لاچەمێوی خېرا سەرو ڕۊمانەو (دێڕ بە دێڕ حەسرەت)
بەشۍ: یەکەمە
نویستەی: #هەورامان ڕۆستەمی#
بەرویروو خاتوو ئامینە ڕەحیمی (ژوان) .
ڕومانەو دێڕ بە دێڕ حەسرەت بە قەڵەموو خاتوو (ژوانۍ) م واناوە و فرە لەزەتم بەرڎ چنەش و دەس وەشیش چنە کەروو پەی هېز و تینوو قەڵەمیش و ویری گەشیش.
پېسەو وەردەنگېوی نەک پېسەو مۆنتەقێدېوی گەرەکما چن کەلیمێ دڤوو پەیتا سەرو ئی کتېبیە کە هەم ئەژناسابۆم پنەتا و هەم تاوابۆم پی بۊنەوە دەس وەشیێوی تایبەتم کەرڎەبۆ جە نویسەرو ئی بەرهەمیە و داوا کەروو جە گرڎیتا حەتمەن بواندێشەوە ، چوون ئێژاو وانایا.
دێڕ بە دێڕ حەسرەت ڕومانێوە کۊمەڵایەتیە و ڕەوانشناسیەنە کە (340) پەڵێنە نویسیەینە و باسوو ئازار و ئێشەکاو کۊمەڵگاو هۆرامانی کەرۊ بە تایبەت باسوو ژەنێ.
سەرانسەرو ئی ڕۊمانێ باسوو دیاردەو شوو کەرڎەی یام ژەن ئارڎەی کەرۊ سەرۆ ڕۊتوو قەدیمی و ئا کۆسپ و گرفتا ۋزۆ وەروو باسی کە خەڵکوو مەحاڵوو هۆرامانی بە تایبەت شاروو هۆرامانو تەختی وەروو باوەڕی ئایینی ڕادیکاڵی و سۆنەتی کە بېیەنشا و بۊنەو زاڵ بېیەی حۆکموو ئایینی پیاسالاری و بۍ تەوەجۆیی بە خواستوو کۆڕ و کناچۍ و تەنیا وەروو ئانەی گوا دەسوراتوو ئایینیشا بەردەبۆ ڕاوە، جۊرێو چی بابەتەنە هۆرس و ئەرەنیشتشا کەردەن کە دوێ جوانېشا بۍ ئانەی تاکو ئیسە هەنترینشا دیەبۆ میاڤنا بە یۆی و بەداخەوە نەتاوانشا لەیەکوو ئانەی بڎاوە کە ئایا ئی کناچۍ ئی کۆڕشە گەرەکا؟ ئەسڵەن یۆترینشا دیەن و پێوەرە قسێشا کەردێنێ و ئاشنەینێ بە ویر و داخوازیەکەو هەنترینی؟
بۊنەو حاکم بېیەی ویری کۆنەو خەڵکی و ئێرادەتێو کە بە ئایینی بېیەنشا فرەو خەڵکی بەداخەوە هەر پی شێوە دریان شوو یام ژەنیش پەی ئامەینە و ئێتر خاس یام خراب ساچیەینێ و سۆتێنێ، بەڵام قارەمانەو داستانەکێ ئېمە یانېو (سارا) بە هیچېو مەتاڤۆ چنی ئی جۊر مامەڵە کەردەیە کەنار بەی و بەداخەوە دماو پانزە ساڵا ژیوای هامبەشی چەنی شوەکەیش سەرەڕاو ئانەی نەتاواش ئی گرفتیە چارە کەرۊ تەنانەت تووشوو ناوەشیێوی دەروونی بۊ و درێژەو ڕومانەکێنە داستانێ فرێش قۆمیا ڤنە.
تەرح و پەیرەنگ:
تەرحەو ئی داستانێ پتەو و هێقم مجیەینەرە.نویسەر بە درۆسی هەر ئەوەڵەوە زانانش پەی خەت بە خەتیش مشیۊم چېش بنویسۆ.تەرحەکێ واتەن پەنەش کە ئەر قارەمانوو داستانەکێت تووشوو فڵان ناوەشی دەروونی بۊ، ئەوەڵەو ڕەفتار و کرداروو کەسېوی کە تووشېیاروو پێسنە ناوەشیێوی بۊ ئەچێمنەنە و وردە وردە بەرۊش وەرەوە تاکو تلنووش دلێ ئەسڵوو ناوەشیەکەی و گرڎوو نیشانەکاو ناوەشیەکەی وزۆ وەروو باسی و زەینەو وانەری ئاماڎە کەرۊ کە (سارا) خەریکەنە نەوەشە گنۆ، پەی نموونەی: هەر ئەوەڵوو ڕایوە بە شێوازوو ئەرەنیشتەیش، جۊروو تەماشا کەردەو شوەکەیش، واخوا بیەو فرە ئا کەلیما و جۆملا کە (سارا) دڵش پوەنێ یام قینیش مەی چەنەشا، پېسەو ئا قسا کە (عێرفان) کەرۊشا پەیش. دەنگو عێرفانی، سەڵوەکێ و ڕەنگەو گجیەکەیش و ۋلە گڵاویەکێ تەموەو کجیەکەیش، کە تاکو ئاخروو داستانەکێ بە دەیان جار واخوەی باوە کە نیشانەو زەینەو ناوەشوو (سارا) ین.[1]