سکرتێرە 46

گۆتم : واز لە ڕسمی بینە، وەختی هەندێ نیە، گۆتی : ئێ باشە با لۆ جارەکیدی بی، گەیشتینە ڤی ئای پی مەتاری، لەتڕومبێلی هاتمە خوارێ و چوومە ژۆرێ، سەرۆک وەزیران و کۆمەرە وەزیرەک لەوێبوون، هەموو بەکزی دانیشتبوون، سەلامم کردو وەرامیان دامەوە، کورسیەک لەلای ڕاست بەتار بوو چووم لەوێ دانیشتم، کەتمە بەینی وەزیری کارەباو وەزیری شارەوانی، بەخێراتنیان کردم و وەرامم دانەوە، سەرۆک وەزیران زۆر بێ تاقەت بوو، سەرم لە بن گێی وەزیری شارەوانی نا، گۆتم : سەرۆک وەزیران بێتاقەت دیارە ! گۆتی : بێتاقەتیەکەی لۆ ئەو کارخانچیەی نیە کەمردیە، گۆتم : ئەدی لۆ چیە ؟ گۆتی : ئەوە دوو وەزیر لەتڕی سەی بچن، دەترسێ ئەو وەزعە بەردەوام بی و کابینەکەی فەشل بینی ! گۆتم : ئەوجە کیها کابینەمان سەرکەوتوو بووە، هەتا ئیووی بە فاشیل دابندرێ، گۆتی : وسبە، وا تەماشامان دەکا، گۆتم : ئەی هەناوت بپسێ، بەس ئەتوو بەمن برێ کەنگی مردیەو مەیتەکەی کەنگی دەگا ؟ نەوێرا وەرامم داتەوەو قۆرەکی لە قۆری دام یەعنی بێدەنگ بە، بەچاویش ئیشارەتەکی دامێ..! ئاوڕم داوە لۆلای سەرۆک وەزیرانی دیتم تەماشامان دەکا، سەرۆک وەزیران گۆتیە من : دەرێی پرسیارت هەبوو ؟ گۆتم : ئەرێوەڵلا ئەوە جەنابی وەزیر کوو مردیەو کەنگی مەیتی دەگاتەوە ئێرە ؟ گۆتی : وەڵلا ڕەحمەتی هەر گەیشتبووە خەستەخانەی لە ئەستەنبۆڵ تەواو ببوو، مەیتەکەشی وا لەڕێیێیە، لەوانەیە نیوو سعاتی دی بگا، گۆتم : لەسەر خێران خوا سەبری مارو منداری بدا، گۆتی : خوا سەبری خاک و نیشتیمانمان بدا، دەزانی چ قارەمانەک بوو، ئەوڕۆ سەرکردەکی گەورەو پیاوەکی زاناو دڵسۆزەکی لێهاتوومان لەدەست دا، جەماعەت لەترسی پێکەنینێ زۆربەیان کلینسیان بە دەوویان وەنابوو، دەترسان ئێکەک برێ : خخخخخ و هەموویان بتەقنەوە..!
دەوری سێ چارێگی تێپەڕی، جاحێرەک هات و سەری لەبن گێی سەرۆک وەزیرانی ناو خوندە خوندەکی کردو ڕۆیشت، سەرۆک وەزیران قیت بۆوەو ئەمەش هەموو قیت بووینەوە، گۆتی : بابچینە دەرێ، دیارە تەیارەکە گەیشت و وا تەرمی ڕەحمەتی دەیننە خوارێ، ئیدی ئەو بەپێشکەت و ئەمەش بەهێواشی لەدووی دەڕۆیشتین، وەزیری ئاوەدان کردنەوە کەتە تەنیشتە من، گۆتی : کوو لە وەزعەکەی دەگەی ؟ گۆتم : وەزعی چ ؟ گۆتی : ئەو وەزعەی ئێستا ؟ گۆتم : وەڵلا بەس خەمی مارو منداریمە ! گۆتی : خەمی وانت نەبی، زانیتیان لەسەر چ کوژرایە، نە ژنی نە مندارەکانی چشتاقیان ئامادە نەبووینە بێنە پێشوازی مەیتەکەی، هەزار تف و لەعنەتیان لۆ ناردیە ! گۆتم : یەعنی کەسی نەهاتیە ؟ گۆتی : با، خوشک و برایەکانی هاتینە لەگەر هەندە خزمی، گۆتم : ئا ئێ ئێ، وەڵلاهی ناخۆشە پیاو لەسەر چشتەکی قۆڕ بمری، حەیاشی دەچی، گۆتی : خەمت نەبی، دەیکەنە یەکەم نیشتیمان پەرەوەر و دەیان شیعرو وتاری لۆ دەنووسن و لەسەر قەبرەکەشی دەخیننەوە..!
