و نەفت و دۆلاریە..!
گۆتم : ئەگەر ئیشت بەمن نەمابی حەز دەکەم بڕۆم، گۆتی : لۆ دەڕۆی، چ ئیشت هەیە ؟ گۆتم : ئیشەکی وەهام نیە، بەران ئەتوو وەفدە ڕوسیەکە چاوەڕێت دەکەن، گۆتی : ئەوەندەش وەیە، عەلاکووللین، گەڕاوە لای تەبلەکەی و وازنامەکەی منی هەرگرت و لۆمنی ڕاگرت و گۆتی : جارێ ڕازی نیمە لەسەری، بڕۆوە دەوامی خۆت، گۆتم : داوای لێبوردن دەکەم، ناتوانم بەردەوام بم، تازە پەشیمان نابمەوە..! کە دیتی بە جددیمە، دەستی گرتم و گۆتی : وەرە بابچین لەگەر ئەو وەفدە ڕوسیەی دانیشین و ئەتووش بەچاوی خۆت دنیای پارەو نەفت و بازرگانی و شیرینی نەفتی ببینی، ئەوجە دەبینم کوو ڕای خۆت دەگۆڕی..! ئیدی دەستی گرتم و ئەمنی بردە ژۆرەکەی ئەو دیوی کە وەفدە ڕوسیەکەی لێ دانیشتبوو، وەکی چاویان بەمەکەت، هەموو قیت بوونەوەو بە پیرمانەوە هاتن..!

دۆقەمان لەگەر وەفدەکەی کرد، سەرۆک وەزیران دەستی لۆمن درێژ کردو گۆتی : ئەوە وەزیری کاروباری ژنانە لە حکومەتەکەی من، ڕوسەکان زۆریان پێ سەیربوو، گۆتیان : هەتا ئێستا لە حکومەتیمە وەزارەتەک نیە بەناوی وەزارەتی ژنان، وەڵلا پێمان سەیرە ئەنگۆ هەیتتان، سەرۆک وەزیران گۆتی : لە کۆمەڵگەی مە هێشتا ژن زۆری مایە بگاتە ئاستی ئازادی و کراوەیی ژنانی ئێوە، لۆیێ بە پێویستمان زانی ئەو وەزارەتەمان هەبی ! ڕوسەکان گۆتیان : بەخۆتان باشتر دەزانن، ئەمە بابێینە سەر ئەسلی ئەو مەسەلەی لۆی هاتینە، سەرۆک وەزیران گۆتی : بەخۆتان دەزانن وراتی مە دەورەمەندە بەهەموو سامانەکی سروشتی، هەر لە نەفت و غازی بگرن هەتا دەیان ماددەی دی، حەز دەکەین ئەنگۆ هاوکارمان بن لەدەرهینان و ساغکردنەوەی ئەو ماددانە، بەتایبەتی غازو نەفت، بە نەوعەکی وا لۆمان دەربینن هەردوو لامان سوود مەندبین، سەرۆکی وەفدەکەی گۆتی : ئەمە کۆمپانیای گەورەو زەبەللاحمان هەیە لۆ ئەو ئیشانە، تەئکیدبن ئەو کارە بە پلە یەک خێری لۆنگۆیە، ئەوجە لۆمە، درنیابن لە شیرینی نەفتەکەش قسووریتان لۆ ناکەین سەتان ملیۆن دۆلارتان بەسەر دادەباری، ڕاوێژکاری سەرۆک وەزیرانی لۆ کاروباری نەفتی کە لەگەر وەفدە ڕوسیەکەی دابوو، گۆتی : گرنگترین چشت لەکنەمە ساغکردنەوەو فرۆشتنی ئەو نەفتەیە، ئێکەکی ڕوسی کە سمێرەکی زەردی گەورەی هەبوو، ئەولاو ئەولای سمێری بادابوو، زەردەخەنەکی کردو گۆتی : ئەوە ئاسانترین شتە لەکنە مە، خەمتان نەبی، گۆتم : باشە ئەنگۆ جارێ هەندە کۆمپانیای بنێرن بزانن نەفت وغازەکە لەکێ هەیە، ئەوجە قسەی لێبکەن ! سەرۆکی وەفدەکەی گۆتی : ئەمە سەت سارە دەزانین نەفت و غاز لەکێ هەیەو لە هەموو هاوڵاتیەکی ئەو وڵاتەی زیاتر شارەزای کوون و کەلەبەری وڵاتینگۆینە..!
