=KTML_Bold=ئەرک و ئەولەویەتەکانی هەرێمی کوردستان لێرە بەدواوه=KTML_End=
#دلاوەر عەبدولعەزیز عەلائەدین قەرەداغی#
هەرێمی کوردستان رووبەڕووی کۆمەڵێک تەحەدای سیاسی و عەسکەری و دارایی و ئیداری بووەتەوە. خەریکە دەسەڵاتدارانی بەغدا، بە هاوکاری، وەیان چاوپۆشیی هێزە ئیقلیمی و جیهانییەکان، لە سەرجەم بوارەکاندا بە زیادەوە سزای هەرێمی کوردستان دەدەن و سنوورە دەستووری و رێککەوتنە سیاسیەکانی پێشوو بنکۆڵ دەکەن. دیارە ئامانجی ستراتیژییان ئەوەیە کە جارێکی دیکە هەرێمی کوردستان توانای سەربەرزکردنەوەی نەمێنێ و سەربەخۆییەکەی لە ئاستی هەرێمێکی ملکەچ و سنوورداری ناو عێراق تێنەپەڕێ. بەوەش خەونی بەدەوڵەتبوونی هەرێمی کوردستان بەیەکجاری بسڕنەوە. پرسیاری گرنگ ئەوەیە کە ئایا چی دەکرێ و چی بکرێ بۆ ئەوەی هەرێمی کوردستان بە کەمترین زیان له و دۆخە دەربازببێ؟
شکستی ئەوجارە وەکو بۆمبێکی تەوقیتکراو مەسەلەیەکی حەتمی و چاوەڕوانکراو بوو
=KTML_Bold=بۆمبی تەوقیتکراو=KTML_End=
دۆخی ئیمڕۆی هەرێم بە شه و و ڕۆژێک نەهاتووەته دی، بەڵکو لە ئەنجامی کەڵەکەبوونی کۆمەڵێک کێشەی ریشەیی هەڵپەسێردراو و ئەرکی پشتگوێخراو پەیدابوونه کە پێشتر کاریان بەپێی پێویست لەسەر نەکراوە و ئێستا کاتی هاتووە چارەسەر بکرێن.
هەمیشە بیرمەند و خەمخۆران جەختیان لە بەدیهێنانی کۆمەڵێک مەرجی بنەڕەتی بۆ سەرخستنی پرۆسەی بەدەوڵەتبوون کردووەتەوه، گرنگترینیان بریتین لە رێکخستنی ناوماڵ و هێنانەدی یەکڕیزیی سیاسی و تەبایی کۆمەڵایەتی. نهێنی نییە کە له و رووەوە دەسەڵاتی سیاسی هەرێم، لە هەردوو زۆنی سەوز و زەرد، کەمتەرخەم بوونە. بەپێی پێویست ئەولەویەتیان بە پڕۆسەی نیشتیمانسازی و دەوڵەتسازی و تۆکمەکردنی سیستەمی حوکمڕانی نەداوه، یان لە گرنگیی ئەمەیان کەمکردووەتەوه.
هەندێک وایان دادەنا کە دەکرێ بارە ناوەکیە شڵۆقەکەی هەرێم لەدوای دامەزراندنی دەوڵەت چاک بکرێ، بەڵام رۆژگار سەلماندی کە سیستەمی حوکمڕانی هەرێمی کوردستان لە رووی بونیاد و پەیکەرەوە ئەوەندە لاواز و لەرزۆکه، خۆی لەخۆیدا هۆکاری سەرەکی بووە بۆ دروستبوونی قەیرانە نەپچڕاوە‌کانی، لە یەکەمین تاقیکردنەوەی چارەنووسسازیشدا بەرگەی نەگرت و شکستی هێنا.
