میرزا ئۆلقاڎر، هەرچن پیر بییەن، تەمەنش گوزەرش کەردەن، بەڵام دڵش هەر نە وەختی گەنجیشەن، ڕەفتارەکېش هەرزەکارانېنۍ، هەڵای خەیاڵش ئاوېزانو زوڵفان و گەردەن و خاڵیەن، بۊی شەمامەی تازە ڕەسیەن، هەڵای چوون سەنعان پەشېوەن پەی تەرسای گاۋرۍ، چوون مەجنوون نە سارای دووجەیل وېڵ و ئاوارەن، میرزا مۊچیاریش کەرۊنو ماچۊ: ئەی دڵ، باری گوناحانت قورسەن، مەشۊم بزانی یاگەی نزیکت چېرو خاکیەن، چاگە نە جای دەس، نە جای نەجاتەن، پەوکەی مۊچیاریت کەروون ئەی دڵ، بگېڵۆ، خوڎای قادر بەزەییمەندی ڕەحمینەن.

های دڵە ۋیەرد
های دڵە ۋیەرد، های دڵە ۋیەرد
موژدە بۊ واڎەی جوانی ۋیەرد
واڎەی شاڎیی و زەوق سەفا و سەیرت مەرد
ها خەم تالیقەی پیری پەیت ئاوەرد
نیشانەی پیری تای مووی سفیدەن
بەڵام جە پیری شاڎیی بەعیدەن
وەس بگنە ئەو شۊن ڕای هەرزەکاری
کەم بڎەر وە پای باری بېعاری
من خۊ ها پیری پېشانیم داخ کەرد
ئەیلچی مەرگ قەڵای قامەتم قاخ کەرد
تۊ هەڵای بەڎبەخت ئەبڵەی کۊس کەفتە
سەنەی تاریخت ها نە دوو هەفتە
کەم نەبېیەن جەلات ڕۊحیەی مناڵی
دایېم شەیدای زوڵف گەردەن و خاڵی
بۊی عەتر عەرەق شەمامەی نۊبەر
توخوڎا نە کەللەت کەی مەشۊ وە بەر
دڵە پارە بای، کافیەن تا کەی
وە هەوا و هەوەس عومر وېت کەرد تەی
تا کەی چوون مەجنوون مەگېڵی پەی لەیل
بۍ ڕەفیق وېڵ ‌وېڵ نە سارای دووجەیل
تا کەی چوون فەرهاڎ دیڎە بۍ خاوی
پەی شیرین جگەر پەڕاو مەشکاوی
تاکەی چوون سەنعان قوتب سەرزەمین
پەی شېوەی تەرسا مەویەری جە دین
تاکەی چوون وامیق وە ئاهو زاری
پەی عوزرای بېعەیب ئەروا مەسپاری
دڵەی پەڕ جە دەرد، ئینەتە گرد کەرد
سوجدەی سەودای عەشق، باڵای کېت نەوەرد
پەروانەی شۊڵەی کام چراخ نەویت
توخوڎا تۊ بوڵبوڵ کام گوڵباخ نەویت
های های تا وە کەی شېتە ژیر نەویت
واڎەی پیریتەن، چەنی پیر نەویت
فتوای شەیتانت قەرار دا نە گۊش
شا ڕای حەقیقەت کەردی فەرامۊش
بۊ زووتەر هەوڵدەر گرانەن بارت
سەیری زوڵف و خاڵ نمەیۊ کارت
بارخانەی گۊنات بەرزی ئەفلاکەن
هەی خاکت وە سەر ماوای تۊ خاکەن‌‌
ئاخر ڕۊیێ هەن گڵکۊ بڎۊت گیر
دېوانەی چوون تۊ هەم بکەرۊ ژیر
ئەوسا نە ڕای دەس، نە ڕای نەجاتەن
تەنگەن تاریکەن سەختەن زوڵماتەن
گیرۊڎە جە دەس بارخانەی تاوان
واچی یە واتەی ئه و ڕۊن پېم یاوان
بەشەر جە حاڵت نە بۊش ئاگاهی
زایەڵەی زاریت بشۊ وە ماهی
ئەی ڕا تۊ گرتەن ڕاگەی تۊ نېیەن
نەی ڕادا چن کەس بېخەبەر شیەن
پەی هەوەس ڕاگەی نەجاتت بەندەن
ئەگەر فامت بۊ ڕای تۊبەت مەندەن
هەر نە جوانی قامەتی عەشقت
یەک یەک ئەفعال و تۊماری مەشقت
زوڼارت پۊشان، ئەر کەیفت کەردەن
ئیسە وە زاهیر گردت ۋیەردەن
پەی چېش چوون پیری عومرش پەی کەردی
بنچینەی شاڎییش جە بېخ ئاوەردی
بۊ تۊیچ جە پیری، هانا بەر وە پیر
بەڵ پیر پیران ببۊت وە دەسگیر
هەر شەو تا وە ڕۊ بە ئاهو ناڵە
جە دەرگای خالق زار زار بناڵە
واچە یا کەریم شای کەرەم داران
بۊ بەخشەم وە عەشق موستەفا و یاران
بەڵ ئەو ڕەحیمە ڕەحمێ لېت کەرۊ
وە کۊی لوتف وېش دیوانت بەرۊ
ئەر بەی عەداڵەت باوەرۊ نە وەر
پەی دەرگای دۊزەخ وېت ئاماڎە کەر
یا خۊ وە ڕاسی ڕاسش هەر ئېدەن
ئەرسەد کە (قادر) یا گەی ئومېدەن.[1]