فاتەلە، عەشق، تراژدی
قەد٘یمی فەرماوۆ: جەنگ وەش نیا، جەنگنامەش وەشا!
وەشی دەنگو کاک ئۆسمانی پەی گرد٘ کەسی ئاشکران و حەشاش چەنە نمەکریۆ؛ تاخایت مەل و مۆریچ جە سوینەو دەنگی وەشی و بێگەرد٘یش، کەیل و سەرمەسبۊ.
کاک ئۆسمان گۊرانیێ فرێش واتێنێ پەی خەڵکی و شریتێ فرێش پەڕێ کەرد٘ێنێوە و ڕەنگا وەشی ئا چېوا کە وەختوو شریت گېرتەکەینە ڕوەشا دێنە، کەمتەر جە وەشی شیریتەکا نەبۊ و ئەر فرێوە ئەچا ویرەوەریا ئەچا وەخت و ساتانە لانیە و تۆمار کریەنێ، ئیسە خەرمانێوە گەورە و عەزیم وەروو دەسیمانە بۍ پەی دەوڵەمەند٘ی فەرهەنگەکەیما.
ئەچی کوڵە باسەنە بەپاو ئا چېوا کە دەسم کەوتێنێ عەشق و تراژدی بەزموو فاتەلەیتا پېشکەش کەروو، ئاواتم ئانەن بە وانایش خەم نەبۊ مێمانوو دڵیتا.
سەی مەهدی و فاتمە (فاتەلە) دەسگیراندارێ با. سەی مەهدی خەڵکوو هۆرامان تەختی و فاتەلە خەڵکوو دەگاو کەماڵای. ئەچا کەین و بەینوو دەسگیرانداریشانە سەی مەهدی بۊ ڕۊزگاری و ملۆ پەودیمەرەو چەک کەرۊ شانەش!
شۆنەو ماوېرە فرە بۍ تاقەتوو دەسگیرانېش بۊ، تاودێ ڕاسی ئی چېویە جە داواکاری بەزمەکەینە و ئا بەیتا کە دلێ بەزمەکەینە چفنۊشا گۊشوو مامۊسا ئۆسمانیرە
ئەرەویای (ئێحساس) کەردێ و ئارام و قەرارش وەنە بڕیۊ!
دەسگیرانداری سەی مەهدی و فاتەلەی ساڵە وەختە پەڕە کەرۊو و ئاخرش سەی مەهدی مەفرەزێوە پېشمەرگێ کیانۆرە کەماڵا و شەوۍ جە تاتەو فاتەلەی ئیزن گېرا و فاتەلەی بەرا پەودیمەرە تاکو چەنی دڵداریش و شەریکوو ژیوای دماڕۆیش یاوا بە یۆترینی و ژیوایە پەڕ جە وەشەویسی دەس پەنە کەرا.
شەوێ جە شەوا مەفرەزە مێ کەماڵا و ئیجازه گېرا جە تاتەو فاتەلەی تاکو فاتەلەی بەرا پەودیمەرە، بەڵام وەروو ئانەی تاتەو فاتەلەی تووشوو دەرد٘یسەری نەبۊ و دماوە عەزیەتش نەکەرا، پەنەش ماچا با ئېمە نەختێ دوورێ گنمێوە و ئیجا دەوروو سەعاتێتەری لوە خەبەر دە بە دەوڵەتی و واچە ئامێ و بە زۊر کناچەکېشا بەرد٘ە و لوێ!
وەختێ پېشمەرگەکێ دوورێ گناوە و بۍ خەمێ با، تاتەو فاتەلەی ملۆ و خەبەر مد٘ۆ بە دەوڵەتی. فرەش پەنە نمەشۆ بۊ تەقە تفەنگ و دەوروو یەک سەعاتی هەواروو دوڵێ و ئا بناروو کەشی چەرمەیە (تەختیە) مد٘ا وەروو فیشەکا، بەڵام ڕاوېیارێ ڕاو عەشقی هیچ لەتمێوەشا لا نمەیاوۆ و بێوەی و بێمزەڕەت فاتەلەی یاونا بېیارێ و مسپاراش بە شەریکوو ژیوایش.
فاتەلە و سەی مەهدی ئەپی جۊرە ژیوای هامبەش دەس پەنە کەرا و شۆنەو ساڵ دوە ساڵێ ژیوای پەڕ عەشق و وەشەویسیشارە با ساحېبوو کناچڵێوە کاڵ و هاڵێ وەشڵانێ وبۊ تاقەتوو شەو و ڕۊیشا.
وەختێ کناچۍبۊ دوێ یەرێ ساڵێش، داخەی سەختە و فرە فرە گرانەم! بەشەر قڕانەکەو هەڵەبجەی ڕوە مد٘و و سەی مەهدی و فاتەلە و کۊرپە کناچەکېش گنا دامی و چەنی پەنج هەزار پەپوولە باڵ نەخشیناو شاروو هەڵەبجەی پەی هەمیشەی قەباڵەو عەشق و وەشەویسی و ژیوایشا پېچیۆوە!!
شۆنەو ئی تراژدیە ئینسانیەیره، ئێتر سەی مەهدی نەمەن تاکو بلۆ خزمەتوو مامۊسا ئۆسمانی و هەر ئەپا جۊرە کە تاوەو بۍ تاقەتینە بەزموو فاتەلەیش بەسۊز پەی وات، ئەپاسەیچ چەمەریەو ئی کۆس و مەرگە ناهەقەیشا پەی وانۆ و بە بەیتێ خەمبارێ هاواروو بۍ تاوانیشا یاونۆ عالەمی!
سوبحان ئەمینی.[1]