بە واتایەکی دیکە، شکستی ئەوجارە لە دەرئەنجامی تەنیا هەڵەیەک یان هیچ جۆرە خیانەتێک نەبوو، بەڵکو وەکو بۆمبێکی تەوقیتکراو مەسەلەیەکی حەتمی و چاوەڕوانکراو بوو. خۆ ئەگەر هەرێمی کوردستان پێشوەختە و بەبێ یەکڕیزیی دەوڵەتی رابگەیا‌ندایە، دوورنییە هەر هەمان ئه و لاوازیە بنەڕەتیانە، زوو یان درەنگ، دەبوونە هۆی شکستی دەوڵەتەکە و دووپاتبوونەوەی ئەزموونی باشووری سوودان. راستە، هەڕەشە دەرەکییەکان و هێزە نەیارەکان رۆڵیان کاریگەر بوو، بەڵام گلەیی لە نەیار و دوژمنان ناکرێ، چونکە ئەوانە بە سروشت ئامانجیان شکستپێهێنانی پڕۆژەی سەربەخۆیی کوردستانە.
دەبێ هەرێم بارودۆخ هەڵسەنگێنێ، خوێندنەوە بۆ مەرج و پێشهاتەکان بکات و خۆی بۆ هەنگاوەکان ئامادە بکات و حیساب بۆ پەرتەوازەیی بڕیاری سیاسی ناوەکیش بکات. ئەگەر حوکمی هەرێمی کوردستان دروست بووایە، پەرلەمان کارا بووایە، حکومەت تۆکمە بووایە، هێزی چەکدار نیزامی بووایە، گەندەڵی کۆنتڕۆڵ بکرایە، خەڵکی هەرێم هەستی هاووڵاتیبوون و سەروەریی یاسا و عەدالەتی کۆمەڵایەتی هەبووایە، درزی وا گەورە نەدەکەوتە نێو هێزەکانی هەرێم و چانسی سەرکەوتن زۆر لەوە زیاتر دەبوو.
پێویستە سەرکردەکان رێ لە موزایەدە و گوتاری ئاگرین و ئاڵوگۆڕی تۆمەت و رەفتاری تێکدەرانە بگرن کە رەنگە ببنە مایەی زیاتر لێکترازان
=KTML_Bold=لاوازیی سترەکچەری بڕیاردان=KTML_End=
دەمێکە قڵیشی گەورە لە نێوان سەرجەم هێزە سیاسییە دەسەڵاتدار و ئۆپۆزیسیۆنەکان پەیدا بووە، بەڵام ئێستا کار لەوە تێپەڕیوە. قڵیشی ناوەکیش لە هەناوی زۆربەی هێزەکاندا سەری هەڵداوە و لە پرۆسەی حوکمڕانی و ژیانی رۆژانەی خەڵکیشدا رەنگیانداوەتەوە. لە زۆنی سەوزدا سترەکچەری (پەیکەر و پرۆسەی) بڕیاردان لەبنەڕەتەوە شڵەقاوە و لە ئاستی لوتکەوە بە شێوازێکی مەترسیدار پەرتەوازە بووه کە هیچ جۆرە مەرکەزیەتێک لە بڕیارداندا بەدی ناکرێ.
لە زۆنی زەردیشدا کێشەکە بە پێچەوانەیە، پەیکەری بڕیاردان بە زیادەوە تۆکمە و بە زیادەوە مەرکەزیانەیه، بە جۆرێک کە نەک تەنیا لە رەخنەی ئۆپۆزیسیۆن پارێزراوە، بەڵکو لەوە دەچێ لە داواکاریی خەڵک و راوێژی کۆمەڵگای مەدەنی و توێژی بیرمەندانیش دابڕابێ. ئه و دیاردە دوو جەمسەریه لە هەرێمێکی بندەستەدا کە چاوی لەوەیە ببێتە دەوڵەت، بە کێشەی بنەڕەتیی کەمەرشکێن دادەنرێ، چونکە بە‌هۆیەوە هەمیشە لە ئاستی تەحەداکاندا قابیلی لێکترازان دەبێ.
