سکرتێرە 14
جەماعەت نانەکی باشیان خوارد، ئەمن کەمتر، چونکە لە دەعوەتی سەرۆک وەزیرانی هێرەم بەخواردنەکەی کردبوو، سفرە هەرگیراو چایە ڕێزکرا، وەختەکی کوڕەکەم ئیشارەتەکی دامێ، تێگەیشتم دەرێ داکم دەرێ وەرە ئیشم پێتە..! دووسێ قولوەڵلاو قول ئەعوزوم خیندو یەک دوو جار پفم لەخۆم کردو چووم، دوعام دەکرد لەناو مێوانان نەیتەقێنتەوەو نەبتە هەرا..دەڕۆیشتم و لاقم تێک دەئارا ! چوومە ئەودیوی، دیتم لەسە کورسیەکی دانیشتیەو تەبلەکی گچکەیان لەپێش دانایەو قاپە گۆشتاوەکی گەورەی لەپێشەو دەوی تێنەدایە..! چاک و چۆنیم لەگەر کردو دەستپێشخەریم کردو گۆتم : دەتانی لەسە پێیان بڕۆی، چونکە سبەینێ دەبی بچینە بازاڕی و سەرەکی لەناو قەیسەری بدەین ! بڕەک بێدەنگ بوو و گۆتی : ئەو قەیصەڕی لۆ ؟ گۆتم : دەبی بچینە کن حاجی موحسینی زێڕنگرو شەش تاک بازنی زێڕی دەرەجە ئێک و قایشەکی پشتێت لۆ بکڕم، لەمێژە ئەوخەفەتەم لەدریە کەپێم نەکرایە لۆت بکڕم..! بەینەکی داماو دیتم بەعەستەم زەردەخەنەکی هاتێ، لەدری خۆم گۆتم : تەواو، زێڕی گەواد هەتا بەبەردی ڕادەگا ژنیش نەرم دەکا..!
پاشان گۆتی : وەڵلا ئەو زێڕ نەموشکیلە، بەس ئەو وەزاڕەت زۆڕ خەڕاب، یەعنی س، وەزاڕەت زن ئەتوو خواڕدی ئەو سووند، وەڵلا ئەمن ئەوە ناوێ، لازم ئەو بێت تەغیڕ..! ئەمن نازانی ئەو س کەر داتوو ئەو وزارەت..!؟ گۆتم : حورمێ، خۆ ئەو ئیشە بەدەستەمن نیە، جەنابی سەرۆک وەزیران ئەو بڕیارەی دایەو ئەو گۆتی دەبی وەریگری و هەربەتوو دەکرێ..! لۆ ئەتوو وەتێدەگەی ئەمن حەزم لەو وەزارەتەیە..! کوڕەکەم لەولای ڕاوەستابوو : گۆتی : وەڵلا بابە مەیگۆڕەو بیکە، وەزارەتی زۆر خۆشە، ئەمەش لەپەنای توو دەکەوینە ناوێ..! گۆتم : ئەتوو دەتانی دەوت تێکنێیوو بێدەنگ بی..! کوڕەکەم دیسان قەوانی لەمبەرگینی لێداوە..! گۆتمە داکی : جارێ مێوانمان هەیەو دوایێ قسەی لێدەکەین، ئەگەر دریشت هەر قرت و فرتی دەکا، ئەوە ئەمن دوایێ لەگەر سەرۆک وەزیرانی قسەی دەکەم و بەشکو وەزارەتەکی دیم بداتێ..! کوڕەکەم سەری لەبنگێی نام و گۆتی : نەکەی غەرەتی وابکەم، هەموومان پاروومان کەتتە ڕونی، ئەو ڕزقەی لەدەستەخۆت مەدە..!! داکی توڕەبوو، گۆپاری لێ برند کردو گۆتی : اسکت انت حیوان، لاتتدخل بهای المسائل (وسبە حەیوان، خۆت تێکەری ئەو مەسەلانە مەکە)..!!
