د. محەمەد سالح جومعە شیرەتکارێ سەرۆکێ ھەرێما کوردستانێ د دیدارەکێ دا ل گەل گۆڤارا گۆلان دبێژیت، ل سەرانسەری دەڤەرێ و د چارچۆڤێ مەدێ شیعەگەریێ دا ب سەرۆکاتیا ئیرانێ و ململانێ یا د ناڤبەرا ئیرانێ و سعودیێ و ئیسرائیلێ و ئیرانێ ژلایەکێ دی ڤە، بازنەیێ بەرفەرە یێ شەڕێ ب وەکالەت یێ دروست بووی، ئیران ژ یەمەنێ ھەتا لوبنانێ و سووریێ و عیراقێ و تورکیا پشتەڤانیا ڤی شەڕێ ب وەکالەت دکەت، ڕەوشا سیاسی یا کوردستانێ ژی یا دوور نینە ژڤێ چەندێ و ھەتا کوردستان نەبیتە دەولەتەکا سەربخوە، دەستێوەردان و کاریگەریا دەرەکی ل سەر ناڤخوەیا کوردستانێ دێ بەردەوامبیت، لەوما ھندەک سیاسەتمەدار پاراستنا کوردستانێ دئێخنە پێش ڕاگەھاندنا سەربخوەیێ، یان ئەنجامدانا ڕیفراندۆمێ.
د. محەمەد سالح جومعە ئاماژێ ددەتە ڕۆلێ سەرۆکێ ھەرێما کوردستانێ د شەڕێ دژی داعشێ دا و پاراستنا ئاخا کوردستانێ و دبێژیت”ئەو سیاسەتا سەرۆک مەسعود بارزانی دشەڕێ دژی داعشێ دا پەیڕەو کری، ھەموو ھێزێن ھەڤپەیمانیا نێڤدەولەتی دژی داعشێ کرینە پشتەڤانێن پێشمەرگەی، لەوما ھەکە کوردستان و سەرۆک بارزانی ب تنێ بان، دبیت ئیران و داردەستێن وێ تشتەکی بکەن، بەلێ ئەڤرۆ کوردستان یا ب تنێ نینە، نوکە دبینین سعودیە و ئیران د چ حالەتەکی دانە، ھەروەسا ئیران و ئیسرائیل ژی چاوان سەحدکەنە ھەڤدو، لەوما ئەڤرۆ سەرۆک بارزانی بخوازیت سوباھی ئیسرائیل دێ ھێزێن خوە ئینیتە کوردستانێ و دێ ل بەرانبەری ئیرانێ ڕاوەستیت و ھێزێن سعودیێ یێن ب ناڤێ (درع الشمال) دێ ھێنە ھەولێرێ و بارەگایێن خوە ل چۆمانێ و حاجی ئۆمران دانن، لەوما ھەکە ئیران ڕاستەوخوە شەڕێ کوردستانێ بکەت، دێ شەڕ چیتە ناڤ ئیرانێ و ئیران باش دزانیت ھەکە شەڕ چو ناڤ وێ ئەو وەکو دەولەتەکا ئێکگرتی نامینیت و دێ بیتە پێنج دەولەت( بەلووج، ئازەری، عەرەب، کورد و فارس)، بەلێ ئیران یا گەھشتیە وێ باوەریێ ھەکە شەڕی ل کوردستانێ بکەت، دێ سعودیە ئیسرائیل لەشکرێ خوە ئیننە کوردستانێ و ل کوردستانێ دێ ڕاستەوخوە شەڕێ ئیرانێ کەن، ئەڤە ژی ھەردەمێ پێدڤی بیت، دڤێت بھێتە کرن، ئەڤجا ئەڤرۆ بیت یان سوباھی.