دەسەڵاتی بڕیاردانی سیاسی، دارایی، عەسکەری یان ئیداری لە هیچکام له و دوو زۆنە‌‌دا بە تەواوی نەگوازراوەتەوە ناو پەرلەمان و حکومەت و دادگا. بە پێچەوانەوە، هەژموونی حیزبە دەسەڵاتدارەکان لە لاوازکردن و بنکۆڵکردنی، وەیان هەندێ جار ئیفلیجکردنی هەریەک له و کۆڵەگانەی دیموکراسیدا بەردەوامە. مەسەلەی حوکمڕانی بەپێی یاسا، وەیان مەسەلەی شەرعیەتدان بە بڕیارەکانی حوکمڕانی، مەرجی بنەڕەتین بۆ بەدەستهێنانی متمانەی میللەت و متمانەی نێودەوڵەتی، کەچی لە هەرێمی کوردستاندا کراونەتە مەسەلەی لاوەکی. ئه و جۆرە پشتگوێخستنەی یاسا و شەرعیەت لە سەردەمی شەڕی ساردی سەدەی رابردوو بۆ دەوڵەتانی ناوچەکە دەچووە سەر، بەڵام لە رۆژگاری ئیمڕۆدا و لە هەرێمێکی فیدراڵی بندەستەدا نەفەسیان درێژ نییە.
ئەگەر کورد نەبێتەوە شەریکی راستەقینەی حوکمڕانی لە بەغدا، دوور نییە دووچاری هەمان دەردی عەرەبی سوننە بێ کە لە ساڵانی دوای رووخانی رژێمدا بەسەر خۆیاندا هێنا
=KTML_Bold=نەچووە بچێ=KTML_End=
شکستی ئەوجارە به و ئاستە‌ی ڕووخان نییە کە چاودێران وەسفی دەکەن. بەڵکو پاشەکشەیەکە بە مانای گەڕانەوەی زەمەن بۆ دواوه، چونکە دۆخی هەمیشە شڵەقاوی عێراق بەردەوامە و پارسەنگی هێزە ململانێکەرەکان لە رۆژهەڵاتی ناوەڕاستدا هێشتا لە گۆڕاندایە. بەغدا بەبێ هاوکاریی دەرەکی توانای چارەسەرکردنی کێشە بنەڕەتی و درێژخایەنەکانی نەماوە و نایبێ. جا بەهۆی داڕزانی ناوەکی و هەڵوەشانەوەی پێکهاتەکانی عێراق بێ یان لە ئەنجامی ململانێی هێزە جوڵێنەرەکان، دەرفەتی نوێ دێنە پێشەوە.
خۆ ئەگەر عێراق تۆکمەش بووەوە و لایەنی کوردی وەک شەریکێک بەشدار بوو لە هەڵساندنەوە و بەدیموکراسیکردنی، ئەوا دیسانەوە هەرێمی کوردستان براوە دەبێ. ئەگەر هێزە سیاسییەکان بەخۆکەوتن و تەرکیزیان خستە‌وه سەر تۆکمەکردنی کۆڵەگەکانی حوکمڕانیی دروست لە هەرێمدا، ئەوا شکستی ئه و دواییە دەبێتە دەرسی مێژوو و هەڵسانەوەی بە گوڕوتینەوە بەدوادا دێ. بەڵام ئەگەر سەرکردە سیاسیەکان لە ئینکاردا بمێنن و لاوازییەکانی سیستەمی ئێستا بەردەوام بکەن، ئەوا شکست دەبێتە کارەسات و ئومێدی بەدەوڵەتبوونیش لە خەونەوە دەبێتە خەیاڵ.