هەستام چوومەوە ئەو دیوی، جەماعەت هەمووی لەبەرم قیت بوونەوە، گۆتم : دانیشن ڕەحمەتی خواتان لێبی، دانیشتم و چایەکی گەرمیان لەپێش دانام، چایەم تێکداو جەعۆ کۆتر باز بەخۆو بە جۆتە کۆترەکی بە ژۆرێ کەت، بێ سەلام و کەلام گۆتی : گدۆی برام، چما ئەوە بەڕاستیت بوو، لەناوەندی مەجریسێ دەستی بەقوون بادانێ کرد، مام عەوڵاش چەپرەی لۆ لێدەداو دەیگۆ : وەڕ وەڕ وەڕ وەڕ..! گۆتم : وەرە دانیشە وەرە، وەختی هەندێ نیە، گۆتی : سووندم خواردیە دەبی نۆزدە ماچت لێبکەم، گۆتم : مەیکە مەسەلەی ئەبوسەباح و حەسەن زیرەکی..! جەعۆ کۆترباز هات و وازی نەهینا هەتا نۆزدە ماچی لێنەکردم..! مام عەوڵا قۆری گرت و لایدا لایەکی و گۆتی : دەهێوەڕوو هەی سەی پیس..!
وەلحاسر جەعۆ دانیشت و زانی ئەمن بوویمە وەزیر، بەران تەئکید نەبوو ناوم نووسیە لۆ سایەقی یان نا، لۆیێ لەفرسەتەکی دەگەڕا پێم برێ، بەران کەس مەجالی نەدەدا..! ئاخیری خۆی نەگرت و بەئیشارەت پێی گۆتم، هەردوو دەستی بادەداو تەماشای منی دەکرد، وەکی برێی سووکانی تڕومبێلی بادەداو دەیپرسی ناوت نووسیمە لۆسایەقی یان نا ! چاوەکم لێقووچاندو سەرەکم لۆ لەقاند، تێگەیی کەوا ئیشەکم لۆ کردیە، لەخۆشیان وەختبوو بفڕی، دەموو دەست هەوایەکی چووە کەپووی و لەسە لاگوونەکی پاریداوە، ئەننەما موهیم بووەو کابرا بوویتە سایەقی وەزیری..!
گۆتم : جەماعەت نانی لۆ جەعۆی بینن، ممکینە برسی بی، گۆتی : ئەزیەت مەخۆن، پێشی بێمە ئێرە، چوومە تەعجیلی، سێ چار کێشکەی کورای و کۆترەک و گاپەڕەکم ئاواکرد..! خەلۆ پاسکلچی گۆتی : ئەی بەسندان و ڕەششاوت بی، خوێڕی چەند جارم گۆ بێی من نەچی..! جەعۆ گۆتی : کەرە، ئەتوو ئەوڕۆ لەسایەی سەری وەزیری هەنکی یەک کەرت جەرگ و ناو خواردیە، چگێت لە کێشکەی کورایە..!!
هەتا درەنگی شەوێ دانیشتین و قسەی خۆشمان، وەختەکی مام عەوڵا گۆتی : دەوجە با هەستین جەماعەت، جەنابی وەزیر ماندیەو سبەینێ دەوامی هەیە، دەبی سبەینێ زوو هەستی و بچیتە وەزارەت، گۆتم : کاکە دەنگۆ پێم برێن پارەی ئەو مەسرەفەی کێ دایتی، بابیدەمەوە ! مام عەوڵا خۆی توڕەکردو گۆتی : وەڵلا وەبیللا جارەکی دی ئەو قسانە بکەی بەینی من و توو فت..! خەلۆ گۆتی : مام عەوڵا با جەنابی وەزیر بدا، خۆ لەگیرفانی خۆی نایێتە دەرێ، پارەی عوکمەتیە، وەڵلا پارەی عوکمەتیش لۆمە عەرارەو وەکی گەزۆو مازۆی وایە..! ئەو بلۆکەی خەلۆ پاسکلچی ڕایوەشاند لەتەنگەی دام، بەران بەسەخۆم نەهینا..! مام عەوڵا وەکی گێی لەو قسەی بوو، گۆتی : جەنابی وەزیر دوایێ دوایێ، جارێ وەختی هەندێ نیە..! وەڵلا جەماعەت هەموو قیت بوونەوە و دۆقەیان لەگەر دەکردم و سەریان لەبن گێی دەنام و دەیانگۆ : چاوەکت لە عەریزەکەی منبی، ئەمنیش زەردەخەنەکم دەکردو دەمگۆ : خەمتان نەبی..! جەعۆ دۆقەی لەگەرکردم و بەسەبری پێمگۆ : سبەینێ سعات حەفت و چارێگ لەپێش دەرکەی ئامادەبە، گۆتی : خەمت نەبی، نوێژی سبەینێ دەکەم و دێم..! گۆتم : ئێجگار ئەوهاش نا، خەومان لێ حەرام کەی..!!
