نامۍ: میرزا شوکروڵڵا
نازنام: دیناروەند
ساڵۊ پېڎابییەی: 1751ز.
ساڵۊ مەرڎەی: 1843ز.
یاگۊ پېڎابییەی: #پشتکۆ_ لوڕستان#
یاگۊ مەرڎەی: #پشتکۆ_ لوڕستان#
$ژیۋاینامە$
میرزا شوکروڵڵای دیناروەند؛ فەیلی بییەن و نیشتەجاو (پشتکۆ) لوڕستانییەن، ساڵەو (1751ز.) ئامان دلۍ دنیێ و ساڵەو (1843ز.) کۊچی دمایینش کەرڎەن. ناوچەو لوڕستانی پېسە فرەو ناوچەکانو کوردەسانی بەشێ گۆرېش وەرمەگنۊ جە خاوەنداری ئەدەب و فەرهەنگ و کەلتوورو میللەتەکەیمان، چڼەها شاعېرۍ و نویسەرۍ و زانێ نامڎارېش پېشکەش بە میللەتەکەیمان کەردېنۍ، شاعېرەکانو ئەدەبیاتو یارسانی بەشێ فرېشان ئەچاگە ژیوێنۍ و یاوێنۍ پەنە کە دماتەر گەنجینەو ئەدەبو میللەتەکەمانیشان دۊڵەمەن کەردەن.
میرزا؛ دلۍ مێڎانو شېعرېنە دەسێ بەرز و باڵاش بییەن، بەڵام چەنی داخۍ میرزا شوکروڵڵایچ پېسە فرەو شاعېرانو تەری، فرەو بەرهەمەکانیش دلېنە شیېنۍ، کەمێشان نەبان کە چیلا و چۊلاوە مەگنا وەرو چەمان. میرزا، شارەزایی خاسش بییەن دلۍ ئەدەب و زوانەکانو عەرەبی و فارسینە، شېعرېچش بە هەر دوە زوانەکەی نویستېنۍ و هۆڼێنێ. بەداخۆ، ئی شاعېرەیچمان پېسە پەنەۋازی زانیاری تەماممان سەرو چەنیبییەی ژیوایش و کۊ بەرهەمەکانیش وەردەس نییەن، بەرهەمەکېش پژگیێ و وەڵێنۍ. بڕێشان فۊتیێنۍ و ئانېچشان کە مەنېنۍ پېسە کۊبەرهەمیش وەردەسۍ نییەنۍ و جەمۍ نەکریێنێ. ئانەی چېگەنە شایانو باسین، یاگەدەسو زانای گۆرەو کوردی شېخ محەمەڎ مەردۊخی کوردەسانین، کە تەمەنێ فرەش ئەچا مێڎانەنە سەرفکەرڎەن، دەمو ژیوای و نام و نیشانو بەشێ فرەو جە شاعېرەکانو ناوچەو هۆرامانی و کوردەواریش پەی ئېمە زیڼۍ کەردېنێ و تۊمارېش کەردېنۍ.
نموونێ جە شېعرەکانو میرزای دیناروەندی:
پیری .....
دڵا! ها گوزەشت، دڵا! ها گوزەشت
خۆشی و شادی و زەوق ساڵان ها گوزەشت
ماجەرای پیری، دیت چ ڕەنگێ ڕەشت؟
کاڵام بی وە بەرگ، خەزان کەرد نەشت
سپیدپۊش بېیەن، سەرتاپای باڵام
ناپەسەند بېیەن، قوماش ئاڵام
ئەلف قامەتم چوون دال وەردەن خەم
دیدەی دووربینم، پۊشاش پەردەی تەم
ئاۋەز و هۊش و فام جە لام بېیەن کەم
کەللەم چوون کەشتی، ها جە حاڵ تەم
هانا جوانی، بۊوە دماوە
تا گللەی پیریت، بکەرو وە لاوە
پیری هاتینە وە پیریمەوە
تەک دان وەبان گشت دڵگیریمەوە
پیری بی وە تەوق کەفت نە گەردەنم
لەویر نمەچۊ، حاشا کەرڎەنم
ئەگەر بواچووم قسە وە بێ تۆ
وەنەم مەواچن، لېوە و خەرەف گۆ
دەی نەمەن تاقەت، توانیای پیریم
بەڵکەم خوڎاوەند بدەی سەبیریم
هەتا جوانیم ماوەروم ئەو ویر
ژەو وېنەی خوونچیر، مەپێکۊم وەتیر
سەییاد تەردەست، چابوک تون ڕەو
بەرق چەخماخم، چوون شەهاب شەو
سەدای ماردەمم، وە کاوانەوە
کوان گشت وەک هۊر مەلاوانەوە
باریک بیم چوون مار ساف چوون شۆلەی خوەر
دینانەوە سەر کێلۋانې ئەو وەر
خڕەی خاک پای وېم نامام وە گۊش
وەحشییان کۆ، مەکەردم خامۆش
لە سەیر و سێران کۆوان کەفتەنم
نزیکە سەفەر، یەکجار ڕەفتەنم
ئیسا خاڵخاسان، لێم مەدەن تانە
بیمەوە تەمەڵ قاپی دەرگانە
خاسە نازاران ئۊسا منەتبار
ئیسا جە ڕوخسار پیریم بین بېزار
هەر کام کە دارۊن نیشانەی ژە لەیل
ئاهێ مەکېشن ، مەکەن حەیف و مەیل
هەر کام ئاۋەز و هۊش جە لاشان دویرە
لەو خەندەی مەکەن (شوکروڵڵا ) پیرە.
ئەسعەد ڕەشید.[1]