گەیشتینە کن تەیارەی و مەیتەکەیان هینا دەرێ، لە ناو دارەبازەکی بوو، عەلەمەکی گەورەشی لێ لوول درابوو، کۆمەرە جاحێرەک بەجلکی سەربازی لەولاو ئەولای دەرکەی تەیارەی ڕاوەستابوون، تێکڕا تەحیەی عەسکەریان لۆ کردو بەڕێکی ڕاوەستان، ئەوجە دارەبازەکەیان وەرگرت و هێدی هێدی خۆیان سوڕاندو دەستیان بە جوولەی کرد، سەرۆک وەزیران چووە لای ڕاستی دارە مەیتەکەی و شانی دابەرێ، وەزیرەکان زۆربەی غاریاندا خۆ بگەیننە بن دارە بازی، بەران نەگەیشتنێ، لۆیێ دەستیان درێژ کردبوو لۆ دارە بازەکەی..
دارە بازەکەیان هاویشتە ناو تڕومبێلەکی درێژ، تڕومبێلی سەرۆک وەزیران و وەزیرەکانیش لە دوو ئێک هاتن، تڕومبێلی منیش هات و ئەمنیش سوار بووم، ئیدی سەبر سەبر لە مەتاری چووینە دەرێ و بەرەو قەبرستانی بەڕێکەتین..

هوردە هوردە دەڕۆیشتین، مام عەوڵا گۆتی : ئەڵلا زاتی هەق، هەر ئەتوو باقی، هەر هەمووی دەڕوا، پاشا یان وەزیر، سوڵتان و گزیر..! جەعۆ گۆتی : لۆ ئەتوو بەتەمای نەڕۆیی، وای دەنا پێشی من بمردبای، وەبی بەو دوو دەستانەم شۆڕت کەمەوە ناو قەبری ! ئەوجە خۆت بگرە لەو دنیای کوو بەکووتکان تەقڵەت پێ لێدەدەن ! مام عەوڵا گۆتی : دیسان گووت تێکرد، وەملێهاتیە لەبەتوو گووەکی نەخۆم ! جەعۆ گۆتی : وەڵلاهی بە کەیفی خۆت بخۆ، ئەگەر قسەم کرد ئەو سمێرە لەپیاوان نەهاتیە..! گۆتم : کاکە دە بێدەنگ بن ئەی هاوار، ئاخر ئەمە وا دەچینە سەر قەبران..! باشبوو هەردووکیان بێدەنگ بوون..!
گەیشتینە سەر قەبران و هاتمە خوارێ، چووم لەڕێزی وەزیرەکان ڕاوەستام، دیاربوو قەبرەکەیان تەواو کردبوو، کابرا هاواری کرد : ڕەحمەتی بینن، با شۆڕی کەینەوە..! کۆمەرەک غاریانداو مەیتەکەیان هینا، کۆمەرەکیش خەریکی سێلفی گرتنی بوون لەگەر مەیتەکەی، کامیراو پەیامنێری تەلەفزیۆنەکان ئەو ناوەیان پڕکردبوو، وەزیری پەروەردەی لە تەنیشتە من بوو، سەرم لەبن گێی ناو گۆتم : باشە ژن و مندارەکانی لەکێیان زانی لەسەر ئەو وەزعەی کوژرایە ؟ خۆ ئەوان لەگەریبوون لەناو تەیارەی ؟ گۆتی : نازانم چ سەگبابەک لەناو تەیارەی پێش ئەوەی تەیارەکە بفڕی لەدەوی دەرچووبوو، گۆتبووی : نەکەن لە مێردی ئەو سکرتێرەی خۆشبن کە ئەوهای لەبابتان کردیە، قسەک لەوان، قسەک لەوی، ڕاست کەشف ببوو، ئیدی یەکپێ لەناو تەیارەکەی هاتبوونە خوارێ و لەگەری نەچووبوون لۆ تورکیای..! گۆتم : ئا ئێ ئێ، ئێستا تێگەیشتم..!