خواحافیزیان کردو ڕۆیشتن، چوومەوە لای داکی ئەحمەدی و کەتینەوە حەفت و هەشتی گۆڕینی وەزارەتەکەی، هەتا نیوەی شەوێ قسەمان کردو نەگەیشتینە هیچ، گۆتم : جارێ بابنووین و ئیشاڵلە دوایێ قسەی لێدەکەین، باشبوو قەناعەتی کردو نووست..!
سبەینێ هەستام نوێژم کردو بڕەک خۆم بەهەدیقەی خافراند، نانی بەیانیان داناو یەک دوو پارووم خواردو لەدەرکەی درا، کوڕەکەم چوو کردیەوەو هاتەوە گۆتی : بابە جەعۆ دەبدەبەیە ! گۆتم : کوڕم جارێ سعات شەش و نیوە، جەعۆ لەچ دەگەڕێ، یان ئەویش وەکی توو ئەوشۆ لەخۆشیان خەوی لێنەکەتیە..! کوڕەکەم گۆتی : وەڵلا دەنا م
گۆتی : وەڵلا برێم چ، وا لەگە جەعۆی ڕاوەستایەو چاوەڕێ دەکەن ئەتوو بچیە دەرێ..! گۆتم : وەڵلاهی ئەمن وەعدم بە مام عەوڵای نەدایە دایمەزرێنم لەکنەخۆم، تێناگەم لۆ هاتیە، جەعۆ قەیدیناکا، چونکە کردیتمە سایەق..! کوڕەکەم گۆتی : ئەرێ دەبەر سێبەرەکیش لۆمن ببینەوە، ئاخر کوو دەبی ئەتوو بچیە وەزارەت و ئەمنت لەگە نەبی !؟ گۆتم : ئەوها بڕوا ئەنگۆ ئەمن بەدر کردن دەدەن لەو وەزیراتیەی، ئاخر ئەمن هێشتا دەوامم نەکردیە، ئەنگۆ وەکی مێروستانی تێموەرهاتینە..! گۆتی : وەڵلا دەنا ئەمنیش وا خۆ دەگۆڕم و دێم ! گۆتم : نا کوڕم نا، جارێ با ئەمن بزانم مام عەوڵا چیدەوێ، پاشی وی حسابەکیش لۆ توو دەکەم..!
سعات بووە حەفت و شتەک چوومە دەرێ، هەتا گەیشتمە دەرکەی ممکینە جەعۆو مام عەوڵا دەجار جەڕەسیان لێدابی..! وەلحاسل چوومە دەرێ و سەلامم لێکردن، دیتم مام عەوڵا کلاشینکۆفەکی بەملی وەکردیەو لەگە جەعۆی ڕاوەستایە..! جەعۆ گۆتی : ئەوە وەختە دێیە دەرێ، ئاخر وەزیراتی کوو ئەوها دەبی ڕەحمەت لەبابت، گۆتم : کوڕم دەوام سعات هەشتە، ئەتوو لە شەش و نیوەوە چدەکەی لەپێش دەرکەی ! گۆتی : وەڵلا ئەمن نوێژی سبەینێم کردیەو نەنووستیمەوە، چار پێنج جار دەرکەم کردتەوەو هاتیمە دەرێ، هەر چاوەڕێبووم گلۆپی مەتبەخێتان پێبی بێم لەدەرکەی بدەم، گۆتم : ئێ کەرە خۆ ئەمە عەمەلەی سەببەی نینەو ناچینە ئیشی خەباتەی، هەتا لەگەر مەلا بانگدانێ بڕۆین..!
