=KTML_Bold=کورد لە هاوکێشەی ئەمەریکادا=KTML_End=
#کارۆخ خۆشناو#
ڕاستییەکی حاشاهەڵنەگرە کەوا گەلی کورد لە ڕۆژهەڵاتی ناوەڕاستدا وەک (ئەکتەرێکی نادەوڵەتی) دۆست و هاوبەشێکی گرنگی ئەمەریکایە، واتە کورد لە هاوکێشەی ئەمەریکادا (ژمارەیەکی خوێنراوەیە) ئەویش بەهۆی ئەو فاکتەی کەوا کورد پڕۆ ڕۆژاوا و پڕۆ ئەمەریکایە، ئەم فاکتەش لە تێکشاندنی #داعش# لەسەر دەستی پێشمەرگە و #شەڕڤان#ان سەلمێندرا، بەمانایەکی تر دەتوانین بڵێین کورد هاوبەشێکی متمانە پێکراوی ئەمەریکایە لەرۆژهەڵاتی ناوەڕاستدا، بەڵام لە سەروبەندی نزیک بوونەوەمان لە هەڵبژاردنی سەرۆکایەتی ئەمەریکادا، دوو پرسیاری گرنگ دێنە پێشەوە:
1-ئایا کورد چۆن بتوانێت درێژە بە بوونی خۆی بدات لەناو هاکێشەی ئەمەریکادا؟
2-ئایا کورد چۆن بتوانێت پەیوەندییەکانی لەگەڵ ئەمەریکادا لە هاوبەشێکی سەربازی و تاکتیکی و کورت خایەنەوە بگۆڕێت بۆ هاوپەیمانێکی سیاسی و ستراتیژی و درێژخایەن؟
بۆ وەڵامی ئەم پرسیارانەی سەرەوە (لە ئەگەر بردنەوەی ترەمپ یان بایدن)دا پێویستە داڕێژەرانی بڕیار لە هەرێمی کوردستان ئەم شەش خاڵە لەبەرچاو بگرن:
1-پێویستە کورد لە زووترین دەرفەتدا هەوڵی ڕێکخستن و بەهێزکردنی ناو ماڵی خۆی بدات، واتە (بەهێزکردنی بارودۆخی خودی) لە هەمان کاتدا پێویستە کورد خوێندنەوەیەکی لۆژیکی بۆ گۆڕانکارییەکانی ناوچەکە هەبێت، واتە (تێگەیشتن لە باردۆخی بابەتی).
2-پێویستە کورد هەڵبدات لەپاڵ ڕێکەوتنی سەربازی، ڕێکەوتنی سیاسیش لەگەڵ ئەمەریکادا واژوو بکات، بە مەبەستی پاراستن و دەستەبەرکردنی ئاساییش و سەلامەتی کوردستان لە ئەگەری هەر هێرشێک کە لە داهاتوودا ئەنجام بدرێت.
3-گرنگە کورد ئامادەباشی بکات بۆ ئەو گۆڕانکارییانەی کە لە ناوچەکەدا ڕوو دەدەن، لە ئەنجامی جێبەجێکردنی ڕێکەوتنەکانی (گرێبەستی سەدە و ئیبڕاهیمی و شامی نوێ و نیۆم) چونکە کۆی ئەم ڕێکەوتنانە لێکەوتەی (ئەرێنی و نەرێنی) بۆ سەر هەرێمی کوردستان دەبێت، هەروەها گۆڕانکارییەکانی ئەم ناوچەیە کۆمەڵێک (دەرفەت و هەڕەشە) بۆ کوردستان لەخۆ دەگرێت، هەموو ئەم ڕێکەوتنانەش لەژێر چاودێری ڕاستەوخۆی ئەمەریکادا ئەنجام دەدرێن و لە دەیەی داهاتوودا (تاکوو ساڵی 2030) تەواودەکرێن.
4-ئەگەر کورد بیەوێت هەمیشە پارێزراو بێت لەلایەن ئەمەریکا و ئەوروپاوە، ئەوا کورد پێویستە لەسەر ئاستی ناوخۆ هەوڵبدات دامەزراوەکانی لەژێر چەتری دەستوورێکی مۆدێرندا ڕێک بخات، واتە هەوڵبدات لیژنەی نووسینەوەی دەستوور لە پەڕڵەمانی کوردستان کارا بکاتەوە، تاکوو لە ماوەیەکی دیاریکراودا (ڕەشنووسی دەستوور بکرێتە سپینووس) و بخرێتە دەنگدان و پاشانیش جێبەجێکردنەوە.
5-هاوشان لەگەڵ تۆکمەکردنی ڕیزەکانی ناوخۆ، پێویستە کورد لە ئاستی دەرەکیشدا گرنگییەکی تایبەت بە پڕۆسەی (لۆبیکردن) بدات، بەتایبەت لە ئەمەریکادا پێویستە هەوڵبدات پشتگیری دامەزراوە جیاوازەکانی ئەمەریکا بەدەست بێنێت وەک (کۆنگرێس، کۆشکی سپی، وەزارەتی دەرەوە، پنتاگۆن، ناوەندەکانی توێژینەوە و ثینک تانک) چونکە ئەم دامەزراوانە بەشداری کارایان هەیە لە داڕشتنی ستراتیژیەت و سیاسەتی دەرەوەی ئەمەریکا.
6-پێویستە کورد لەسەر بنەمای (بەرژەوەندی هاوبەش) ڕێکەوتنی ئابووری و بازرگانی لەگەڵ ئەمەریکادا واژوو بکات، واتە گرنگە کورد بەرژەوەندییەکانی خۆی لەگەڵ بەرژەوەندییەکانی ئەمەریکادا هاوتەریب و پارالێل بکات، بۆ ئەوەی کوردیش لەپاڵ پاراستنی بەرژەوەندییەکانی ئەمەریکادا لەم ناوچەیەدا هەمیشە پارێزراو بێت، بەمانایەکی تر پێویستە کورد لەسەر بنەمای بەرژەوەندی هاوبەش سیاسەت لەگەڵ ئەمەریکا بکات، نەک هەوڵبدات لەسەر بنەمای سۆز (دڵداری) لەگەڵ ئەمەریکادا بکات، چونکە سیاسەت لە ئەمەریکادا لەسەر بنەمای بەرژەوەندی دادەڕێژرێت نەک لەسەر بنەمای سۆزداری!
لەگەڵ ڕەچاوکردنی ئەم خاڵانەی سەرەوەدا، پێویستە کورد بەردەوام بێت لە سیاسەتکردن بە ئاڕاستەی هاوسەنگی ڕاگرتن لەنێوان ئەمەریکا و نەیارانیدا (بەتایبەت ئێران)، چونکە بەرژەوەندی کورد لە شێوازێکی سەردەمیانەی سیاسەتکردنە، بە ئاڕاستەی باڵانس ڕاگرتن. [1]