مەیتەکەیان شاردەوەو خۆریان بەسەر داکرد، سەرۆک وەزیران خاکەناسەکی وەرگرت و بەدەستی خۆی خۆری بەسەر داکرد، وەزیری بازرگانی گۆتیە من : ئەوها بڕوا سەرۆک وەزیران ئێک ئێک لەبن خۆرێمان دەنێ ! گۆتم : ئەرێ سەت دەفتەرەکەت نەدیتەوە، ئەوی سکرتێرەکەت لێی بردی !؟ بەینەکی تەماشای کردم، ئەوجە گۆتی : ئەوەت لەکێ زانی ؟ گۆتم : ئەوڕۆ هیچ چشتەک ناشاردرێتەوە ! گۆتی : ئەو سکرتێرەم دەگگەکی خراپی لێدام، وەی ئەگەر دەیبینمەوە، دەبی بەو دوو دەستانەی خۆم بیخنکێنم ! گۆتم : ئاسان نیە بیبینیەوە، گۆتی : یاڵلا دەی، نەشیبینمەوە بایی هەندێم گەوزاندیە ! گۆتم : ماخران وا لەسەر قەبرانین..! گۆتی : دەی دەی خوا کەریمە..! ویستم تێیبگەینم خوا لۆ کێ کەریمە، مەلا دەستی بە تەلقینی کرد، گۆتی : گێبدەنە من خەرکینە، تەلقین لۆ زیندیانە ئەوەل جار، تازە ئەوە مردو ڕۆیی، دەوجە بگەڕێنەوەو لە خوای بترسێن، وەڵلا ئەوە جێتانە، پاشابی، سوڵتان بی، وەزیربی، ئەندام پەرلەمان بی، هەر دەمری، بەتەمای لەبە مردنێ هەرێی هەی قوڕ بەسەر، لۆکێی خڕ دەکەیەوە، هیچ چشتەک لەگەرت نایێ، نە پارە، نە زێڕ، نە بۆڕیە نەفت، نەڕێزە تڕومبێل، بەوەی دەنازی حاکمی ئەو وراتەی، دەوجە وەکی چوویە بن گری (گڵ) جوابی ئەو خوایەی بدەوە، نە حیمایە نە چەکدار، نەکورسی و نە دۆلار، لەگەرت نایێین..! تەماشام کرد سەرۆک وەزیران و وەزیرەکان و ئەندام پەرلەمانەکان نیوچەوانیان وێک هاتبۆوە، ئەعسابیان نەمابوو، لەهەمووی عەججایبتر مەلایەکە زوو زوو دەستی هەردەشەقاند لۆلای سەرۆک وەزیران و سەرۆک پەرلەمان و مەسوولەکانی دی، وەزیری کارەبای سەری لەبن گێی نام، گۆتی : وەڵلا وەبیللا مەلا نامووسی بردین ! چدەنگم نەکرد، گۆتی : پێدەچی ئەو مەلایە ئیسلامی بی !؟ گۆتم : وەڵلا برێم چ، ئەوە یەکەم جارە دەیبنم، مەلا بەردەوام بوو لەسەر قسەکانی، سەرۆک وەزیران بە تیی چاوی تەماشای وەزیری ئاوقافی کردو پێی گۆ : چارەی وەزعەکەی بکە..! ئەویش بە مڕومۆچی و بە ڕووەکی زۆر گرژ گۆتیە مەلایەکەی : مامەستا تەواوی کە درەنگە !
هەرکووی هەبوو مەلایان بێدەگ کردو وەزیری ئاوقاف گۆتی : بەڕێزان، ئێستاش سەرۆکی ئەنجومەنی وەزیران بەو بۆنە خەمناکەی وتارەکتان پێشکەش دەکات..!

