‎جەماوەری خۆڕاگرو خۆنەویستی یەکێتی
‎ئەندام و لایەنگرانی #یەکێتیی نیشتمانیی کوردستان#
‎خانەوادەو کەسوکاری سەربەرزی شەهیدان
‎پێشمەرگە قارەمانەکان، تێکۆشەرە دێرینەکان
‎کەمئەندامانی سەنگەرو زیندانیانی سیاسی
‎گەنجان و لاوان، ژنان، خوێندکاران
‎لە چل و پێنجەمین ساڵیادی دامەزراندنی یەکێتییەکەمان، یەکێتیی نیشتمانیی کوردستان گەرمترین پیرۆزبایی خۆمتان ئاراِستە دەکەم.
‎چل و پێنج ساڵ لەمەوبەر، لەوکاتەی کە بێ ئومێدی باڵی بەسەر هەموو کوردستاندا کێشابووو ڕژێمی فاشیستی بەعس لەلوتکەی هێزی خۆیدا بوو، یەکێتییی نیشتمانی کوردستان لەلایەن تێکۆشەرانی گەلەکەمان بەسەرکردایەتی هەڤاڵ #مام جەلال# دامەزرێنراو تەنها لەدوای ساڵێک لە دامەزراندنی شۆڕشی نوێی گەلەکەمانی لە شاخە سەربەرزەکانی کوردستانەوە دەستپێکردو ئومێدو هیوای گەڕاندەوە بۆ گەلەکەمان.
‎یەکێتیی نیشتمانیی کوردستان لەساڵانی خەبات و قوربانیدانی خۆی سەدان پێشمەرگەو سەرکردەی قارەمانی بەخشی بەنیشتمان و بەدروشمی کەم بژی و کەڵ بژی و لەپێناو کوردستانێکی ئازاددا.
‎دۆست و لایەنگران و ئەندامانی یەکێتی...
‎لە ماوەی (45) ساڵی تەمەنی خۆیدا، یەکێتییەکەمان بە جۆرەها هەوراز و نشێودا تێپەڕیوە، نەیارانمان هەمیشە لە بۆسەدا بوونە بۆمان و هەوڵی شکاندن و لەناوبردنی حزبەکەمانیان داوە، کەچی هەموو جارێک بەپشتیوانی دڵسۆزان و بەیەکگرتووییمان شکستمان بەپیلانەکان هێناوەو بۆمان سەلماندوون یەکێتی هێزێکە لەبن نایە.
‎قۆناغی نەخۆشکەوتنی مام جەلال و کۆچی دوایی قۆناغێکی یەکجار سەخت و دژوار بوو بۆ هەموومان، یەکێتیی لەبەردەم ئاڵنگاری یەکجار قوڕس و گەورەدا بوو، بەردەوام بووین و یەکێتیمان لە لەتبوون پاراست.
‎ئەمڕۆش، لەساڵیادی دامەزراندنی یەکێتییەکەمان، بۆ ئەمڕۆو داهاتوو بەڵێن دەدەم لەپێناو پاراستن و گەشەپێدانی یەکێتی بەهەمان ڕۆحیەتی ڕۆژانی سەختی خەبات پارێزەری یەکێتی و ڕێبازی پیرۆزی شەهیدان بین.
‎دووبارە ساڵڕۆژی دامەزراندنی یەکێتیی نیشتمانیی کوردستان لەهەموومان پیرۆزبێ و بەم بۆنە پیرۆزەشەوە سڵاو دەنێرین بۆگیانی پاکی شەهیدانمان و هەموو لایەک دڵنیا دەکەینەوە کە درێژەپێدەری ڕێبازەکەیان دەبین و بەجێبەجێکردنی بەرنامەی یەکێتییەکەمان هەوڵ بۆ گەشەپێدان و باشترکردنی ژیان و گوزەرانی هاووڵاتیانمان بدەین.
‎بژی کورد، بژی کوردستان
‎کۆسرەت ڕەسول عەلی
‎سەرۆکی ئەنجومەنی باڵای سیاسی و بەرژەوەندی
‎یەکێتیی نیشتمانیی کوردستان
#31-05-2020#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!