بەختەنەسری
بەشو دوەمی
کزی و بې‌دەسەڵاتیم خەریک بې زۊر گېرێ ملمەرە، گجی وەێویەتیەکەیم بییەبێ ئاڵاو سەرو تابووتیم و مەرگ وەرو چەمامرە جەولانی دێ. بەینو ئاسمان و زەمینېیەنە گیرم کەرڎەبێ. لاڵی و بې‌زوانی شەریکوو ژیوایم و زوان درێژی دەور و بەریام ئازارەم دێ.  واچېنی یۊ ئامان و منش بەرڎېنا سەرو کەڵکە پاساری و پېسەو زاڕۊڵێوی هەڕەشێم وەنە کەرۊ و تەرسنۆم تاکو جە هېز و توانایم وزۆ. بییێبېنې پېسەو وەردەسی و قەتارەو هەرمانام ئەژمارشا دەسمەنە خەڵەتیێ. فرە چېوە ئازارەم دێنێ، گۊشێم ئڼە زڕیایبېنې دوورادوور چفەچفوو ژەنە هامسایا ئەژنەوێنێ.  قەتاروو یاقووتا و لای واری سۆخمەکەیم پا بې‌دەنگیە گۊشام کەڕ کەرېنێ. تەنیا وېم ئەژنەوێنېش. فەسڵوو وەهاری ئامابێ و کەش و کۊ گەش بییەبێوە. خەڵک واچې سەوزەڵانینی، بەڵام تەنیا دڵوو من خەزانش زاڵ بییەبێ و خشەو گەڵای و موسێقاو هەزار زڕەش ئاواتێ جەسەی نیمە گیانیم بڕیێبېنېش. سەختیێ ڕۊزگاری قامەتشا کۊمنایبېنېرە، بەڵام هەر وېم نەڎێنا دەسوە.
پاییز ئاما و هەوا وردە وردە گېڵا ڕوو بە سەردی. یانە باوانوو شەریکوو ژیوایم مەژگشا نۆقسان بییەبێ و منی هەژار زەمانیە شاجوانەو وەڵاتیم واچېنێ بییێبېنې تانێ سەرو چەماشا.   ئی ڕۊ پەی ئەو ڕوی تەشەرێ دێنێ و زۆخاوێ کۊڵەبارم کەرېنێ. دڵەنە سەبروو ئەیۆبی وازێنا. کەس و کارم پەیشا بەردە بە کزیم و وەقرەشا بڕیا و دەسشا کەرد هاوارێ. واتم بېکاری و بەتاڵی ئاڎیشایچ چی چن کاتەنە بی باعیس لایە کەرا لاموە و ڕۊخساری زەردیم بوینا. یاگێوەنە وەشحاڵە بېیانی و یاگێوتەریچەنە زمسان نزیک بې خەموو ئانەیمە بې بە زۊر یانەما جیاوە کەرا. دیسان هەر وەشحاڵە بە جېیاتیی بېنې. فرەش پۆوە نەشی جە داخێ کەس و کارینە و واتەی قسە هەقانە یانەنە زنێمێشارە. ڕەنجو ئا ساڵیما بی بەڕۍ شڕېوە و دوې کاسە و چەمچەی کەل و قۆپیا. سەردی زمسانی یاگێوە و بې پێخوەری یاگێو تەر.
فرەش پۆوە نەشی بې‌تاقەتیما چەکەرەش کەرد. کوڕێوە یانەو لالۊ کەریمی کە ڕەفێقوو ئارامی شویم بې ئاماوە سەرێ بڎۊ یانە باوانیش. یاوابێ بە ئارامی و وەزع و حاڵش پەرسا بې، هیچش نەواتەبێ پەنەش بە بۊنەو ڕەش و ڕووتی یانە جېیاتیماوە ڕوەیچش نەبییێبێ خۆڵکەش کەرۊ. لوابێوە یانە و لاو بابەیشوە باسش کەرڎەبێ ئاڎې باسەکەشا پەی گېڵنابێوە فرەیچ پەنەش ناوەش بییەبێ. قەرارش دابێ یەرێ ڕوێ بنیشۆ. پەیچش نەکریێ و نەزانې چەنی یانەو ئارامی وەشحاڵ کەرۊ. واچې قەرز و قۆڵەیچ دەردە واردە نییەن. بەشو چن ڕواشانەن دمایی دیسان قۆمیوشانە و هیچ قازانجێوەش نییەن.