سەرۆک وەزیران بڕەک هاتە پێش و کۆمەرە مایکەکیان لەپێشی قیت کردەوە، هەندەک لە وەزیرەکان بەخۆیان مایکیان لۆ ڕاگرتبوو، سەرۆک وەزیران بسمیللای کردو گۆتی : ئەوڕۆ ئەمە لێرە قارەمانەکمان بەخاک سپارد، پیاوێک هەم سیاسی بوو، هەم سەرکردەبوو، هەم زاناو دانابوو، ڕۆژگارەکی ڕەش و تاری بینی، هیواو ئاواتی سەربەرزی و سەرفیرازی خاک و نییشتیمانەکەی بوو..! بخەوە ئەی پیاوی مەرد، ئەی قارەمان، هاوڕێکانت پەیمان دەدەن بەردەوام بن لە خەباتی تۆ، کۆڵ نادەین و واز ناینین، دڵنیاش بە خینت بەفیڕۆ ناچی..! بەڕاستی ئەتوو پیاوەکی ڕۆشنبیر بووی، چەند حەزت لە خیندنەوەی بوو، هەمیشە کتێبەکت لەگیرفانی بوو، هەموو جارێ دەتگۆ : ئاواتم ئەوەیە خزمەتی هاوڵاتیانی خۆمان بکەم و شەوو ڕۆژ کار بکەم...! ئەمن ئاوڕم داوە لای ڕاستم، دیتم وەزیری ئاوقاف مەلای ڕاگرتبوو، بەتووندی قسەی لەگەر دەکردو چاوی لێ سۆردەکردەوە، چوومە پێش و گۆتم : خێرە ئەوە ؟ وەزیری ئاوقاف گۆتی : گێت لێنەبوو چیدەگۆ ! ئەوە جێی ئەو قسانەبوو ئەو مەلایە کردی، وەتێدەگا ئەمە هەموو کافرو زندیقین ! مەلا گۆتی : وەڵلا هیچ قسەی خراپم نەکردیەو هەق کووە ئەوهام گۆتیە، ئەوە لەباتی چاکەی، قەبرو قیامەتتان بەبیر دەینمەوە، دێی گەفم لێدەکەی !؟ وەزیری ئاوقاف گۆتی : لەباتی دوعای خێر لۆ ئەو مردیەی بکەیی و برێی خوایە لێی خۆشبی، دێی سەرو دری سەرۆک وەزیرانی دەگری..!؟ گێبدە من ؛ وەکی ئەو مەراسیمە تەواو بوو، دێی داوای لێبوردن لە جەنابی سەرۆک وەزیرانی دەکەی و دەرێی غەرەتەک بوو کردم ! مەلا گۆتی : وەڵلا وەبیللا لەسەرم بدەی داوای لێبوردن ناکەم، هیچ غەرەتەکم نەکردیە هەتا داوای لێبوردن بکەم و بەردەوامیش دەبم لەسەر قسەی هەق..! وەزیری ئاوقاف گۆتی : دە باش بزانە، ئەوە ئاخیر وتارت بوو دات، وتاری لە مزگەفتێ ناخینیەوەو پێش نوێژیش ناکەی، دەتانی بچیە مزگەفتێ لۆ نوێژ کردنێ، سبەینێش دێیە ئاوقافی و لیژنەی تەهقیقیت لەسەر تەشکیل دەکەین، بەتۆمەتی پشتگیری کردنی ئیرهاب و هاندانی گەنجان لۆ بوونە ئیرهابی..! گۆتمە وەزیری ئاوقافی : ڕەحمەت لە بابت، ئەتوو ئیشەکەی لۆ ئەوها گەورە دەکەی، کابرا خۆ کوفری نەکرد چار قسەی خێری کرد ! گۆتی : کاکە ئەو چار قسە سەری من دەخوا، خوا بزانی جەنابی سەرۆک وەزیرانی چم لێدەکا و کوو لەقوڕگم دەردەینی، تەئکید بە دوایێ گازم دەکاو دەرێ : مەلا بڕا بوو بێ تەلقینی بدا، ئەوە نەبی..! گۆتم : وەڵلا وەبیللا ئەوەی ئەنگۆ دەیکەن غەرەتە، ئێ بابە ئەنگۆ دەوی خەرکی قەپات کەن ئەدی خەرک چبکا، خۆ بە قوونی قسەی ناکا..! واز لەو مەلایەی بینە، ئەگەر سەرۆک وەزیران چیگۆ، ئەمن قسەی لەگەر دەکەم، وەزیری ئاوقاف گۆتیە مەلایەکەی ئەتوو جارێ بڕۆ..! مەلایەکە ڕۆیی و ئەمن و ئەویش گەڕاینەوە جێی خۆمان و گۆتیە من : ئەتوو کوو دیفاع لەو مەلایەی دەکەی، ئەوانە گورگن لە پیستی مەڕی..! ویستم وەرامی بدەمەوە، سەرۆک وەزیران گۆتی : سوپاسی ئامادەبوونتان دەکەین هەربژین و سەرکەوتووبن..! ئیدی ئێکەک بەدەنگەکی برند گۆتی : هەدیەتەنەلفاتیحە..! هەموومان فاتیحەکمان خیندو سەرۆک وەزیران و ئەمە دۆقەمان لەگەر خزم و کەسی وەزیری کردو بەجێمان هێشتن، هەر کەسەو چۆوە لای تڕومبێلی خۆی..!
