لە پای ئەو دەست کەوت و سەرکەوتنانەی لە پاڵەوانێتییەکانی ئێراق و جیهان بەدەستی هێنا، لیژنەی ئۆڵۆمپی سلێمانی و یەکێتی موایتایی سەربە و لیژنەیە دوو مەراسیمی ڕێزلێنانی بۆ #بەهمەن محەمەد#ی پاڵەوانی ئەو یارییەی یانەی پێشمەرگە ڕێک خست.
لەنێو بارەگەی لیژنەی ئۆڵۆمپی سلێمانی و بە ئامادەبوونی سەرۆکی نوێنەرایەتی لیژنەکە و سکرتێر و ئەندامانی و سەرۆکی یەکێتی موایتایی سلێمانی دوو مەراسیمی ڕێزلێنان بۆ بەهمەن محەمەد -ی یاریزانی موایتایی #یانەی وەرزشی پێشمەرگەی سلێمانی# و یاریزانی هەڵبژاردەی ئێراق ڕێکخرا.
سەرەتا د. #دیار محەمەد سدیق# سەرۆکی نوێنەرایەتی لیژنەی ئۆڵۆمپی پیرۆزبایی لە بەهمەن محەمەد -ی پاڵەوان کرد کە لە ماوەی ساڵانی 2023 و 2024 دا چەندین ئەنجام و دەست کەوتی بۆ شاری سلێمانی و یانەکەی، یانەی وەرزشی پێشمەرگە کە یانەیەکی دیاری وڵاتە بەدەست هێناوە، هەروەک ستایشی هەوڵە بێوچانەکانی جێگری سەرۆکی یانە و دەستەی کارگێڕی کرد کە سەرجەم وەرزشکاران بەسەر دەکەنەوە و هیچ یارییەکیان فەرامۆش نەکردووە و پشکی شێریان بە سەرجەم یارییە جۆراوجۆرەکان داوە هەر بۆیە ناوی پێشمەرگەی بە یەکێک لە ناوە گەشاوەکان لە وەرزشی ئێراق لە قەڵەمدا.
پاشان قەڵغانی ڕێزلێنانی لیژنەی ئۆڵۆمپی و بڕوانامەی ڕێزلێنانی یەکێتی موایتایی سلێمانی بەخشرایە بەهمەن محەمەد ی پاڵەوان و لە بەرانبەردا ئەو یاریزانە سوپاسی کردن بۆ ئەو بەسەر کردنەوەیە و هەروەک سوپاسی یانەکەشی کرد کە هەمیشە پاڵپشت و هاوکاریان بوون.
جێگەی وەبیرهێنانەوەیە لە مانگی شوباتی 2023 و لە وڵاتی ئیمارات بەهمەن محەمەد توانی لە پاڵەوانێتی پڕۆفیشناڵ پلەی یەکەم بەدەست بهێنێت ئەوەش لە پاش ئەوەی لە ڕکابەرە لوبنانێکەی بردەوە و هەروەک لە هەمان مانگ و لە ساڵی 2024 دا و لە شاری بەسرە و بە ئامادەبوونی هەزاران هاندەر و هەواداری ئەو یارییە بەهمەن پلەی یەکەم و میدالیایی ئاڵتونی لەسەر ئاستی ئێراق لە مل کراو لە هەمان ساڵ دا و لە مانگی حوزەیران دا و لە شاری پاتراس ی وڵاتی یۆنانەوە پلەی چوارەمی لەسەر ئاستی جیهان لە یارییەکەی بەدەست هێنا.[1]