کورتە ژیونامەو بێهرووز موحەممەدپوور/ نازنام «شارۆ»
نامێ تاتەیش، «حسەین» و ئەدٚابیەو ساڵەو 1355ی کۆچی ڕۆجیارین. دەگاو دزڵیێنە سەر بە مەحاڵوو هەورامانی ئامان دنیاوە و سەرەتاییش زێدوو وێشنە وانان و دماتەر ڕوەش کەردێنە شارەکاو سەوڵاوای، مەریوان، سەقز و سنەی و بیەن مامۆساو وانگای.
ساڵەو 1389ی بە شێوەی جێددی ئامان دلێ دنیاو شێعرێ و تا ئیسە دوێ دەفتەرەشێعرێش بە شێوازی سەردەمیانە چاپ کەردێنێ. شارۆ کومەڵەداستانێوەش بە نامێو «هەری گورانیواچ»ی پەی زاڕۆڵا تەرجومە و چاپ کەردەن و چن دەفتەرە شێعرێ‌تەرێش بە شێوازی کلاسیک و سەردەمیانە ئامادەو چاپینی و کۆڕ و کۆبوونەوەکانە بەشداری چالاکش بیەن و ئیسەیچە بەردەواما. شێعرەکێو ئی شاعێریە جە گۆڤارەکاو ژیوای، ژیوار، وانیار، شار، بەیان، کوپێنهاون جە دانمارک، دیار کهن و ... چاپێ و پەخشێ بیێنێوە.
هەرپاسە بەشێوە جە غەزەڵەکاش جە کتێبوو «خامە و خەیاڵ» و «ناسک خەیاڵان»ی چاپێ بیێنێ و بەشێوە جە شێعرە سەردەمیانەکاش جە کتێبە ڕەخنەییەکاو («چەکەریای حەزێ تازێ» و «هۆرزانه»)، ئامێنێ و ڕەخنەشا سەر نویسیان. نموونەو ئی شێعرە سەردەمیانا و هەرپاسە چاپوو شێعرەو «کرێکار»ی جە کتێبوو «ئانتۆلۆژیای شێعری کرێکاری کوردی»، نویستەو بەڕێز «عەبدۆڵڵا سولەیمان‌»ی کە سلێمانیەنه چاپ و پەخش بیەنەو.
نموونەو پەخشانێش جە کتێبوو «تاریخ نثر هورامی»، نویستەو بەڕێز «ئیبراهیم شەمس‌»ینە بە نامێ «نان»ی چاپە بیێنە.
شێعره و «تۆپه»یش فستیڤاڵوو «مناڵ»ی جە شاروو ئیلامینە و شێعره و «نەورۆز»یش فستیڤاڵوو «شاری دڵ»ی جە شاروو بۆکانی و هەرپاسه داستانه و «نان»یش پەنجۆمین هەمامەو داستان کۆتای هەورامینە جه شاروو پاوەی، هۆرچنیاینێ. [1]
ئا کتێبێ چاپێ بیێنێ:
1 هەری گۆرانیواچ، تەرجومەو داستانی پەی زاڕۆڵا، 1399، چاپوو زایەڵەی.
2 ئامیان، کومەڵەشێعرێ کۆتای هەورامی، 1399 ڕوجیاری، چاپوو زایەڵەی.
3 زڕیای بێ‌دەنگی، کومەڵەشێعرێ سەردەمیانێ، 1400 ڕۆجیاری، چاپوو زایەڵەی