ب دەستووری خودێ
چەند سەبەقە ژ قەولێ دایک و بابا:-
مەند ژ شێفەخر دپرسی یە
تو ب وی کەی ئیلاھی یە
ئەرکانێت ئێزدیا چی و چی یە ؟
***
شێفەخر بانگ دکەت ب سوڕە
ژ کەشکولێ دەردئێخت دوڕە
بۆ مەندێ خۆ دھوونە و ڤەدچڕە
***
فروارەک ھاتیە ژ ئەسمانا
رێ و رەسم و حەد و سەد بۆ مە دانا
ئێک ژ وان وەسیەتا دایک و بابانا
***
دبێژمە تە نەکە ژ بیر
خەلکێ عێرفێ زانایێ ژیر
بێی دایک و بابا نەکەن تەکبیر
***
ل سەر مە دانایە ھەقە
دگەل نەکەن ئاخافتنا رەقە
دا سەر و زمان ل مە نەبتە شەقە
***
یێ دلێ وان دھشتە
دلێ تەریقەتا خۆ ژ خۆ دھشتە
ل ئاخرەتێ نە پالە و نە پشتە
***
ھەقە ل وان بکەن سلاڤا
زیارەتی بن ل دەستان و چاڤا
ھەڕۆ سبا و ھەموو گاڤا
***
نەھ مەھا تو خودان کری
ژ ئاڤ و ئاگری دوور کری
خەوێت شەڤا بۆ تە ل خۆ حەرام کری
***
باب ل ئەردا ھۆستایە
مال ب وی راوەستایە
تاعەتا وی ژ تاعەتا خودایە
***
چل چلەی ب رۆژی بی
چلێت دی ب مجادەچو نڤێژ ل پێ بی
فایدە ناکەت ھەکە نە ل تاعەتا دێ و بێ بی
***
ھەکە دلێ دایێ خۆش نەکەی
و دلێ بابێ شاھ نەکەی
فایدە ناکەت سەد سالێ عەبادەتێ بکەی
***
نەبێژە دایێ : تو یە پیری
و ھزرەکا بێ بیری
ب وێ نەبت ناچیە پێش دیندارا میری
***
نەبێژە بابێ : پیرەمێرەکی کالە
زەرگونەکی بێ حالە
دا شەرمەزار نەبی ل دیوانا خودێ تەعالە
***
گاڤا نەساخ دبن
بێ پێ و دەستھلات دبن
یە فەرە ھنگی د خزمەت دا بن
***
ب دەستی بگرە و بگێرە
ل لالشا نوورانی ڤەشێرە
رەحمەکێ پێرا بنێرە
***
پێڕا بدە خێرە
دوعایەکێ بکە ژ مەلکێ جەبێرە
واجبێ وان بکەن دگەل مەلکان و مێرە
***
یێ تەمام خودێ یە[1]