دەوری سعاتەکی قسە کراو باسی زۆر شتی کرا، کە هاتە سەر گرێبەستەکان و مۆرکردنیان، سەرۆک وەزیران دەستی لەسەر شانی من داناو گۆتی : کا هەتا دەرێ بچین، گۆتم : بەچاوان، سەرۆک وەزیران ڕوخسەتی لە وەفدەکەی وەرگرت و ئەمن و ئەو چووینە دەرێ، لە هۆرەکەی پیاسەکمان کرد و سەرو شەربەتی پرتەقاریمان خواردەوە، گۆتیە من : دیتت دنیای بزنس و پارەو نەفت و شیرینی کوە ؟ گۆتم : بەرێ دیتم، گۆتی : ئەوە ژیان و سیاسەت و حوکمداریە، ئەتوو هەر بڕۆ قسە قۆڕەکانی ئیبن خەلدوونی بخینەوە، ئێستا ئیبن خەلدوون لەو سەردەمەی ژیابا، دەستی ماچ دەکردم هەتا بمکردبا سەر نووسەری سەگە ڕۆژنامەکی، زۆرن ئەوانەی بە قەرەمی شەڕی گەورە دەکەن و بە زمانیش پێراوی سیاسیەکان دەلێسنەوە..! گۆتم : لەگەر ڕێزم لۆ قسەکانت، ئەگەر ئەتوو قسەکانی ئیبن خەلدوونی بەقۆڕ تێبگەیی و درت خۆشبی بەچەند فەریکە نووسەرەکی ماستاوچی، ئەوە ئەمن ئایندەی ئەو وراتەی باش نابینم و ڕۆژەک دادێ دەتەقی، لافاویش کە هات بەری ناگیرێ و هەمووی لوول دەدا..! سەرۆک وەزیران بەینەکی تەماشای کردم و بێدەنگ بوو، گۆتم : هەزاران گەنجی وراتی من زانکۆی تەواو دەکاو بێ ئیش دەسوڕێتەوە، ئەوێ ڕۆژێ چوومە چێشتخانەکی نانم خوارد، گەنجەکی جوان و جاحێر نانی لەپێش دانام و پاشان نانەکەی هەرگرت و مێزەکەی پاک کردەوە، لێم پرسی هەتا چەندت خیندیە ؟ گۆتی : زانکۆم تەواو کردیەو چونکە دامەزراندن نیە، وا ئەو ئیشەی دەکەم..! ئاگرم لەهەناوی بەربوو، نازانم ئەنگۆ لۆ فکرەکی لەو میللەتەی ناکەنەوەو خەمەکی لێناخۆن، جەنابی سەرۆک وەزیران گەنجانی وڵات گێژ ناکرێن بە چەند کەناڵەکی تڕڕووهات و قسە قۆڕەکانی تیکتۆک و فەوزای سۆشیال میدیای، هیچ چشتەک وەکی شۆڕشی برسیەکان نیە..!
سەرۆک وەزیران هیچ قسەی نەکردو بەس تەماشای دەکردم، وەختەک ڕاوێژکاری کاروباری نەفتی هات و سەری لەبن گێی ناو خووندە خووندەکی کرد، ئەویش سەری لەقاند، پاشان تەماشا منی کردو گۆتی : ئەتوو دەتانی بڕۆی، بەران جارێ ڕازی نیمە واز بینی و بڕۆ دەوامی خۆت بکە، گۆتم : ئەتوو لۆیێ ئەمنت هینا دەرێ هەتا نەزانم ئەو گرێبەستە نەفتیانە کووە، وا لەبەر خاتری تووش دەچمەوە وەزارەت، بەران کوو دەزانم خوا بەهەقە، ئەوهاش دەزانم ئاخیری ئەو وەزارەتەی بە جێ دێلم و ئەو تڕە کەرەش سەر ناگری..! خواحافیزیم لێکردو چوومە دەرێ..
گەیشتمە جەعۆو مام عەوڵای، سەلامم لێکردن و گۆتم : یاڵلا بابڕۆین، مام عەوڵای دەرکەی لۆ کردمەوەو گۆتی : فەرموو ئوستاج، سواری تڕومبێلی بووین و بەڕێکەتین، لەڕێیێ مام عەوڵا گۆتی : ئەرێ ماخران، خۆ چایەک قوومە ئاوەکیان نەدامە، ئەوانە چ بەشەرەکن، گۆتم : باژۆن لۆ بازاڕی، با بچین لە مەچکۆی سەرو چایەی بخۆینەوە، جەعۆ ئاوڕەکی داوەو گۆتی : بەنامووسم پیاوی گدۆ، وەی وای مەچکۆ وا هاتین..!
گەیشتینەوە لای بازگەکەی، دیتمان کابرای سەیەکەی لەدەستە، خەمبارەو لە دیار سەیەکەی دانیشتیە، جەعۆ جامی کردەوەو گۆتی : ئەوە لۆ ئەوها بێتاقەتی وەستا ؟ ئەویش گۆتی : وەڵلا ئەو سەیە مانی گرتیەو نانی ناخوا، لێمان غەزریەو لێرە وەرکەتیە، مام عەوڵا گۆتی : پەکوو وەڵلاهی درم ئازاری پێگەیی، کوو دەبی سەی سەرۆک وەزیرانی بغەزری..! کابرا گۆتی : وەڵلا وا دەچم خەبەر دەدەم بزانم چدەرێن، بەشکو چارەکی لێبکەین، جەعۆ گۆتی : ئەو سەیە گۆرە (نێر) یان دێرەیە ؟ کابرا گۆتی : دێرەیە ! مام عەوڵا گۆتی : ئێ دە گۆرەکی لۆ پەیاکەن بابڕەک بیگەوزێنی ڕەعمەت لە بابت..!
مایتی[1]