مام عەوڵا هاتە پێش و گۆتی : وەختی هەندێ نیە جەنابی وەزیر، واز لەو کەرەی بینە (دەرکەی لۆ کردمەوە) و گۆتی : فەرموو سواربە بابڕۆین..!! گۆتم : مام عەوڵا ئەتوو کێوە دێی ؟ گۆتی : ئەتوو کێوە دێی چیە، کوو درم دێ ئەتوو بەتەنێ بنێرمە دەوامێ، ئەتوو ئێستا وەزیری و دوژمنت زۆر دەبی، دەبی وەکی ئەو چاوانەی خۆمان بتپارێزین، باشە کێ دەرێ لەوسەری کۆرانێ لۆت دانەنیشتینە بتکوژن، یان بتڕفێنن !! گۆتم : کورە مام عەوڵا سلاوەتەکی لێدە، لەخوای بەزیادبی دنیا ئەمن و ئەمانەو چ لەگۆڕێ نیە، کێ ئەمن دەکوژی یان دەمڕفێنی..! گۆتی : هەونکە ئەتوو دەزانی یان ئەمن، قابیلە ئەمن ئەو ڕدێنەم بەلاش لەبەر هەتاوێ سپی کردیە، سوار بەو درەنگە بابڕۆین..!!
هەرچەندی هینام و بردم فایدەی نەبوو، بەناچاری سواری تڕومبێلی بووم و لەپشتەوە دانیشتم، مام عەوڵا چوو لەپێشەوە دانیشت و کلاشینکۆفی لەکۆشی دانا، جەعۆش بەسمەی تڕومبێلی داگرت و بە ئیش کەت، گۆتی : قوربانی ئەو دەنگەت بم لەزگز، دەرێی دەنگی زولێخا وەلیە..! جەعۆ گێڕی گۆڕی و گۆتی ئەڵلا بەناوت، بەتەنناش هەستاو پێی لێنا، گۆتم : جەعۆ هێواش باژۆ، یەکەم ڕۆژمانە و بەپەلەکمان دامەدە ! گۆتی : ئەو تڕومبێلانە لۆیێ دروست نەکرایە لەسەر هێلکەی باژۆی، چەندی پێی لێنێ زیاتر کەیفی پێدێ و دەکرێتەوە..! مام عەوڵا گۆتیە جەعۆی : گێبدەمن کورە، نەیکەیە فشقیات و بەپیاوانە باژۆ، نەچی بەسە ڕەسیف و مەسیفی بکەوی، یان بشکێنیەوە سەر تڕومبێلان، لەدەوامێش پیاو دەبی و ئەولاو ئەولای ناکەی، خاسەتەن ئەو وەزارەتەی خۆمان، ممکینە پڕی ژن بی، ئەوجە ئی خڕو پڕو دەرەجە ئێک..! وەکی مام عەوڵا ئەو قسانەی دەکرد ئەمن وەزارەتم لێببووە ئەنتالیا، وامدەزانی ئەمن لەسە بەحرێ پیاسەی دەکەم و ژن هەمووی بە تیلمە پەڕۆکەکی ڕاکشاینە هەتا ڕۆژ لێیان بدا..! جەعۆ لەخۆشی ئەو قسەی هەردوو دەستی لە سووکانی بەرداو تووند پێکی داداو لێکی خشاندو گۆتی : قوربانت بم وەزارەت، قوربانت بم خڕوپڕ..! لۆ تڕومبێل لەدەست جەعۆی وەرینگرت و نەڕۆیی لۆسە ڕەسیفی بە زیکزاک، دووجار لەوسەری تڕومبێلی چوومە ئەوسەری و بووە یا ئەڵلا یا ئەڵلا..!!
زولەیخا وەلی : گۆرانیبێژێکی میللی بوو، بەرهەمی زۆربوو لەڕادیۆو تەلەفزیۆنەکان، کۆتایی نۆهەتەکان لەشاری هەولێر لە ڕووداوێکی گوماناوی کۆچی دوایی کرد.
