تەوەنێ ئاسمانۆ وەرەبۊوە، مەگنۊ سەرەو فەقیرێرە

ئی واتۍ جۆهەرێ کومەڵایەتی دماکۆتانەش هەن، مەبەسش ئانەن بارو (نەڎاری، نەگبەتی، کڵۊڵی، داماگی) پېسە مۊرێ جە ئەزەلۆ نریێنە میاچەما خەڵکە فەقیرەکارە، ئیتر خەڵکۍ خوڎا پەنەدێ هیچ نەگبەتیێ ڕوەشا نمەکەرۊ وەنە، جە کاتێنە ئا کارەساتۍ و نەگبەتیۍ توشوو گرڎ کەسێ مەبان. پەیلوێوە نازانستی و ناماریفی هەن، پاسە تەماشەو فەقیری کریان کە چی دنیانە زیاڎەن، یاگە گیرەن. دلۍ گرفتە کۊمەڵییەکانە فەقیر فرەو جاری بەشەش وریێنە، غەدرش وەنەکریان، جە بېدەسەڵاتینە مافشان واردەن، دەسو تۊمەتیشا پەی درېژ کەرڎەن، بوختانیشان پەی وەشکەرڎەن، هەر پۆکەی واتەنشان هەر هەرمانێ خرابە قۊمیۊ، دەسێ فەقیریش چەنەن، بە بارو بەزەیېوە واتەنشان؛ کەس فەقیر نەبۊن. [1]