ل دۆر پرسا دەولەتا کوردی و پشتەڤانیا ڕاشکاوانە یا ئیسرائیلێ بۆ وێ چەندێ ئایا تنێ بۆ ڕاگەھاندنێ یە، دبێژیت” ئیسرائیلێ باوەری ب دامەزراندنا دەولەتا کوردستانێ یا ھەی، ژبەر وێ چەندێ کا چاوان دەولەتێن دەڤەرێ دژی ئیسرائیلێ نە و دبێژ نابیت ئیسرائیل بمینیت، ب ھەمان شێوە ھەموو دەڤەر دژی دامەزراندنا دەولەتا کوردی یە، لەوما ئیسرائیل کوردستانێ ب ھەڤ چارەنڤیسێ خوە دزانیت، ئەڤ ھەڤ چارەنڤیسی یە ژی وە ل مە ھەردو لایەنان دکەت کو درووشمێ کۆنفیدڕالیێ د ناڤبەرا کوردستانێ و ئیسرائیلێ دا بلند بکەین، ھەر ڤێ چەندێ ژی وەکریە کو ئیسرائیل ھەموو بالیۆزخانێن خوە ل وەلاتێن جیھانێ ئاگەھدار بکەت و ڕاشکاوانە دبێژیتێ، ھوون تنێ نوونەراتیا دەولەتا ئیسرائیلێ ناکەن، بەلکو نوونەراتیا کوردان ژی دکەن لەوما ئیسرائیل مان و نەمانا خوە ددەولەتا کوردستانێ دا دبینیت، ئەڤە ژی نە ژبەر خاترا چاڤێن مە، بەلکو عەرەب دبێژنە مە ھوون ئیسرائیلا دویێ نە، ئیسرائیل ژی دزانیت، گەلێ کورد یێ قەھرەمانە و دشێت پارێزگاریێ ژ ئاخا خوە بکەت، تنێ کێماسیا ھێزا کودری، نەبوونا چەکێ پێدڤیە و ھەڤپەیمانیە، ھەکە ئەڤ دویە ژی بۆ پەیداببن، کورد دێ شێن ئاخا خوە پارێزن، نوکە ژی ئەمریکا و ڕۆسیا و ئیسرائیل د ھەڤڕانە ل سەر دامەزراندنا دەولەتا کوردستانێ”.
سەبارەت وێ چەندێ ئایا تنێ ئەڤ خالەنە ئیسرائیلێ و کوردان پێکڤە کۆم دکەت، شیرەتکارێ سەرۆک بارزانی دبێژیت” نەخێر، ل سالا 512 بەری زایینێ کوردان و ئیسرائیلێ پەیوەندی ھەبوون، ل وی سەردەمێ ئیسرائیلی ل سەر دەتسێ نەبوخەزنەسر ئاوارەبووین، ھەموو چوونە کوردستانێ، لەوما ب درێژیا وێ دیرۆکێ، کورد و ئیسرائیل وەکو دو نەتەوێن ستەم لێکری ھەڤ چارەنڤیس بوون”.
شیرەتکارێ سەرۆکێ ھەرێمێ ئاماژە دا وێ چەندێ کو سعودیێ باوەریەکا تمام ب دەولەتا کوردستانێ یا ھەی، سعودیە باش دزانیت ژی کو بێ پشتەڤانیا ئیسرائیلێ دێ کەڤیتە بەر مەترسیا مەزن یا ئیرانێ، وئیسرائیل ژی یا بەرھەڤە ھەموو ھەڤپەیمانیەکێ ل گەل کوردان بکەت، ھەکە ئەم نوکە داخواز بکەین ئیسرائیل یا بەرھەڤە، دەمێ داعشێ ھێرش کریە سەر کوردستانێ و نێزیکی ھەولێرێ بووی، ئیسرائیلێ ب ڕاشکاوانە ب سەرۆک ئۆبامای ڕاگەھاند، ھەکە تو بڕیارێ نەدەی، ئەم دێ ب فرۆکان و لەشکرێ خوە بەرگریێ ژ کوردستانێ کەەین، لەوما ئۆبامای گۆت کوردستان ھێلا سوورە”.