مام عەوڵا هاواری کرد : گدۆ شهادەی بینە، عیزڕائیل مێوانە..! هەربەجارەکی زەندەقم چوو، گۆتم : دەبخۆ دەی ئەتوو کۆتر بازەکی بکەیە سایەقی خۆت هەر ئەوە چارەنووست دەبی، تڕومبێلەکەمان دەچووە ئەوبەرو ئەوبەری جادەی، دەسوڕاو زیڕەزیڕەی تایەی ڕۆژە ڕێیەک دەڕۆیی، خۆم تووند گرتبوو، ترسی ئەوەم هەبوو دەرپەڕم و لەجامی پێشەوە بفڕم، ئەو وەختی لەفەیس بووکی دەیاننووسی : وەزیری کاروباری ژنان لەیەکەم ڕۆژی دەست بەکاربوونی لەجامی تڕومبێلەکەی فڕی، سەتان کەسیش وەکو هەواڵەکی خۆش براویان دەکردەوەو کۆمێنتی خەرکیش لەوێ ڕاوەستی، خوا تۆرەی لێکردەوە..! سوپاس بۆ خواو نەخشەبی لەوانی دی..! گومان هەیە لەمردنی وەزیری کاروباری ژنان..! دەڵێن کێشەی لەگەڵ سەرۆک وەزیران هەبووەو بە پیلانێک لەناویان بردووە..! سەرچاوەک پێی ڕاگەیاندین و نەیوویست ناوی خۆی ئاشکرابکا کەوا ژنەکەی دەستی هەیە لەکووشتنی، چونکە پێی ناخۆش بووە ئەو وەزارەتەی وەرگری، دراوسێکانی وەزیر باسیان کرد گوێیان لە قڕەقڕەکی زۆر بووە لەماڵی وەزیری..!
ئیدی بەو هەواڵە تڕڕووهاتانە سەت جار لەقەبرت دەنێن و دەرت دەینن، ئەمن لەو خەیارانە دابووم لەهیکڕا تڕومبێلەکە دووجار لەجێی خۆی سوڕاو ڕاوەستا، دووجار سەرم بەکووشینی کەت، گۆتم هەردووچاوم دەرپەڕی، مام عەوڵاش دیاربوو ئێک دووجار سەری بەدەشبولی کەتبوو، ئاوڕی لەمن داوەو گۆتی : گدۆ سەلامەتی ؟ گۆتم : ئەگەر ئەوەی ڕوویداو هێشتا مایمەو هەناسەم دێ پێی دەرێن سەلامەتی، بەرێ سەلامەتم..! جەعۆ ئاوڕی داوەو گۆتی : بەویزدانت چشتۆ سایەقم، کووم قورتارکردی گدۆ..!؟ گۆتم : ئەی سندانت لێدا جەعۆ، بەشەرەفت ئەوە قوورتاربوونە، کوڕم ئەتوو لۆ وەدەکەی، ئەوها بڕوا نایێلی معاشەکی بەسافی وەگرین..!
خەرکەکی زۆر لێمان خڕبۆوە و گۆتیان : ئەلحەمدولیللا سەلامەتن، لەخوای بەزیادبی، ئێکەک سەری هینا ناو تڕومبێلی و دوایێ سەری بردە دەرێ و گۆتیە جەماعەتی پێدەچی سەرخۆشبن..! گۆتم : سەرخۆشی چ و حاری چ بابە، وەڵلا سەرمان بچی نوێژمان ناچی..! مام عەوڵا چەکی ڕاکێشاو گۆتی : چ سەگبابەک بوو گۆتی سەرخۆشن !؟ گۆتمە جەعۆی پێلێنێ و قوورتارم کە..! جەعۆ گێڕی گۆڕی و بەتەنناش هەستا، تەئکیدم دووکەر لەهەردوو تایەی تڕومبێلی دەرپەڕیە..! مام عەوڵا گۆتی : نەتهێشت بیکەمە بێژینگ، گۆتم : بابە واز لەو خەرکەی بینە و زوو بمگەیننە وەزارەتی..!
