نامۍ: عوسمان
نازنام: هۆرامی
نامۊ تاتەی: موئمېن
نامۊ ئەڎێ: مریەمە
ساڵۊ پېڎابېیەی: 1936 پېڎایی
یاگۊ پېڎابېیەی: #کێمنە- هۆرامان#
$ژیۋاینامە$
دەنگە ئاهورایەکەو سیاوچەمانەو هۆرامانی، عوسمان کێمنەی، نامېش (عوسمان موئمن عەزیز)ەن، ئەڎاش نامېش (مریەم ڕەحیم)ەنە.
ساڵەو (1936ز) دەگاو (کێمنە)ی جە ئەڎێ بېیەن، هەر جە تەمەنو زارۊڵەییشۆ حەزش پەی گورانیا بېیەن، عاشقو هونەرو گورانیا بېیەن، زیاتەریچ سیاوچەمانە.
حەزو گورانی واتەی دلۍ بنەیانەکەیشانە دەس پەنە کەرۊن، تاتە و مامۊکېش دەنگ وەشۍ بیېنۍ، ئاڎۍ شۊنەما منیا سەرو عوسمانیۆو حەزو گورانی واتەی چەنەش چووزە مەکەرۊن، ئی هونەرمەڼە گۆرە نەخوڼەوار بېیەن، تەواناو وانایۆ و نویستەیش نەبېیەن، وەلێ بەهرەو خوڎاکەردی پاسنەشە کەردەن کە هونەرو سیاوچەمانەی سەرو دەسو ئېڎیەرەو بە بینەو عوسمان کێمنەیرە بېیاوۊ قوناغێ باڵاو کە ئیسە گردو خەڵکو هۆرامانی شایەڎیش پەی مڎان و شانازیش پۆوە مەکەران.
ماموسا عوسمان کێمنەی پېسە ئوستازو تازەگەری و ئەنەئاوەردەو هونەرو سیاوچەمانەی منریۊرە، بە قسۍ وېش جە هونەرمەڼە وەڵینەکاو هۆرامانیۆ فېرو سیاوچەمانەی بېیەن، تاوانش گەشەش پەنە بڎۊو وېچش پېسە ئوستازێوە دەنگ بڎۊوە.
عوسمان کێمنەی شێڎاو دەنگو (حەمە ڕەحیم هانەگەرمڵەی) بېیەنو چایڎیۆ سیاوچەمانەش مسان، هەر پاسە جە گورانیەکاو (ڕەشە غوڵامی و حەمەعەلی خاوەیی و عۆدە کافیلەی) و چن گورانی واچێ تەریۆ بەهرەش هۊرگېرتەن. عوسمان کێمنەی ساڵۊ (1956ز) دەگاو (قای نەیجە)ینە یانەو (ماجید بەگو عیزەت بەگی)ەنە پەی یوەم جاری گورانیەش تۊمارە کەردېنە، ئانەیچ بېیەن بە سەرەتاو درەوشایۆ هەسارەو بەختېش پېسە گورانی واچی و دەنگش دانۆ دلۍ هۆرامانی و کوردەسانینە، پېسەو یۊ جە سەرقافڵەکاو گورانیۍ هۆرامیۍ تاکو ئیسەیچ سەرەمڕەنو ئەچا سەرکاروانەنە مەنەنۆ.
عوسمان کێمنەی دلۍ چڼەها زەماۋڼانە و دلۍ کۊنیشتو پیا ماقووڵانە گورانیېش واتېنۍ، دەنگە ئاهووراییەکەیش ۋستەنەنە دلۍ دڵو خەڵکی، نەک هەر دلۍ میللەتو وېمانە، بەڵکوم جە لاو میللەتە هامسایەکاماوە دەنگش یاگۍ سەرسامی بیېنە، پەی نموونەی گورانی واچی گۆرەو ئێرانی (شەجەریان) ئەپېسە تاریفېش کەرۊن: عوسمان ساحېبو گڵۋېۋۍ ئاڵتوونیېن، زرنگیایۆ بینېش بۍ وېنەن.
بە داخۆ، عوسمان کێمنەی ساڵەو (1989ز) ئاوازو دەنگیش تېک مشۊن، ئیتر ئا دەنگە ئاڵتوونییە ئەچا بینېوە پېسەو جارانی بەر نمێ.
دەنگو ماموسا عوسمانی خەڵکۍ فرېش کەمەند کېشو وېش کەردېنۍ، ژمارێ فرۍ هونەرمەڹېش مووچنێنۍ و ئەچاڎیۆ فېرو گورانی واتەی بیېنۍ، عوسمان کێمنەی بېیەن پېسە وانگێوە پەی فېربېیەو هونەرمەڼا.
ئەسعەد ڕەشید.[1]