=KTML_Bold=ئەرکی دادێ لە ناوەوە=KTML_End=
ئیمڕۆ کاتی دیراسەتکردنی ئەرکە هەنووکەییەکانە بۆ فریاکەوتن و راستکردنەوەی باری لاری سیستەمی حوکمڕانی. پێویستە سەرکردەکان رێگە لە موزایەدە و گوتاری ئاگرین و ئاڵوگۆڕی تۆمەت و رەفتاری تێکدەرانە بگرن کە رەنگە ببنە مایەی زیاتر لێکترازان و گەڕانەوە بۆ کارەساتی دوو ئیدارەیی. لەجیاتیان با پەرلەمان و حکومەت کاراتر بکرێن و ببنە سەرچاوەی سەرەکی بڕیاردان.
بەزووترین کات سەرکردەکان بەرچاوڕوونی بدەنە خەڵک و بەرنامەی سیاسی و حوکمڕانییان ئاشکرا بکەن. لەوانە پلانی: ئارامکردنەوەی کەرکوک و ناوچە دابڕێندراوەکان، گێڕانەوەی ئاوارەکان، داڕشتنەوەی پەیوەندییەکان لەگەڵ عێراق، هەموارکردنەوەی یاسای هەڵبژاردن و دیاریکردنی رۆژی هەڵبژاردن، یەکلاکردنەوەی سیستەمی حوکمڕانی (پەرلەمانی یان سەرۆکایەتی)، بەرنامەی دارایی و مووچە، زیندووکردنەوەی پرۆژە ژێرخانییەکان، بەدامەزراوەییکردنی هێزە چەکدارەکان، کۆنتڕۆڵکردنی گەندەڵی، ریفۆرمی سیستەمی بەڕێوەبردن، سەربەخۆکردنی سیستەمی دادوەری، جۆشدانەوە بە کۆمەڵگای مەدەنی. ئەوانە و دەیان پڕۆژەی ستراتیژیی دیکە کە دەکرێ پسپۆڕان کاری لەسەر بکەن بۆ جێبەجێکردن.
لەمەودوا بەغدا بەرەی شەڕی چارەنووسساز دەبێ بۆ وەدەستهێنانی مافەکانی خەڵکی هەرێمی کوردستان
=KTML_Bold=ئەرکی دادێ لە دەرەوە=KTML_End=
هەڕەشەی سەرەکی لە مەودای نزیکدا بە پلەی یەکەم لە بەغداوە دێ، ئەوجا لە ئەنکەرە و تاران بە پلەی دووەم، ئەگەرچی لە رووی هاندان و پلاندانانەوە ریزبەندییەکە بە پێچەوانەیه. پێویسته رووی هەڵمەتی هەنووکەیی هەرێمی کوردستان له و سێ پایتەختە بێ و سەرجەم کەناڵەکانی پەیوەندی و کارتێکردن لەناو سیستەمی بڕیاردانی ئه و وڵاتانە بەگەڕبهێندرێن بۆ ئەوەی لە ئاستێکی بەرزی سیادیەوە پردی متمانە لەگەل بڕیاردەرانیان دروست بکرێتەوە و کرژیەکان و توندیی تەوژمەکان خاوبکرێنەوە.
ئه و سێ پایتەختە لە دژی ریفراندۆم و دروستبوونی دەوڵەتی سەربەخۆن، لە زێدە متمانەبەخۆبوونەکەی هەرێمی کوردستانیش نیگەرانن و دەیانەوێ دەرسێکی مێژوویی بدەنە سەرکردەکانی هەرێم بۆ ئەوەی ئەزموونی هاوشێوە دووبارە نەبێتەوه، بەڵام خوازیاری ئەوەش نین کە سەرجەم هاوکێشەکان ئەوەندە ئاوەژوو ببنەوە، ناوچەکە بەزیادەوە گیرۆدەی ململانێی خوێنینی نوێ بێت و خۆیشیان تێیدا زەرەرمەند ببن. دەشزانن کە گوڕوتینی هەرێم و خواستی میللەتی کورد بەوە کۆتایی نایەت، ئەگەر کێشە بنەڕەتیەکان چارەسەر نەکرێن ئەوا لە دەرفەتێکی دیکەدا بزووتنەوەی رزگاریخوازی کوردستان دێتەوە مەیدان. بۆیە زۆرینەی دراوسێیەکان مەبەستیانە لە ئایندەدا هەرێم لەگەڵ بەغدا رێکبکەوێ و کێشەکان لە چوارچێوەی عێراقدا بە میکانیزمی سیاسی و دەستووری، نەک بە فەرزی ئەمری واقیع، چارەسەر بکرێن. لەوەشدا هێزە جیهانییە دۆستەکانیش هاوکار دەبن.
