تارېخو ئەدەبیاتو یارسانی
بەشۍ حەڤڎەهەمە
براو (ماما جەلالۍ) دەسشکەرد بە جابەجاکەرڎەی فەرمانەکەو تاتەیش، وەڵېنە دەس و چەمېش بەستە، شمشېرش هۊرکېشاو دەسش باڵاکەرد، بەڵام پڕێنە دەسش سەرو سەرەیشۆ ۋشک بی و نامارە وار، پاسەش زانا ئانە کارو شۊتو ئەڎێشەن، ئی جارەشا بە دەسی چەپش شمشېرش هۊرکېشت، بەڵام دیسان هەرچنش کەرد دەسش نامارە وار، پڕێنە ئا زاروڵە کە دلۍ لەمەو جەلالێنە بۍ، زوانش گېرتو واتش: (جەلالە دامنە پاکەنە، ئا زارۊڵە چاڎۍ پېڎامەبۊن جیلوێوە خوڎاییەن)، چا وەختەنە کاکە ڕەزا پېڎابی دڵ نەوایی ماما جەلالېش کەرد، مژدەش داپەنە کە ئا زاروڵە چاڎۍ پېڎا بۊن جیلوێوە خوڎاییەن، نام و نامبانگش گەردوونی پەڕکەرۊن.
براکەش گرڎو گېیانیش کەوت لەرزە، پەشیمانیش بەرۋست، وېشدا ملو دەس و پەیا واڵەکېشەرە، داواو چەنەویەردەیش چەنە کەرڎە، هەردوېشان پېوەرە گېڵێوە پەی یانەی، براکەش تەمامو قۊمیاکەیش پەی تاتەیش گېڵناوە.
وەختێ ماما جەلالە گەرەکش بۍ بارو زاروڵەکەیش بنیۊ سەرو زەمینی، یانی زاروڵەکەیش بنیۊرە، میرزا ئەمانا فەرمانش بەرکەرد بە گلېربییەیۆ خەڵکی پەی ئانەی بە چەمۍ وېشان بۋینان کە کناچەکېش چەنی زاروڵەش مەبۊن، چا وەختەنە تەشتێ ئاڵتوون جە ئاسمانۆ ئامارە وار و پڕێنە گرۊڵیێ پڕتەو (ڕوشنایی) دلۍ دەمو جەلالەینە ئاما بەرو لوا دلۍ تەشتەکەی، دلۍ نوورەکەینە زاروڵێشا دی، کوڕ بۍ، قوماشی گرانبەهاو بە قیمەتشان ئاردو پېچاشان زاروڵەکەیرە، نامېشا نېیا (موبارەک شا)، دمایی نامېش بە شا خوشێن بەرشېیە.
شا خوشێن، سەردەمو زاروڵەییش جە لوڕستان ژیوان، دمایی پەی وانای شۊنیرە گېڵان، پەی ماوێ لوان پەی هەمەڎانی، تەمەنو (32) ساڵینە، وەختێ سەرو قولۍ کەشو (یافتە) جە خوڕەم ئابادو لوڕستانی، موناجاتش چەنی خوڎای کەرڎەن، نوورو خوڎای لوانەنە لاشەش و بېیەن بە ڕاوەبەرو یارسانەکا! ئی ڕازە چنیێ (ئەفسانۍ) جە قومیاکەو مووسای وەختێ لوان پەی سەرو (کۊ توورۍ) مشۊن، ساڵەو (467ک./1074ز.) جە گەشتێ پەی شارو کرماشانی، نزیک بە شارو هەرسینی کوچی دمایېنش کەرڎەن.[1]