گەیشتمەوە کن تڕومبێلی، مام عەوڵا دەرکەی لۆ کردمەوەو گۆتی : فەرموو گەورەم..! سواری تڕومبێلی بووین و بەڕێکەتین لۆلای مارێ، لەڕێیێ لاماندا مزگەفتەکی و نوێژی مەغریبێمان کرد، پاشان بەڕێکەتین، جەعۆ ئاوڕی داوەو گۆتی : گدۆ برسیت نیە ؟ گۆتیم : لۆ دەپرسی ؟ گۆتی : وەڵلا گۆتم بچین لێدەین لە سەرو پێچکی..! مام عەوڵا گۆتی : ماشەڵلا تەکبیری قۆڕ قۆڕ دەکەی، وەختی سەرو پێچکیە هەی تووخمە سە، یان عەزت لێیە بەکووشتنمان بدەی، ئوستاج بەگێی ئەو سەیەی مەکەو با شۆڕبینەوە لۆلای مارێ، لەوانەیە ئەوشۆ میرۆ بێ سەرەکم لێدا..! گۆتم : میرۆ کێیە ؟ گۆتی : میرۆی برام، ئەرێ ئوستاج ئەتوو دەبزانە بەر سێبەرەکی لۆ میرۆی برام نابینیەوە، خۆڕی خۆڕی دەسووڕێتەوە، بەشکوو تەعینی بکەی و ببیتە پیاو..! گۆتم : مام عەوڵا کا تەعینات، تەعیناتیان هێشت، هیشکیان کرد هیشک ! گۆتی : ناچارم دەکەی بە ست زولەیخای برێم، تەئکیدم ئەو پێی دەکرێ، مەسوولی گەورە دەناسی..! جەعۆ ئەعسابی نەما، گۆتی : هەونکە ئەگەر خۆم لەو تڕومبێلەی فڕێ دەدەم، دەبمە باعیسی نەفسی خۆم و جێم بیئسەلمەسیر دەبی..! گۆتم : سڵاوەتەکی لێدەن باشترە..!

گەیشتینەوە لای مارێ، ئەمن دابەزیم بچمە ژۆرێ، مام عەوڵا گۆتی : مەڕۆ ! گۆتم : لۆ ؟ گۆتی : میرۆ هات، عەزی لێیە سەلامەکت لێبکا، گۆتم : بابێ میرۆش بێ، باپێڕەکە تەواوبی، چونکە بەس لە میرۆمان کەمە..! وەختەکی میرۆ هات، میرۆ چ میرۆ، زەلامەکی کەتەو گەورە، شەروارەکی بلوری لەبەربوو، لەبەینی سی و چل ساری دەبوو، دەستی درێژ کرد لۆ دۆقەی، دیتم دەستی هەموو کووترایە، گەڵبەکی گەورەی لێکردبوو، تیرەکیشی لێدرابوو، لەبن تیرەکەی نووسیبووی : ئاخ پەروین..! دۆقەم لەگەر کردو دووسێ ماچی لەولاو لەولای کردم، گۆتی : ئەمن میرۆی خزمەتکارتم، ئەمرکە بەشەوەی کێت لۆ بکوژم، ئاگری لەماری کێ بەردەم ! گۆتم : وەڵلا میرۆ نەزەلامم لۆ بکوژەو نەماری خەرکیشم لۆ بسووتێنە، خێرت دەگاتێ تووشی گێچەرانم مەکە ! گۆتی : لەوەی گەڕێ، سبەینێ سعات چەند بێمە دەوامێ ! گۆتم : دەوامی چ ؟ میرۆ تەماشایەکی مام عەوڵای برای کردو گۆتی : حەوڵا، چما ئەتوو بە وەزیرۆکێ مەت نەگۆتیە !؟ مام عەوڵا گۆتی : کورە میرۆ، ئەتوو کەنگی لە مەڕعەلەی کەراتی دەردەچی و دەبیە پیاو، کوڕم خۆ تەعینات فشەخانە نیە، کیتابوونا کیتابووکوومی دەوێ، جارێ ڕاوەستە، هەتا موافەقە دێتەوە، هەنگی خەبەرت دەدەمێ، ئەتوو وەتێدەگەی ئیشی عوکمەتی تەڕەتوولە فرۆشتنە..! ئەوجە مام عەوڵا ڕووی لەمن کردو گۆتی : ئوستاج دری خۆت تووند مەکە، میرۆ بڕەک کەرە، هەر هەندەی لێدەزانی..! گۆتم : دەی باشە ئەمن دەڕۆمەوە ژۆرێ، خواحافیز..!