=KTML_Bold=لە بەغدا=KTML_End=
بۆ هەرێمی کوردستان، بەغدا لە هەموو پایتەختێکی دیکەی جیهان گرنگترە و پێویستە بکرێتە چەقی تەرکیزی سەرکردەکان. ئەگەر کورد هەرچی زووە هەوڵ نەدات ببێتەوە شەریکی راستەقینەی حوکمڕانی لە بەغدا، ئەوا دوور نییە دووچاری هەمان دەردی عەرەبی سوننە بێ کە لە ساڵانی دوای رووخانی رژێمدا بەسەر خۆیاندا هێنا. دەمێکە حکومەتی هەرێم و لایەنە سیاسییە دەسەڵاتدارەکان، بەتایبەتی پارتی دیموکراتی کوردستان، تەرکیزیان لەسەر بەغدا کاڵ کردووەتەوە و ئەولەویەتیان بە راکێشانی دۆستان و پڕکردنەوەی پۆستەکان و بەشداریکردن لە دەسەڵاتی فیدراڵی نەداوە. دەکرێ بگوترێ کە بەگشتی لایەنی کوردی لە بەغدا تا ڕادەیەکی زۆر پێگە و سەنگی جارانی لەدەستداوە و کاریگەری لەسەر گۆڕینی بڕیار و وەرچەرخاندنی بارودۆخ و بگرە پوچەڵکردنەوەی پیلان زۆر کزبووە، باجی ئه و دیاردانەش لە رۆژگارێکی وەک ئێستادا زیاتریش دەبێ.
ئێستا حکومەتی بەغدا دەرفەتی دەستکەوتووە بۆ سزادانی لایەنی کوردی و دەرگاکانی گفتوگۆی بە تەواوی نەکردووەتەوە، بەڵام ئەوە کاتییە، زوو یان درەنگ دەبێ بیانکاتەوه، جا بە حیکمەت و سیاسەتی هەردوولا بێ وەیان فشاری دەرەکی. پێویستە بەبێ چاوەڕێکردن دەستەیەک لە سەرکردە بڕیاردەر و کاریگەره باڵاکانی هەرێم، بە بەشداریی سەرجەم حیزبە سەرەکیەکان، بچنە بەغدا و بنکەیەکی هەمیشەیی لەوێ دابکوتن و بە پلانێکی گشتگیر کاری بێوچان لەسەر تەوەرەکانی پڕۆسەی بڕیاری سیاسی و حوکمڕانی عێراقی بکەن، بۆ ئەوەی کەشی ناهەمواری ئێستا ئاوەژوو بکەن و دواتر کورد بکەنە شەریکی بڕیاردانی حوکمڕانی.
گرنگە ئه و سەرکردانە خەڵکانێک بن کە لە بڕیاری لوتکەیی نزیک بن، میانڕه و و پراگماتیک بن و توانای راکێشانەوەی دۆستە کۆنەکان و دروستکردنی پەیوەندیی نوێیان هەبێ. پێویستە پەیوەندی لوتکەیی لەگەڵ مەرجەعەکانی نەجەف و سەرکردەی حیزبە شیعە و سوننەکان و نێردەی دیپلۆماتی هێزە جیهانیەکان بکەن و کاری نوێنەرانی هەرێم لە پەرلەمان و حکومەت و کۆمەڵگای مەدەنیدا رێکبخەنەوە. وەک خاوەنێکی پرۆسەی حوکمڕانی عێراقی، کار لەسەر بەدیموکراسیکردن و بەدامەزراوەییکردنی دامودەزگاکانی دەوڵەت بکەن کە ئەوەش خێری بۆ هەمووان دەبێ. واتە، چیتر کورد خۆی بە میوان نەزانێت و بەغدا بۆ خەڵکی دیکە لێنەگەڕێ.
