بەسێ و کوڕو شوانەی
بەشەو پەنجەمی
دەنگەکەو حەمەدێ دەساندەسو کەشەکاوە دەنگێش دێوە، کتوپڕ دەنگێ ناسکی بەسۊز مەڕەکېەنە ئاماوە دەنگێ. واتش: ئای کاکە گیان، نە دېوەنا، نە درنجەنا، بەسێ واڵێ داماگە و بەڎبەختەتەنا چېگەنە کەوتێنارە. ئانە تۊ فریشتەو ئاسمانیەنی، یا حەمەدێنی کە چی کاتەنە یاوای فریایمەو؟ ئیتر وەڵات بې دەنگ بی.
حەمەدێ، واق بییەبې، لەتەرێ و مەتەرێ، یۊ جە یۊی بەتەرێ، حەمەدێ چېشی؟ بەسێ چېشی؟ ئینە چېشا؟ ئینە چ کارەساتێوا. ئینە وەرما وینووش، یا جادووم وەنە کریان؟ من پەی چېشی ئامانا، چېش مژنەو؟ دیسان کەوتەناوە دڵێ خیاڵا، بەڵام تەرسیش نەمەنێ بې. کۆچېو مدرارە و خەنجەرەکېش گېرتە دەسشەو، دەس و قاچە بڕیاکەش کەرد بیبنەکەشەرە، بە هەناکە هەناک لوانە دلې مەڕەکې. ئەوەڵ جار چەمش کۆت بە بووڵەو ئیرەکەی کە خەریک بې کۊشییای کۊشێوە. لاو ئێرەکەیەنە ژەنێوە بېهۊش داریەینەو. پاڵو ژەنەکېنە زاڕوڵێو لەت و پەت کریا سەرو خاکەکەیەو بې. چەو لاو ئەیرەکەیچەو کابرێو دوې خەنجەرێش کەوتێنێ و هەڵایی ونیش چنە مشۊ. پاسە دیارا ئاخر و ئۆخرو ژیوایشا. ئی دیمەنە سەیر و سەمەرە چی یاگە دوورە ئاوەڎانیێنە یەکسەرە حەمەدێش بەرد پەی عاڵەمێو تەری. ئێنە چېشا؟ ئینە چېش قومیان؟ یەواش یەواش لوا پەی لاو ژەنەکې، ئیرەکە هیشتای نەکۊشییابێ. خاس وردو ژەنەکې بییەرە، ئەژناساش، بەسێ واڵێش بې، بې هۊشە کەوتێ بې.
سەرەو بەسێش بەرز کەرڎەو، نیاش سەرو ڕانیش، دەسێوش ئاورد ڕوەشەرە، قژە شیویەکېش دېوە لا. چڕیش، بەسێ، بەسێ! بەسێ چەمېش کەرڎێ، چەمش کەوت بە حەمەدێ، بە چەمۍ هەڵسینېوە واتش: کاکە گیان ئینە تۊنی سەرەو بەسێ واڵێ داماگێ، چارە سیاوېت وستەن سەرو ڕانیت؟ ئینەشە وات و بې‌هۊشە کەوتەو!
حەمەدێ وەرو واڵەکەێش نەپەردەچیێش تەماشەو چېوێ تەری کەرۊ، بزانۆ چېش قومیان؟ دیسان کۆت کۊشش دای پەی هۊشییار کەرڎەی بەسێ. بە هەر جۊرێ بی، ئاوردەشەو سەرو وېش. واتش: بەسێ حاڵیم کەرە بزانوو چېش قومیان؟ شێت بیانی چی شەوېنە، چی یاگېنە، ئی لاشێ، ئینێ چېشێنێ وینووشا؟ بەسێ حاڵیم کەرە، بەسێ!
هۊرگېڵنای پەی سەرو زوانی هۆرامی: ئاریا یۆسفی.[1]