=KTML_Bold=میوانی ئێلیزێ=KTML_End=
#ئاریان فەرەج#
سەرۆک ماکرۆن جارێکی دیکە لە کۆشکی ئێلیزێ پێشوازی لە سەرۆک #نێچیرڤان بارزانی# کرد کە ئەو بە نێچیرڤانی ئازیز ناوی دێنێت.
دیداری ئەم جارەی هەردوو سەرۆکی دۆست لە دۆخێکدایە ناوچەکە لە نێو شەڕ و مەترسیی تەشەنەکردنی و دابەشبوونی هەمووان بەسەر سەنگەربەندیی لایەنە بەشەڕهاتووەکاندایە. شەڕەکە بە ئەندازەیەک سێبەری بەسەر هەموو پرسەکاندا کێشاوە، مەعلوم نییە ئەو (روانگە چارەسەرییەی ماکرۆن بۆ کۆکردنەوەی عێراق و هاوسێیەکانی) هەیبوو و لەگەڵ سەرۆک نێچیرڤان بارزانی دا چەند ساڵێک بوو دەیانویست شەریک و پشتیوانی لەنێو عاقڵمەندانی عێراق و دەوروبەری دا بۆ ببیننەوە، هێشتا وەک پڕۆژەیەک ماوە و دەستی پێوەدەگیرێ یاخود شەڕ لەگەڵ خۆی پێچایەوە.
لە راستیدا ئەو پڕۆژەیە مابێت یان نا، دواخرابێت یان بە یەکجاری دەستی لێ شۆرابێت، تاکە پرسی هاوبەشی نێچیرڤان – ماکرۆن و فەرەنسا و کوردستان نییە. رایەڵەیەکی نەگۆڕ و جدییتری پەیوەندیی ئەو دوو سەرۆکە (جگە لە متمانە و سەرسامیی شەخسیی سەرۆک ماکرۆن بە دنیابینیی هێور و چارەسەرخوازانەی سەرۆک نێچیرڤان بارزانی)، بریتییە لە پشتگیریی فەرەنسا لە گەلی کوردستان کە هەڵقوڵاوی فەلسەفەی سیاسیی و مۆراڵیی وڵاتەکە و لەسەر بنەمای گرەوێکی 30 ساڵەی فەرەنسییەکانە لەسەر گریمانەیەک کە پێیوایە کوردستانییان دیموکراسیخوازن و لێیان دەوەشێتەوە نموونەیەکی سەرکەوتووی دیموکراسی و رێزگرتن لە مرۆڤ و پێکەوەژیان و ئازادی لە ناوچەیەکی نامۆ بەم بەهایانە سەربخەن، بایی هێندەش ئەزموون و هۆشیاری سیاسییان هەیە کە تێدەگەن چارەنووسیان پەیوەستە بە سەرکەوتن لەو تاقیکردنەوەیە و سەلماندنی ئەوەی شایستەی گرەولەسەرکردن و ئەهلی سەرخستنی ئەو نموونەیەن و پاشەکشەی لێ ناکەن.
ڕایەڵە و نەگۆڕێکی دیکەی روانگەی هاوبەشی ماکرۆن – نێچیرڤان دەربارەی چارەسەریی کێشەکانی نێوان #هەولێر# و بەغدایە کە هێشتا قەیرانبارە و لەم دیدارەش دا تەوەری باس دەبێت. پاریس لە 2017ەوە پێیوایە باشترین چارەسەر بۆ ئەو کێشانە بەرقەراربوونی کوردستانێکی بەهێزە لە عێراقێکی یەکگرتوودا کە لە یەک کات دا کۆتایی بە کێشەکانی کوردستان بهێنێت و هەروەهاش خزمەتی سەقامگیری سیاسی و بووژانەوەی عێراقیش بکات. لە تێڕوانینی هاوبەشی هەردوو سەرۆک دا ئەم ئامانجە بەوە دێتەدی کە کوردستان هەرێمێکی یەکگرتووی یەکدەنگ و بەغداش پایتەختێکی ئیرادەبەدەست و عێراقیش وڵاتێکی بەڕاستیی ئیتیحادی بێت کە بە تەواوی لە چەمکی فیدراڵیزم تێگەیشتبێ و پیادەی بکات.
باس و خواسێکی دیکەی دیداری لووتکەی ئێلیزێ، شەن و کەوی ئەو شەڕە وێرانکار و مەترسیدارەیە کە لە رۆژهەڵاتی نێوەڕاست لە ئارادایە. دیدی سەرۆک نێچیرڤان بارزانی لەم بارەیەوە روونە و سەرۆک ماکرۆنیش پێی ئاشنایە، لە دیدی سەرۆک نێچیرڤان دا شەڕ ئەو کوێرە رێگە و ئەو ئامرازە بێ کەڵکەیە کە جگە لە ماڵوێرانی و ئاڵۆزکردنی زیاتری گرفتەکان، هیچ کێشەیەکی نەگەیاندووە و ناگەیێنێتە چارەسەر، کێشەی مێژوویی نێوان ئیسرائیل و فەلەستینیش جگە لە داننانی هەردوولا بە مافی هەبوون و ژیان و دەوڵەتی یەکدی، چارەی دیکەی نییە. هەر لەم پێودانگەوەیە سەرۆک نێچیرڤان لەبارەی ئەم شەڕەوە دەڵێ: دەبێ هەموو لايەک لە عێراق و هەرێمى کوردستان، بەرژەوەنديى باڵاى گەل و وڵات بخەينە سەرووى هەموو شتێکى ديکەوە و بە هيچ پاساوێک نابێ رێگە بدرێت وڵاتەکەمان ببێتە بەشێکى شەڕ و ئاشووبی ناوچەکە کە جگە لە زيان و ناسەقامگيرى و چارەنووسێکى ناديار، هيچ سوودێکى دیکەی بۆ عێراق و بۆ هەرێمی کوردستان تێدا نابێت. لە هەرێمى کوردستانيش دەبێ ئەو شەڕە و مەترسییەکانی، کۆمانبکاتەوە و وابکات ناکۆکییەکانمان تێپەڕێنین.
لە راستیدا ئەم شەڕە و زیانەکانی دەبێ لە داهاتوودا زەوینە بۆ پيادەکردنى روانگەی کارەکتەره میانڕۆ و دانوستاندنخواز و ئاییندەبینەکانی ناوچەکە فەراهەم بکات، دەبێ رێی باشتر بۆ ئەو سیاسەتڤانانه بکاتەوە که کەمتر بۆ رابردوو و زیاتر بۆ ئایینده و ئاییندەسازی دەڕوانن، میانڕۆیی و دانوستاندنخوازی و یەکدی خوێندنەوە لەجێی شەڕ و یەکدی سڕینەوە، رێبازیانە که به هەڵسەنگاندنی چاودێران بۆ روانگە و دنیابینیی سیاسەتڤانانی ناوچەکه، نێچیرڤان بارزانی یەکێکیانه.
پێشوازیی ئێلیزێ لەم ساتەوەختەدا لە سەرۆکی هەرێمی کوردستان و راوێژپێکردنی لەم پرسە هەستیارەدا، ئاماژەی متمانه و باوەڕی سەرۆک ماکرۆنە بەکارەکتەر و روانگه و دوونیابینیی سەرۆک نێچیرڤان و لە هەمان کاتیشدا پەیامێکە پێمان دەڵێت: پێگە و ئیعتباری هەرێمی کوردستان هێشتا لە بازنەی بایەخدایە. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=