ڕومان نویستەی جە وېژەن کەردەی سەختتەرەن
بەشۍ: چوارەمە (دمایین بەشە)
نویستەی: #هەورامان ڕۆستەمی#
زوانو نویستەی ڕۊمانێ:
زوانو ئی ڕۊمانێ پەڕا ئیجاز وساڎە نویسی، بەڕاسی وېمانە نویسیەنەو خەبەرېو جە نەسری ئاهەنگین و کەلیمێ نائاسۇڎەا نېیا و سادە و ساکار نویسیەنە و هەڵێ تایپیێ و ڕانویسیێش فرە کەمێنێ کە یاگێش هەنە دەسوەشی واچمێ بە کاک فەتحۆڵڵای ڕەزایی پېسەو ویراستاروو ئی کتېبیە.
دیالۆگ:
یۆتەر جە خاڵە گرنگەکاو ئی ڕۊمانێ دیالۆگەگرفتنێ، پېسەو مۆتێدیوی کاک ڕەزا هەوڵ مڎۊ دلێ نویسەکاشەنە بە کارشا بارۆ و وەڵتەریچ ئی هەرمانېشە کەردێنە، پی شێوە کە داستانەکێ بە لەهجێوی خاسوو لهۆنی ڕەوایەت کەرۊ، بەڵام دیالۆگوو شەخسیەتەکا بە لەهجێوتەر کە چېگەنە زاهېرەن لەهجەو شاروو پاوەین.
ئینە وېش بېیەن پېسەو مۆتێدېوی کە سەرجەم لەهجەکاو هۆرامانی وەرچەم گېریا و بەشکووم ڕۊ بە ڕۊ نزیکتەرێما کەرۊوە بە زوانێوی ستانداردی.
‌پەیامێ ئی ڕۊمانێ:
ئی ڕۊمانێ دماو ئانەی کە بە شێوێوی ڕەوایی و خەتی باسوو تەنگ و چەڵەمەکاو ژیوای خەڵکوو چنارەی کەرۊ، بە پەیلواو من دوەمین کارش ئانەن کە پەڕەنە پەیامێ، فرە فرێنێ وەروو ئانەی درێژە نەڎریۆ بە بابەتەکەی من تەنیا نامۍشا بەروو و ئێتر تەوزیحشا نمەڎەو.
مشیۊم وەراوەروو تەنگ وچەڵەمەو ڕۊزگاریەوە بە ئۆمېڎ مدرامان کەرمۍ.
کورد و لۊر و کوردێ قووچانێ دەسەبراینێ.
دەسەڵاتێوی زۊردار و زاڵم چن متاڤۆ تەئسیر بنیۆ ملو ژیوای خەڵکیەرە.
جەنگوو ئێران و ئێراقی چن کاولکاریێش کەردێ.
زیڼانیچەنە متاومۍ فێروو وانای و نویستەی بیمێ و کەڵکش چنە گېرمێ.
دایېمە ئۆمێڎمابۊ و پېسەو وڵکڵەی ئێحتێماڵش هەن بۍ ئەڎا و تاتە بیمێ بە دۆکتۆر فەرهاد.
وەشەویسی وەڵاتی و وەتەنی.
ڕووبەرگ:
فرە تووڕەنا دەسو ڕووبەرگوو ئی کتېبیەوە، فرە سەرد و بۍ ڕۊحا، ئەسڵەن حاڵ و هەواو هۆرامانیش نېیا پۆوە و فرەتەر ئێجوو دەگایېوەو دەوروو یەزدی نیشانە مڎۆ، ئڼە تووڕەنا دەسو ڕووبەرگیەوە ئێتر هیچم پەی واتەی نیا، من کتېبەکەو وېم عەکسێڤوو شۆشمێ سەر سەوزێش لکنوو پۊرە و پاسە نمازووشەوە.
یۆ جە خاڵە لاوازەکاو ئی ڕۊمانێ بە پەیلواو من و ئێحتماڵش هەن کەسېوتەر نەک ئینەی بە خاڵەی لاوازە نەزانۆ، بەڵکووم بە تایبەتمەنیش بزانۆ ڕەوایی و یەک خەتی ڕەوایەت کەردەی ئی داستانێن کە (444) پەلێ یەکڕاس ملۆ وەڵێوە.
ئېمە بڕېو تکنیکێما هەنێ پېسەو فلاش بەک و فۆرواردی کە ئاسۇڎە نویسەر تاوێ کەڵکشا چنە گېرۆ و بە تایبەت ئا باسوو لوای وڵکڵەی و بەتوول خانمێ پەی لۆڕستانی تاوێ مابەینوو یۊ جە بەشەکانە پېسەو فلاش بەکی بارۆش و واوەی وانەری بەرۊوە دلێ چنارەی و نازۆ حاڵ و هەواش فاڕیۆ.
دیسان ماچوو کە ئینە سەلیقەیین و جزوو گرفتی تکنیکی نېیا و تەنیا وەروو ئانەین کە وانەر بە هەیەجانەوە تاکو ئاخروو ڕۊمانەکێ چەنی نویسەری مەنۆوە.
وانەرۍ دوێ دەسێنێ، دەسېو کە هەرجۊربۊ ڕۊمانە یام کتېب مواناوە، بەڵام دەسېو هەنێ کە بەداخەوە چی سەردەمەنە فرێنێ و ڕۊ بە ڕۊ بە ڕېژەیشا زیادتربۊ، ئاڼە حەوسەڵەو ئەوەوانایشا نېیا و مشیۊم نویسەر بەتکنیکێ و لکێ وستەی دلێ داستانەکێ و ئەوەکەردەیشا و واوەی وستیشا دلێ گێچەڵێوێ تازێ تاکو ئاخروو ڕۊمانەکێ مەناوە چنیت، ئەڼا بەداخەوە ئیسە نەک حەر هۆرامانەنە، بەڵکووم سەرانسەرو ئێرانېیەنە فرە کەم کەسێما هەنێ بتاوا (500) پەلێ ڕۊمانە بواناوە و سەرانەو مۆتالێعەی ڕۊ بە ڕۊ بە هێمەتوو ئی وەرپەرسا خەریکا کەمبۊوە.
فرە حەز کەروو فرەتر و بە وردی بەرووتانە دلێ خەت بە خەتوو ئی داستانێ، بەڵام مزانوو بوو بە نوونگەو ئانەی وانەرەکێما چنەما ڕەنجیا.کە پاسنەن ئاخرەوە دیسان دەس وەشی کەروو جە کاک حەمەڕەزای بەهمەنی پەی وېش و ڕۊمانەکېش، بە ئاواتوو ئانەی زیاتەر چنەش وینمێ و بوانمێوە.[1]