ئارامش چڕی و پیشنیاروو هەرمانېش دا، ئاڎیچ پەڕۆ یانەو بابەیش دەمیش گېرتەبێ و نەیارێ باسی درکنۆ. یاگێوەیچەنە دڵش پۆوە بې. واچې ئەر هەرمانێ نەکەروو زمسانما پەی نمەلۊ. شەوە ئاما و نۆقمێ خیاڵا بییێبېنې نەزاناشا تاکو کەرەشێڵوو سوحی قووڵناش و چەنی دەنگیش چڵاکیێرە. یەک جار ئارام داش مەژگش و گراڵەش گېرت ڕۊ بۊوە واچۊ یانەو بابەیش و بار و بنە پېچۊوە ڕوو بە شاری غەریوی. ڕېزانەیچ ئڼەش قۆمیابێنە تەنانەت واتش پەنەش قسېش ناوردە دلې قسێ.
دوې ڕوېش پۆوە نەشی چەنی ئازادی ڕەفێقیش کەوتێ ڕا و لوای. چن ڕوێ بییێ بە مێمانوو یانەو وېش. دمایی چېرخانېوشا بې پۆختەشا کەرد تاکو مەنزڵێوە وەشەشا دەس گنۊ. ئازاد شېرکەتەنە هەرمانە کەرې و گرڎ کەس شناسێش چوون زاناشا ئارام ڕەفێقشەن و مشناسۆش عازا هەرمانشا پەنە دا. ڕۊنە لوێ سەرو کاری و وېرەگاوە بڕېو کەل و پەل سانێ و ئارێوە پەی یانەی، ڕېزانە واچېنی دنیاشا کەرڎېنە خەڵاتش. چن ڕوێش پۆوەشی واتش: با تەلەفوونێو کەرمې یانەو لالۊ کەریمی و هەواڵوو یانەو بابەیم بزانمێ. تەلەفوون کریا و شۊنی چن چرکارە بابەش وېش یاونا و قسېش چەنی کەرد. ماچۊ ڕۊڵە هەرچی هەڕە بې ئەڎایت گېرتەوە پەیم و ئیسەیچ شەو و ڕۊ منش بڕیەن ماچۊ من تاقەت نمەگېروو دوورێ گناوە. چېش و چېش و چېش؟!
وېش بڕۊ و وێچش ورازۆ. هەزار ویرێ میا دلې مەژگیش. ئارام بې‌خیاڵ بی و هەرمانەکېش پەنە وەشە بې. واچې ئەر من ژیوایم وەش بۊ ئەڎایچم وەشحاڵە بۊ. دمایی دوې یەرێ مانگا چن تمەنێوەشا وسەبێ لاوە بڕێوی سەرو سەقاتشا سانا و چن ڕوێ مەرەخەسیشا گېرت و لوایوە پەی یانەو بابەیش. یاویوە یانه و شۊنی و هەواڵپەرسیرە چەنی ئەڎایش تاسەشا جە یۊوی مێڕیا، بەڵام چەمېش ڕېزانێ نەوینێنێ پاسە زانێ ئاڎە بییێنە ئارامش چەنە دوور وسنوه. دڵش بە وەزعێشا وەش نەبې، پەناوە هەر مۊچیاری ئارامی کەرې. ئارامیچ تازە دڵش بە هەرمانەکېیش وەش بییەبێ و دڵش نێ جیاش بازۆ.
نویستەی: گوڵزار شەریفی بېساران.[1]