=KTML_Bold=حکوومەتێکی خۆڕاگر و سەرۆک وەزیرانێکی ئاییندەساز=KTML_End=
#سامان سۆرانی#
لەگەڵ ئەوەی کابینەی نۆیەم لە هەلومەرجێکی سیاسی و ئابووری ئاڵۆز لەسەر ئاستی ناوخۆ و هەرێمیی و نێودەوڵەتی، دەست بەکار بوو، بەڵام دەکرێت بە دوو دێڕ ئاماژە بەوە بکرێت، کە ئەم کابینەیە خۆڕاگرانە کاری کردووە لەسەر پرۆسەی چاکسازیی کارگێڕی و دارایی و رووبەڕووبوونەوە و سنووردارکردنی گەندەڵی و گەشەپێدانی وەبەرهێنان و پێشخستنی ژێرخانی ئابووری و باشترکردنی پەیوەندی و چارەکردنی کێشەکان لەگەڵ حکوومەتی فیدراڵی لە بەغدا و جەخت کردنەوە لەسەر ئەوەی وەبەرهێنان لەسەر گەنجەکان بکرێت و پێبگەینرێن، تاوەکوو کارامەتر لە بونیادنانی داهاتوویەکی گەشتر بۆ وڵاتەکە بەشدار بن.
ئەم کابینەیە بە ئەرکی خۆی زانی، بێجیاوازی، خزمەتی هاووڵاتیانی هەرێم بکات و لە کاروانی ئاوەدانکردنەوەی کوردستان بەردەوام بێت و زۆرترین پرۆژەی ژێرخان جێ بەجێ بکات و لە بری قسەی باق و بریق بە کارە پڕ لە بەرهەمەکانی وەڵامی نەیاران بداتەوە. هاندەری پتەوکردنی یەکڕیزی نیشتمانیی و قووڵکردنەوەی گیانی تەبایی و برایەتی و پێکەوەژیانی ئاشتییانەی نێوان پێکهاتە جیاجیاکانی هەرێمی کوردستان و هەموو گەلانی ناوچەکە بێت.
دیارە، بنیادنانی ئایندیەکی باشتر بۆ کوردستان پێویستی بە هەوڵ و کۆششی بێوچانی هەموو کەرتە جیاجیاکان و کۆمەڵگە و سەرۆک وەزیرانێکی ئایندەساز هەیە، هەر بۆیە، دەوڵەتمەدار #مەسرور بارزانی#، هەر لەسەرەتای دەستبەکاربوونی، کاری لەسەر پتەوکردنی ژێرخانی کوردستان کرد و مکوڕ بوو لەسەر ئەوەی هیچ کەرتێ پەراوێز نەخرێت. بایەخدان بە کەرتی خوێندن و پەرەپێدانی کوریکۆلۆم بە شێوەیەک، کە پێداویستییەکانی بازاڕ پڕ بکاتەوە و هزری ڕەخنەگرانە بەهێز بکات، بە ئەرکی خۆی زانی و چالاکانە کاری کرد بۆ پاڵپشتیکردن لە پرۆژەی بچووک و مامناوەند و بوو بە هاندەری داهێنان و وەربەرهێنان لە بواری تەکنەلۆژیا.
ئەم شیوازە مۆدێرنە لە حوکمڕانی توانی شەفافییەت بەهێز بکات و لێپرسینەوە لەناو حکوومەت زیندوو بکاتەوە، بە شێوەیەک ئەو بۆچوونەی لای هاووڵاتی درووست کرد، کە بەڵێ هەمووان دەتوانن دەنگیان هەبێ لە درووستکردنی بڕیار.
ئەگەر چی دەوڵەتمەدار مەسرور بارزانی بەردەوام کاری لە پێناو کەمکردنەوەی کەلێنە کۆمەڵایەتی و ئابورییەکان کردووە بەمەبەستی چەسپاندنی دادپەروەریی کۆمەڵایەتی و زامنکردنی مافی هەموو چینەکان، لەگەڵ ئەوەشدا، بەوە نەوەستاوە و لە هەڵمەتی ئەم هەڵبژاردنە هاوڵاتییان هان دەدات، بەشدار بن لە ژیانی سیاسی و کۆمەڵایەتی و گەنجان دەستپێشخەر بن لە پاراستنی ژینگەی کوردستان و پەرەپێدانی بەردەوام و بەها نیشتمانییەکان، تاوەکو ئایندەیان و ئایندەی نەوەکانی داهاتوو زامنتر بێت.
سەرۆک وەزیرانی ئایندەساز پێی وایە، ڕۆشنبیری و ناسنامە و میراتی نەتەوەیی، کە لە ڕێبازی بارازنی نەمرەوە سەرچاوەی گرتووە پشکدار دەبێت لە بەهێزکردنی یەکگرتوویی نیشتمانی و فرەیی؛ هەر بۆیە، هەموو هەوڵ و کارێکی بۆ پاراستنی سەقامگیریی سیاسی بوو و بۆ هەموو لایەک سەلماندی، کە ژیرانە مامەڵە لەگەڵ قەیرانە ئابووری و سیاسییەکان دەکات، ئەمەش بووە مایەی بەهێزبوونی پێگەی جەماوەری و زیادکردنی ڕێژەی ڕەزامەندیی هاوڵاتییان لە شێوازی کارکردنی.
دواجار ئەم شێوازە سیاسەتەی، کە پەیڕەوکرا، بوو بە مایەی بنیاتنانی پەیوەندی بەهێز لەگەڵ دەوڵەتانی دراوسێ و کۆمەڵگەی نێودەوڵەتی، ئەمەش بووە مایەی پاڵپشتی سەقامگیری و پەرەپێدانی هەرێمی کوردستان.
دەوڵەتمەدار مەسرور بارزانی، باوەڕی تەواوی بەوە هەیە، کە گەلی کوردستان هیچ شتێکی لە گەلانی تر کەمتر نییە، گەنجانی کوردستان دەتوانن لەسەر ئاستی جیهان لە هەموو بوارەکان سەرکەوتن بەدەست بهێنن.
بەردەوامبوونی دەوڵەتمەدار مەسرور بارزانی، لە ئەرکی خۆی وەکو سەرۆک وەزیران دەبێتە مایەی کوردستانێکی ئاوەدان و ئارام و خۆڕاگر و بەهێزبوونی پێکەوەیی لە پێناو دەوڵەتسازی. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=