چوومەوە ژۆرێ و خۆم گۆڕی و پشووەکم دا، نوێژی عیشایێم کردو مندار هەندە میوەیان لۆ هینام، داکی ئەحمەدی هات و گۆتی : وەڵلا ئەو کوڕ گەوڕە ئەتوو هەیە گلەیی ! گۆتم : یا ئەڵلا خێر، چیە قاتی ژنی ناوێ ! گۆتی : ناوەڵلا، ئەو دەوێ سەیارە..! گۆتم : ئێ باشی واکی پارەم نەبی، ئاخر کەنەبی، بەچ لۆی بکڕم..! گۆتی : وەڵلا ئەو گۆت : باب ئەمن وەزیر، کوو نیە باڕە ئەو سەیارە..! گۆتم : ئێ نازانی بابی دز نیەو ڕاست و چەپ لێنادا، وەڵلا بەتەمای معاشی بی، ئەو تڕومبێلەی ئەو دەیەوێ پێم ناکڕدرێ، ڕاست و ڕاست پێی برێ..!
چووم پارم داوە، هێشتا خەوم لێنەکتبوو، جەعۆ تەلەفۆنی کرد، گۆتم : ها جەعفەر، خێرە خۆ چنەبووە ؟ گۆتی : وەڵلا دەبی هیممەتەکم لۆ بکەی ! گۆتم : هیممەتی چ ؟ گۆتی : بەشکوو بەو کابرایەی لوبنان برێی، شڕفلە کێیە ! گۆتم : شڕبل ! گۆتی : ئا ئا ئەوە، گۆتم : چی پێ برێم ؟ گۆتی : پێی برێی دوو بەبەغای دی سوودانیم لۆ بنێری ! گۆتم : لۆ چتە ؟ گۆتی : وەڵلا وەزیری کشت وکاڵ داوای کردیە ؟ گۆتم : وەزیری کشت و کاڵ داوای لەتوو کردیە ؟ گۆتی : ناوەڵلا سەرۆکی دیوانی ئەنجوومەنی وەزیران تەلەفۆنی لۆ کردم، گۆتی : لەکن وەزیری کشت و کاڵی زۆر باسی بەبەغایەکانم کردیە، گۆتیتی ئیللا دەبی دوو قلانیش لۆمن پەیاکەی، بەشکوو مندار پێ مەشغول دەبن..! گۆتم : ئەگەر ئەو بەبەغایانە سەری نەخواردی ئەمن پیاوەکی خراپم..!
نانی سبەینێم خوارد و بەڕێکەتم لۆ دەوامێ، لەڕێیێ جەعۆ گۆتی : ئەرێ گدۆ، بە شڕفلت گۆ لۆ ئەو چشتەی شەوێ باسمان کرد ؟ گۆتم : نەخێر پێم نەگۆتیە و پێشی نارێم، واز لەو بەزم و ڕەزمەش نەینی نەقرت دەکەم، مام عەوڵا گۆتی : ئەی قوربانی دەست و پەنجەت بم ئوستاج، نەقری کەو فڕێیدە سەر عدوودی، بەشکوو لەسەرمان ڕەق دەبتەوەو دەمری..! لەو قسانە دابووین تەلەفۆنەکم لۆهات، تەماشام کرد بەڕێوەبەری نووسینگەی سەرۆک وەزیرانی بوو، پاش چاک و چۆنی، گۆتی : ئەوڕۆ وەزیری پیشەسازی و وەزیری خوێندنی باڵای تازە دەنگیان لەسەر دەدرێ و سووندی دەخۆن، سەرۆک وەزیران دەرێ حەزم لێیە ئەویش ئامادەبی ! گۆتم : سعات چەندە ؟ گۆتی : یازدە، گۆتم : باشە، ئین شاڵلا دێم..!

