کەچەڵ تیمارکەر بیێ چارەو سەرەو وېش کەرۍ

ئی ئیدیۆمۍ دووریێ فراوانش هەن دلۍ گرفتەکانە، پېسە بوارە مادیەکەی، هەم مەعنەویەکەی. دکتور یام حەکیم یام دەواکەر وېش شارەزاو نەۋەشی و دەردەکان، پەوکەی بە ئاسانی عیلاجشان پەی منیۊرە، گەر وېچش توشو دەردو نەۋەشیێ بۊن ئانە عیلاج پەی وېچش دیاری کەرۊن، بەڵام گەر نەتاوۊ دەواو وېش کەرۊن، ئەی چەنی دەواو خەڵکی کەرۊن؟
وەڵینەکېما پېسە ئیدیۆمێ هەم مۊچیاریێ واتەنشا پا کەسا هەکە عیلاج منیارە پەی خەڵکی، بەڵام وەختێ وېشا توشو دەردێ مەیان دەسەپاچۍ مەگناو هیچشان پەنە نمەکریۊ، ئیتر خەڵک بڕواشان پەنە نمەکەرۊ.
دلۍ پېوەڼییە کۊمەڵیەکاچەنە پېسە دەرسێ واچیان پا کەسا کە خەریکۍ مۊچیاری کەردەی خەڵکینی، بەڵام وېشان پاسنە ڕەفت نمەکەران. پەی نموونەی نەفەرێ مۊچیاری کەسێ کەرۊن و ڕاش پەی منیۊرە کە فڵاتە هەرمانۍ کەرۊن، یام ئا جۊرە کاسپیەیە کەرۊن، وەختێ کەسی مۊچیاری کریا قسەکاش مەگېڵنۊوە پەی ئەڎێش یام تاتەیش، یام کەسێ دڵسوزیش، ئاڎییچۍ ماچان: دەخۊ ئاڎ وېش جە تۊ خاستەر پەیش لېویان چی مەکەرۊش، گەر کەچەڵ دەواکەر بیێ، دەواو سەرەو وېش کەرۍ، باسو عیلاجو قژ ئامایۆ پەی خەڵکی نەکەرۍ. مانای ڕۊشنتەرەو ئیدیومەکۍ ئانېنە: کابرای کەچەڵ گەرەکشەن دەواو کەچەڵی پەی خەڵکی بنیۊرە، بەڵام وېش هەر کەچەڵەن.[1]