قەسەدە ڕایگەیاند، کە لە ڕووبەڕووبوونەوەکانی 24 کاتژمێری ڕابردوودا، 7 سەربازی تورک لە شارۆچکەی ڕاجۆ کوژراون، ئەوەشی خستووەتەڕوو، کە هەموو بەرەکانی شەڕ ڕووبەڕووی بۆردوومان و تۆپبارانی سوپای تورک و چەتەکانی بوونەتەوە.
ئێوارەی ئەمڕۆ، ناوەندی ڕاگەیاند و چاپەمەنیی هێزەکانی سوریای دیموکرات-قەسەدە، بە ڕاگەیەندراوێک، ئاماری شەڕ و ڕووبەڕووبوونەوەکانی 24 کاتژمێری ڕابردووی لە #عەفرین# بڵاوکردەوە.
قەسەدە، ڕایگەیاندووە: کاتێک کە هاوڵاتیانی حەلەب گەیشتوونەتە عەفرین، سوپای تورک و چەتەکانی سەنتەری شاری عەفرین-یان بە چەکی قورس تۆپبارانکردووە و زۆربەی تۆپەکان لە گەڕەکەکانی تورندێ و ئەشرەفییە کەوتوون.
ئەوەشی خستووەتەڕوو: شەوی ڕابردوو، لە گوندی بلێلکا و دەوروبەری لە بەرەی شارۆچکەی ڕاجۆ-وە، ڕووبەڕووبوونەوە لەنێوان شەڕڤانانمان و سوپای تورک و چەتەکانی ڕوویدا، لە ئەنجامدا 7 سەربازی سوپای تورک کوژران، دواتر ڕووبەڕووبوونەوەکان فراوانبوون و گوندی حەجیکا-شی گرتەوە، تا درەنگانێکی شەویش سوپای تورک ناوچەکەی تۆپباران کرد.
هەر لە ڕاگەیەدراوەکەی قەسەدە-دا هاتووە: لە دەوروبەری قەڵای نەبی هۆریی لە بەرەی شارۆچکەی شەرا-وە، ڕووبەڕووبوونەوەی لەنێوان هێزەکانمان و سوپای تورک و چەتەکانیدا ڕوویداوە و تا ئێستاش بەردەوامە، هەروەها لە شەوی ڕابردووە تاوەکو ئێستا، سووڕانەوەی فڕۆکە جەنگییەکانی سوپای تورک بەسەر گوندەکانی سەر بە شەرا و بەنداوی مەیدانکێ-وە بەردەوامە.
قەسەدە ڕاشیگەیاندووە: لە بەرەی شارۆچکەی جندروێسەوە، ڕووبەڕووبوونەوە لەنێوان هێزەکانمان و سوپای تورک و چەتەکانی ڕوودەدات و تاوەکو ئێستا ڕووبەڕووبوونەوەکان بەردەوامن، هەروەها سووڕانەوەی فڕۆکە جەنگییەکانی تورکیش بەسەر ناوچەکەدا بەردەوامە.
بەپێی ڕاگەیەندراوەکەی قەسەدە، لەماوی 24 کاتژمێری ڕابردوودا، هەموو بەرەکانی شەڕ و سەنتەری شارۆچکەکانی ڕاجۆ، شێراوا و ماباتا و زۆرینەی گوندەکانی کانتۆنی عەفرین، ڕووبەڕووی بۆردوومان و تۆپبارانی سوپای تورک و چەتەکانی بوونەتەوە و بەهۆیەوە، ژمارەیەک شەهید و بریندرای لێکەوتەوە، کە زۆرینەیان ژن و منداڵ بوون، جگە لەوەش زیانێکی ماددی زۆری لێکەوتووەتەوە.[1]
#19-02-2018#