ئه و تیمە پێویستی بە هاوکاریی پەرلەمانتاران و خەڵکانی پسپۆڕ دەبێ بۆ بەشداریکردن لە چەندین لێژنەی هونەریی تایبەتمەند تاوەکو لە تەوەری جیاوازدا پشکی هەرێم لە سەرجەم بوارەکاندا بپارێزن. رۆڵی ئۆفیسی هەماهەنگیی نێوان حکومەتی هەرێم و حکومەتی فیدراڵ گرنگە و پێویستە بە ستاف و سەرکردەی بەگوڕ و لێهاتوو کارا بکرێتەوه هەتا بەردەوام بە داتا و بەڵگە ئەرکی چاودێری و بەدواداچوون لەئەستۆ بگرن.
=KTML_Bold=پەرلەمانتارانی بەغدا=KTML_End=
ئەرکی پەرلەمانتارانی کورد لە بەغدا زۆر قورس بووە، بەهۆی کاڵبوونەوەی تەرکیزی حیزبەکانیان کاریگەرییان لەسەر بڕیار و رووداوەکان کەم بووەتەوە. پەرلەمانتاران شارەزایی زۆریان لە بنجوبنەوانی سیستەم و دەرفەت و هەڕەشەکان هەیە و دەتوانن پیلان و بڕیاری نابەجێی دژ بەهەرێم لە پەرلەمان هەڵبوەشێننەوە، بەڵام بۆ ئەوە پێویستیان بە گوێلێگرتن و پشتگیریکردن و رێنماییە.
پێویستە حیزبەکانی هەرێمی کوردستان ئامادەباشیی تەواو بۆ هەڵبژاردنی گشتی داهاتووی پەرلەمانی عێراق بکەن. بۆ ئەوەش، کار بۆ دەستنیشانکردنی کاندیدەکان لەنێو سەرکردەی باڵا، بڕیاردەر، لێهاتوو، عەرەبیزان و خاوەن بەهرەی پێشڕەویی بکەن، چونکە لە مەودوا بەغدا بەرەی شەڕی چارەنووسساز دەبێ بۆ وەدەستهێنانی مافەکانی خەڵکی هەرێمی کوردستان، ئه و شەڕەش پێویستی بە بەکارهێنانی بەرزترین ئاستی زانست و هونەری لۆبیکردن و خەباتی سیاسی دەبێ.
پێویستە بە زووترین کات ئه و کۆمەڵە پۆستە هەستیار و گرنگەی حکومەتی فیدراڵ کە بەپێی رێککەوتنی سیاسی بە کورد دراون، بە کاندیدی گونجاو پڕبکرێنەوە.
ساڵانێکە پڕکردنەوەی زۆرێک له و پۆستانە پشتگوێ خراون یان کاندیدی گونجاویان بۆ دیاری نەکراوە، ئەوانەی لە پۆستەکانیشدابوونە کێشەی ئاراستەکردنیان هەبووە یان لە زۆر حاڵەتدا لەجیاتی بەرگریکردن لە خواست و مافەکانی هەرێمی کوردستان، بۆ دەستکەوتی حیزبیی تایبەت ئاراستە کراون.