گۆت ژی” سەرۆک بارزانی پێنگاڤێن گەلەک باش بۆ دابینکرنا پشتەڤانیا نێڤدەولەتی بۆ کوردستانێ یێن ھاڤێتین، بەلێ سەرۆک بارزانی ھەموو بزاڤێن خوە بۆمە ئاشکرا ناکەت و ئەم ب تمامی دئاگەھدار نینین، لەوما دەمێ ئیسرائیل وەکو دەولەتەکا مەزن ل دەڤەرێ بێژیت کو یا بەرھەڤە کوردستانێ بپارێزیت، ڕامانا وێ ئەوە کو وێ ئامادەباشیا خوە یا دەربری، لەوما ب دیتنا من ئاخڤتن یا ل سەر ڤێ ھەڤپەیمانیێ ھاتیە کرن و یا مای ببیتە نڤیسین و ئاشکراکرن و ھیڤیدارم بھێتە ئاشکراکرن، ژبەرکو بەری ئەم شەڕی بۆ ڕیفراندۆمێ و سەربخوەیێ بکەین، پێدڤیە مە بەرنامە و پلان ھەبیت کا چاوان کوردستانێ بپارێزین، پاراستنا کوردستانێ ژی دگرێدانا ھەڤپەیمانیێ یە ل گەل سعودیێ و ئیسرائیلێ”.
ب دیتنا د. محەمەد سالح جومعەی” دڤێت بەری ھەر تشتەکی ھزر دگرێدانا ھەڤپەیمانیا لەشکری ل گەل سعودیێ و ئیسرائیلێ بھێتە کرن، ژبەرکو ھەکە نوکە ڕیفراندۆمێ ئەنجام بدەین، یان دەلوەتێ ڕابگەھینین، دێ بیتە شەڕ، لەوما دڤێت بەری ھەموو تشتەکی پلانا مە پاراستنا کوردستانێ بیت، کوردستان ژی دێ ب ھەڤپەیمانیا لەشکری ھێتە پاراستن”.
سەبارەت بەردەوامبوونا چوونا شاندێن ھەرێما کوردستانێ بۆ بەغدا دڤێ ڕەوشێ دا، دبێژیت” ھنارتنا شاندێن کوردستانێ بۆ بەغدا ژبەر خاترا چاڤێن شیعان نینە، بەلکو نیشادانا نیەتا پاقژا کوردستانێ یە بەرانبەر ئەمریکا، ب وێ چەندێ کو کورد دخوازن پەیوەندی ل عیراقێ ھەبیت دچارچۆڤێ بجھئینانا دستوورێ عیراقی دا، بەلێ حوکمەتا عیراقێ دستوور نەھێلایە، بەغدا یا مووچێن حەشد شەعبی و کرێگرتیێن وێ ل شنگالێ ددەت، بەلێ مووچێن پێشمەرگەی نادەت، لەوما ب دیتنا من چو پەیوەندی ل گەل عیراقێ نەمایە، بەلێ نابیت ب ئێکجاری دەرگەھێ سیاسەتێ و دیلۆماسیێ بگرین”.
ل دۆر پرسا پشتی ئازادکرنا مووسلێ ژ دەستێ داعشێ، ئایا دێ مەترسی ل کوردستانێ زێدەتر بن، د. محەمەد سالح جومعەی گۆت” مووسل دێ ھێتە ئازادکرن، ئەمریکا ڕێ نادەت ئیرانێ ڕۆل دئازادکرنا مووسلێ دا ھەبیت و بەرنامێ ئازادکرنا مووسلێ یا خستیە بن دەستێ خوە و ھەڤپەیمانی د ناڤبەرا لەشکرێ عیراقێ و پێشمەرگەی و حەشد وەتەنی یا ھاتیە کرن و ڕێ نادەنە حەشد شەعبی پشکداریێ دئازادکرنا مووسلێ دا بکەت، ھەکە ب خواستا ئیرانێ بیت، ئیرانێ نەڤێت چو باژێرەکێ عەرەبێن سونی بھێتە ئازادکرن ب تایبەتی مووسل، بەلێ دێ مووسل ھێتە ئازادکرن و پشتێ وێ چەندێ دێ دەولەتەکا عەرەبێن سونە ل سووریێ و عیراقێ دروست بیت و ئەو دەولەتە ژی دێ دوستا کوردستانێ بیتو ھەڤپەیمانا سعودیێ و ئیسرائیلێ ژی بیت، دڤی حالەتی دا، یان دڤێت عیراق ببیتە دەولەتەکا کۆنفیدڕالی و ھەرسێ دەولەتێن کوردی و شیعی و سونی کۆم بکەت، یان ژی بھێتە پارچەکرن و ببیتە سێ دەولەتێن سەربخوە”.[1]