گەیشتمە وەزارەت و چوومە ژۆرەکەی خۆم، هەندەی نەبرد گوڵاڵە خان هات و ڤارینیشی لەگەربوو، پاش چاک و چۆنی و ئەحوار پرسینی، دانیشتن و سەرو چایەمان خواردەوە، گوڵاڵە خان گۆتی : هاتیمە لۆ داواکاریەکی و نابی قسەم بشکێنی ! گۆتم : بەس نەرێی ڤارینی بکەوە سکرتێرە ! گۆتی : بەرێوەڵلا لۆ هەندێ هاتیمە، گۆتم : ئەو چشتە لەکنە من کۆتایی پێ هاتیەو جارەکیدی قسەی لێناکەم، گۆتی : ئاخر دەزانی چیە ؟ گۆتم : چیە ؟ گۆتی : ئێستا ڤارین دەنگ و دۆرەکی زۆری لەدووە ! گۆتم : کیژم ڤارین، دەنگ و دۆری چت لەدووە ؟ گۆتی : وەڵلا جەنابی وەزیر هەرکی دەمبینی دەرێ : ئەگەر چشتەکت نەکردبی، جەنابی وەزیر لە نووسینگەی خۆی دەرت ناکا..! گۆتم : ئێ کیژم ئەتوو بەخۆت داوای گواستنەوەت کردیە، بەبیرت نایێ ؟ گۆتی : بەرێوەڵلا، خۆ ئەمنیش بەخەرکی دەرێم، بەران لێم وەرناگرن، هەمووی خەتای ئەو ڕۆژنامە نووسە هیچ و پووچەی بوو، ئەو بەزمەی دروست کرد، گۆتم : ئەویش هەقی خۆی وەرگرت و کەتە حەپس خانەی، پێراوی سەت کەسی ماچ کرد هەتا لێی خۆشبووم، هەر لەو ڕۆژنامەی بووختانی پێکردبووین، داوای لێبوردنی کرد، ئیدی ئەو مەسەلە کۆتایی پێهاتیە، کیژم بڕۆ لەجێی خۆت دەوام بکەو گێمەدە قسەی خەرکی..!
پێشی هەستن گوڵاڵە خان فایلەکی لەپێش دانام، گۆتم : ئەوە چیە ؟ گۆتی : وەڵلا ئەگەر ڕازیبی، گرێبەستی ئەو کارمەندانە تازە کەیەوە، گۆتم : زۆرن ؟ گۆتی : سەت و هەشتا کەسن ! گۆتم : دەوام دەکەن ؟ گۆتی : وەڵلا زۆربەیان دەوام ناکەن بەس وەکی معاش دێ، دێن معاشەکەی وەردەگرن ! گۆتم : ئەدی کوو لۆیان تازەکەمەوە ؟ گۆتی : ئاخر..! گۆتم : ئاخری چ ؟ گۆتی : ئاخر ئەوانە هەموویان خزم و برادەری وەزیرەکانی پێش توو و بەڕێوەبەرە گشتیەکانی ئێرەنە ! گۆتم : خزمی تووشی تێدایە ؟ گۆتی : یەعنی..! بەس جەنابی وەزیر ئەگەر حەزدەکەی ئەتوو کێت دەوێ ئیزافەی کە..! گۆتمە ڤارینی : کیژم ئەتوو بڕۆ دەرێ ! ڤارین چووە دەرێ، گۆتمە گوڵاڵە خانی : کوو ئیزافەی کەم ؟ گۆتی : چما چیە، ناوەکان بەرز دەکەینەوە، تەئکیدم ڕازی دەبن لەسەری، ئوستاز دەتانی ناوی وەهمیش بنووسی و معاشەکان باوێیە گیرفانت و بەخۆت بیخۆی..! گۆتم : چشتی وا دەبی ؟ گۆتی : وەڵلا هەمووی ئەوهایە، هی وایە سەتان ناوی نووسیەو پارەکەی بەخۆی وەردەگری و دەیخوا..! گۆتم : ببورە ئەمن چشتی وا ناکەم و پێم باشە ئەتووش نەیکەی، ئەوە خیانەتە لەپارەو پوولی ئەو وراتەی..! گوڵاڵە خان گۆتی : وەڵلا لە ئەوەلیەوە ئەوها هاتیەو ئەوهاش دەڕوا، قەت چاوەڕێی ئەوەی مەبە ئەو وراتە چاببی، هەتا زووە خۆت پێبگەینەو زوو گۆلی خۆت بکە..! گۆتم : فەرموو ئەوە فایلەکەو ئەمن ئیمزا ناکەم لەسەری، جارەکیدیش ئەو چشتانە لۆمن نەینی..! گوڵاڵە خان بە نابەدری فایلەکەی هەرگرت و چووە دەرێ..!
