کۆمیسیاری باڵای هەڵبژاردنەکانی باکوری سوریا سەبارەت بە ئەنجامی هەڵبژاردنی هاوسەرۆکانی کۆمۆنەکانی باکوری سوریا ڕاگەیەندراوێکی بڵاوکردەوە و ئاشکرای کرد کە ڕێژەی بەشداربوون 70٪ بووە.
هەڵبژرادنی هاوسەرۆکانی کۆمۆنەکانی باکوری سوریا ڕۆژی هەینی لە هەرسێ هەرێمی #جزیرە#، #عەفرین# و #فورات# بەڕێوەچوو و ئەمڕۆ ئەنجامەکانی بە ڕاگەیەندراوێک ئاشکرا کران.
لە ڕاگەیەندراوی کۆمیسیاری باڵای هەڵبژاردندا هاتووە:فیدراسیۆنی دیموکراتی باکوری سوریا وەک پرۆژەیەک بۆ سڕینەوەی کلتوری تیرۆر و کوشتن و وێرانکاری پێشکەش کراوە، مافی گەلانی سوریایە کە لە سەر خاکی خۆیان بە ڕێز و حورمەتەوە بژین، بەمەبەستی بەهێزتر کردنی سیستمی فیدرالیی دیموکراتی باکوری سوریا پێویست بوو هەڵبژاردنی ئازاد و شەفاف ئەنجام بدرێت بۆ ئەوەی هەموو پێکهاتەکان تێیدا بەشداربن و نوێنەرەکانیان هەڵبژێرن.
لە بەردەوامی ڕاگەیەندراوەکەدا ئاماری بەشداربوون لە هەڵبژاردنەکەدا بەم شێووەیە ئاشکرا کراوە:لە هەرێمی جزیرە 437 هەزار و 142 کەس بەشداربوون بۆ هەڵبژاردنی هاوسەرۆکانی دوو هەزار و 551 کۆمۆن لە نێوان حەوت هەزار و 687 کاندید دا نوێنەرەکانیان هەڵبژارد، لە ئەنجامدا پێنج هەزار و 102 کەس وەک هاوسەرۆکی کۆمۆنەکان هەڵبژێردران.
ئەنجامی هەڵبژاردن لە هەرێمەکانی فورات و عەفرینیش بەم شێوەیە ڕاگەیەندراوە:لە هەرێمی فوراتدا 135 هەزار و 611 کەس بەشداربوون لە هەڵبژردنەکەدا و بۆ هەڵبژرادنی هاوسەرۆکانی 849 کۆمۆن لە نێوان سێ هەزار و 192 کاندیددا دەنگیان بە نوێنەرەکانیان دا و لە ئەنجامدا 772 کەسیان هەڵبژارد؛ لە هەرێمی عەفرینیش 155 هەزار و 697 کەس دەنگیان دا و لە ئەنجامدا 830 کاندید لە نێوان هەزار و 440 کاندید دا وەک هاوسەرۆکانی کۆمۆنۆکانی ئەو هەرێمە هەڵبژێردران.
لە کۆتاییدا ڕاگەیەندراوە، کە بە گشتی ڕێژەی بەشداربووان 70٪ە و هەروەها دەستخۆشی هەموو پێکهاتەکانی باکوری سوریا کراوە بۆ بەشدابوون و هاوکارییکردن بۆ بەڕێوەبردنی هەڵبژاردنەکە.[1]
24-09-2017