لەڕێیێ بووین سەرۆک وەزیران تەلەفۆنی کرد، وەرامم داوەو گۆتم : فەرموو جەناب ! گۆتی : ئەتوو سەلامەتی ؟ گۆتم : بەرێ بەرێ ئەلحەمدولیللا، ئەوە کووت زانی ؟ گۆتی : تازە حیمایەکانی سەرجادەی، ئەوانەی ئەوبەرو ئەوبەری جادەکان دەگرن هەتا تێدەپەڕم خەبەریان دامێ، گۆتیان : وەزیری کاروباری ژنان تووشی ڕووداوەکی بووە ! ئەمن لەو قسانە دابووم لەگەر سەرۆک وەزیرانی، وەختەکی جەعۆ دەنگی ڕادیۆی فوول کرد، نەئەمن گێم لەسەرۆک وەزیرانی بوو، نەئەو گێی لەمن بوو، ئیشارەتم دا جەعۆی ئەو ڕادیۆیەی نزمکە، ئەو وراغە وایزانی دەرێم زیادی کە، هەر بەجارەکی فوولی کردو بەخۆو بەمام عەوڵای دەستیان بەچەپرە لێدانێ کرد..! سەرۆک وەزیران گۆتی : ئەو دەنگە دەنگە چیە ؟ گێم لەدەنگت نابی..! گۆتم : چنیە جەناب ئەمە سەلامەتین، بەمستان وەرگەڕامە جەعۆی لەپشتەوە، جەعۆ ئاوڕی داوەو تێگەیی دەرێم نزمیکە، باشبوو نزمیکرد..! سوپاسی سەرۆک وەزیرانم کرد کە لەهەواڵی پرسیم و خواحافیزیم لێکرد..!
گۆتمە جەعۆی باشە ئەتوو مێشکت نیە، دەماغت نیە، پێت دەرێم نزمیکە، ئەتوو زیادی دەکەی ! گۆتی : خدربوو خدر..! گۆتم : خدر کێیە ؟ گۆتی : خدری خۆن ڕەعمەت لەبابت، خدر بێگەڵاسی، نەتهێشت ئەو بەندەی تەواوکا..!! مام عەوڵا گۆتی : یەعنی ئەوە سەرۆک وەزیران بوو قسەی لەگەر دەکردی ؟ گۆتم : بەرێ ! گۆتی : ئەدی لۆ باسی منت نەکرد ؟ گۆتم : باسی توو بکەم چبرێم ؟ گۆتی : ڕەعمەت لەبابت بتگۆتبا مام عەوڵاشم لەگەرە..! گۆتم : لۆ سەرۆک وەزیران ئەتوو دەناسی ؟ گۆتی : ناوەڵلا، بەران ئەمن ئەوی دەناسم..! گۆتم : لەکێی دەناسی ؟ گۆتی : لەتەلەفزیۆنی..!! میزاجم بەتەواوی گیرابوو، لۆیێ بڕیارم دا بێدەنگم و چیدی نەیاندوێنم، هەتا دەگەمە وەزارەت..!!
گەیشتینە پێش دەرکەی وەزارەت و جەعۆ دەستی بەهۆڕن لێدانێ کرد، پۆلیسەکان غاریان داو دەرکەیان کردەوەو ڕێزبوون و لاقیان لەعاردی کووتاو دەستیان بەڕمبەڕمبێ کردو تەحیەیان لۆ کردم، مام عەوڵا سەری دەریناو گۆتی : هەلە هەلە، عەمر درێژبن..! جەعۆ گۆتی : ئەو ڕمب و هۆڕو تەعیەکردنە لۆمە بوو ؟ گۆتم : بەرێ..! جەعۆ سوکانی بادا بگەڕێتەوە، گۆتم : کێواچی، ئەوەتێهێ دەرکە ! گۆتی : زۆرخۆشبوو ئەو تەعیە کردنە، دیسان دەچمە دەرێ و دێمەوە، با جارەکی دیش تەعیەمان لۆبکەن..!! گۆتم : باژۆ لۆ پێش دەرکەی وەزارەتی باژۆ، بانێمە خوارێ بتدەمە بەر پێلەقان..!!!
مایتی....[1]