دانیشتبووم و خەریکی ئیشی ڕۆژانەم بووم، بەڕێوەبەری نووسینگەکەم هات و گۆتی : قوربان تەلەفزیۆنەک هاتیەو دەیەوێ چاوپێکەوتنت لەگەر بکا، گۆتم : پێی برێ تاقەتی چاوپێکەوتن و چشتم نیەو با وازم لێبینی ! گۆتی : باشە بەسەر چاو.. هەستامەوەو چوومە لای پەنجەرەی ژۆرەکەم، تەماشام کرد وا کابرایەک پێمەڕەکی پێیەو عاردی هەدیقەی هەرگێڕو وەرگێڕ دەکا، تەماشام کرد شکلی غەریب نیە، بەران باشم نەدەدیت و نەمدەناسی، چونکە دەوری سەت مەترەکی لەمن دوور بوو، ژنەکی خەپۆکەش لە دیاری ڕاوەستابوو، بە دەستی ئیشارەتی دەدایێ و دیاربوو پێ دەگۆ کوو ئیش بکا، گۆتم : خوایە دەبی ئەوانە کێبن ؟ گازی سکرتێرەکەم کردو گۆتم : کوڕم، نازانی ئەوانە کێنە لەناو هەدیقەی ؟ گۆتی : وەڵلا جەنابی وەزیر پیاوەکە میرۆی برای مام عەوڵایەو ژنەکەش ست زولەیخایە..! گۆتم : باشە کێ بەوانەی گۆتیە بچن ئەو ئیشەی بکەن ؟ گۆتی : وەڵلا نازانم قوربان..! گۆتم : لۆم گازی مام عەوڵای کە، گۆتی : بەچاوان..!
هەندەی نەبرد مام عەوڵا هات، دیار بوو چشتەکی لە دەوی بوو دەیخوارد، چونکە دەوی بادەداو دەیووست واش پیشان بدا، هیچی لەدەوی نیە..! گۆتی : ئەمرکە گەورەم ! گۆتم : وەرە ئێرە کن پەنجەرەی ! مام عەوڵا هات و گۆتم : تەماشا ناو هەدیقەی بکە، مام عەوڵا تەماشایەکی کردو گۆتی : وەڵلاهی ئوستاج زۆر پیس و بێ زەوەرە، پێویستی بە خاوین کردنەوەو ڕێکهێخستنیتی ! گۆتم : لۆیێ میرۆت هینایەو وا پێمەڕەی دەکا ؟ گۆتی : ڕەعمەت لەو داکەی شیری دایێ، ببینە بزانە میرۆ کوو ئەو عەدیقەت لۆ دەکاتە باخچەی مەلا فەندی..! گۆتم : باشە ئەتوو مۆرەتت لۆ زێخەی وەرنەگرت، گوایە ئیمتحانی ئینگلیزی هەیە !؟ ئەدی لۆ هاتتە دەوامێ ؟ گۆتی : بەرێوەڵلا ئیمتیعانی ئەتڵەسی (ئایڵتس) هەیە، بەران لەبە خاتری من و میرۆی هاتیە، بەخۆت نازانی ست زوڵێخا سەرۆکی پیشەوەرانە، ئەوجە هاتیە میرۆی فێر بکا کوو ئیشەکەی دەکا، گۆتم : باشە نەمگۆ تەعینات نیە، میرۆت لۆ هینایە ؟ گۆتی : ئوستاج، میرۆ وەکو خۆبەخش هاتیە خۆبەخش..!
مایتی[1]