=KTML_Bold=لە دەرەوەی وڵات=KTML_End=
له و چەند هەفتەی دوای ریفراندۆمەوە، فەزای هەرێم تەسک بووەتەوە. کەشێکی نێودەوڵەتی خنکێنەر داهێنراوە، وەک بڵێی سەرجەم دەورودراوسێکان لەگەڵ هاوپەیمانە دۆستەکان خەریکی داخستنی بۆڕیی هەناسەکەین. بەڵام ئه و دۆخە کاتییە و خەریکە کاتەکەشی بەسەردەچێ، چونکە ئامانجەکانیان بۆ بچووککردنەوەی دەسەڵات و قەوارەی هەرێم وا دێتەدی. لەولاشەوە هاوپەیمانان لە زێدەڕۆیی حکومەتی عێراق نیگەرانن.
هەڵبەتە رێگرتن لە هێزە نەیارەکان و راکێشانەوەی دۆستانی هاوپەیمان بە خۆڕسکی نایەنەدی، بەڵکو پێویستیان بە هیممەتی نوێ دەبێ لە ئاستی لۆبیکردنی سەرتاسەریی بۆ کارکردنە سەر بڕیاری هێزە ئیقلیمی و جیهانیەکان لەسەرجەم پایتەختە گرنگەکان.
بێگومان ئەرکی نوێنەرانی حکومەتی هەرێم لەمەودوا لەجاران قورستر دەبێ. ئەوانە زیاتر دەکەونە بەر هەڕەشەی لۆبی عێراقی کە هەوڵی داخستنی نوێنەرایەتیەکان دەدەن. نوێنەران پێویستیان بە ستراتیژی نوێ دەبێ بۆ خۆگونجاندن لەگەڵ واقیع و ئەولەویاتی نوێی حکومەتی هەرێم، نەک هی دوو حیزبی دەسەڵاتداری هەرێم.
هەڵبەتە نوێنەران له و میانەدا تەنیا نین، دۆست و پاڵپشتیان هەن. یەکێک لە پاڵپشتە هەرە مەزنەکان بریتییە لە رەوەندی کورد لە هەندەران کە لە سەرتاپای جیهاندا بەربڵاون و توانای فشاریان لەسەر دامەزراوەکانی بڕیار هەیە. ئەوانە دڵیان بۆ کوردستان لێدەدا و ئامادەن بەبێ چاوەڕوانکردنی پاداشت کاری پێشمەرگانە بۆ دۆزی هاوبەش بکەن. دیارە ئه و رەوەندە لە لاوازبوونی سیستەمی حوکمڕانی هەرێم و تەشەنەکردنی پەتای گەندەڵی نیگەرانن، بەگلەیین لەوەی کە دەنگیان نابیسترێ و دەسەڵاتدارانی هەرێم پشتگوێیان خستوون، بەڵام لەگەڵ ئەوەشدا خۆیان وەک شەریکی هەمیشەیی دەبینن و ئه و شکستەی دوایی بە هی خۆیان و دۆزەکەیان دادەنێن و ئامادەن بۆ زیندووکردنەوەی هیواکان بێنە فریا. کاتی هاتووە حکومەت بە هەڵمەتێکی نوێوە پردی هەماهەنگی و هاوکاری لەگەڵ رەوەندی کوردەواری دروست بکاتەوە و بیانکاتە شەریکی روانگە و بەرنامەی نوێی لۆبیکردن.
بێگومان تەحەداکان مەزنن و چاککردنی سیستەم کارێکی قورس و درێژ‌خایەنه، بەڵام خەڵک پشووی درێژە. له و ساتەوەختەوە کە حکومەت قۆڵی لێ هەڵدەکات و بەڵگەی پێشوەچوون پێشکەش دەکات، خەڵک نیەتچاکیی سەرکردەکانی قەبوڵ دەبێ و بەشێکی بەرپرسیارێتییەکەش دەگرێتە ئەستۆ، چونکە ئه و نیشتیمانه، بە کێشەکانیەوە، هی هەمووانە و بەرپرسیارێتی چاککردن و سەرخستنیشی لە ئەستۆی هەموواندایە. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=