فەلەک خامۊش کەرد
بەشۍ چوارەمە
میرزا ئۆلقاڎر حاڵ و وەزعو ژەن و اروڵا ئا دوە پیا کۊچکەردەیە بەیان کەرۊن پەیمان، کە ئینێ چ ناڕەحەتیێ و خەمباریێوەنە، جە درېژەدای شینکەردەینە پەیشان باس جە ئاموشۊ ڕاکەو تەوېڵۍ کەرۊن پەی خزمەتو شېخی، کە دیارەن سەی نیزامەدین و سەی ئیبراهیم تۊبەکارۍ شېخی بیېنۍ.
تا گیانم جە تەن جیا بۊ ڕۊڵە
تەرک لەزایز دنیا بۊ ڕۊڵە
تا چوون تۊ نەشوون وەسای سەنگ ڕۊڵە
نەپۊشوون لیباس ڕەنگاو ڕەنگ ڕۊڵە
ڕۊڵە چېش کەروون چېش ئامام وەسەر
گیان ها نە جای سەخت نمەیۊ وە بەر
تەقدیر حەققەن ئیرادەی وېشەن
الحکم الله) دەسەڵات چېشەن
سەلمای مەینەت‌بار هەر سیاپۊشەن
دایېم الاوقات هەر ئاغە ڕۊشەن
ئامینە و سیما قەدقەد زوڵف دېز
پەی کەردەن وە نېش مەودای تېخ تېز
ڕوخسار وېشان پارەپارە کەرد
خاڵان جە غەب غەب گرد ئاوارە کەرد
لیباس قەتران بەرگ نۊشانەن
هەر سوب تا ئېوار برا ڕۊشانەن
زیاتەر شەمعی شەو چرای شەوان
مەناڵۊ وېنەی دیڎە بېخەوان
شەمع ڕوخسارش خەمان خەم پۊش‌کەرد
زایفەن وېنەی زەعفەران زەرد
هەر سوب تا ئېوار زایەڵەی نۊشەن
شەوان تا وە ڕۊ براڵە ڕۊشەن
خاتوو ئامینە غەریب و دڵ‌تەنگ
جە نۊ ها وە بەخت سیاش وارا سەنگ
ماچۊ بېزیای خوڎا و بەندە وېم
ئومېد بڕیای کەس نەمەندە وېم
توز تەعزیەی خەمان واران لېش
ڕەنگ قەڵاخی کەرد پەی سەردار ۋېش
شی وەلای عەینا شای بەینەت داران
واتش ئەی زامدار بانووی خەمباران
سەوڵ نازپەروەر خەم یەقیر کەردە
سەردارەکەی خاس براڵە مەردە
کەڵافەی حەیتار دەستەی زوڵف دېز
شیکەرد چوون شیرین پەی مەرگ پەروېز
جۊی ئەسر هووناو نە چەم ڕەوان کەرد
تەرک ڕاحەتی خاو شەوان کەرد
کەردەن ڕەستاخېز قاعیدەی قەدیم
پەی سەی نیزام و سەیید ئیبراهیم
یەخەی عەنبەربۊش دڕی تا بەوار
پارەش کەرد وە نېش سەرگۆنای گوڵنار
تەن دا وە قەزای خار ستەم‌دا
باڵای وېش کېشان وە کوزەی خەم‌دا
وە پەنجەی مەینەت مەڎۊ وە سەردا
مەگېڵۊ وە دەور چوپی چەمەردا
ماچۊ ئاخ سەردار سایەدارم ڕۊ
مەعروف دەوڵەت شای خونگارم ڕۊ
قیبلەگای یەقین دنیا و دینم ڕۊ
ڕۊشنی ڕووی پاک سەر زەمینم ڕۊ
ئاغەی میهرەبان ئاوات وازم ڕۊ
ئاموزای عەزیز جای نیازم ڕۊ
فەرەیدوون فەڕ گەوهەر تاجم ڕۊ
دارای هەفت ئەورەنگ تەخت عاجم ڕۊ
بزورگ و بۍ عەیب پەڕ کەماڵم ڕۊ
شه و چرای گەوهەر دانەی لاڵم ڕۊ
تووتی شەکەرخوار خۊش ئاهەنگم ڕۊ
شاباز تەرلان شۊخ و شەنگم ڕۊ
سەردار سادات قەوم و خوېشم ڕۊ
جە شاهان دەور بېئەندېشم ڕۊ
جادار جاگیر جادارانم ڕۊ
نازدار نازکېش نازارانم ڕۊ
سەدر سەف نشین دیواخانم ڕۊ
دەبیر ئموور گشت خانانم ڕۊ
نەجیب نایاب ئەسڵ مەڼم ڕۊ
خولاسەی خالس کار پەسەندم ڕۊ
ئاغەی حوکمڕان بۍ ئازارم ڕۊ
شای شیرین ئەحواڵ وەش ڕەفتارم ڕۊ
شېخ کەرەمدار بۍ نەزیرم ڕۊ
وە باڵ هیمەت ئیقلیم گیرم ڕۊ
کانی مەعریفەت کۊی کەماڵم ڕۊ
حەکیم دانای ئەهل حاڵم ڕۊ
عالی جای بزورگ بوڵەند پایەم ڕۊ
شای ساحیب کەمەند ساحیب سایەم ڕۊ
مورشید ئیرشاد سوخەن سەنجم ڕۊ
بەحر پەڕگەوهەر کۊگای گەنجم ڕۊ
کۊی کەرەم کۆڵاو عەتا بەخشم ڕۊ
ئاغەی بوڵەند بەخت حاتەم نەخشم ڕۊ
شۊڵەی شەمس شەرق غروب کەردم ڕۊ
تەشریف وەسای سەنگ ئەلحەد بەردم ڕۊ
خەیر خوای خەیرات ساز خەیر ئەندېشم ڕۊ
پەنای بېگانە و قەوم و خوېشم ڕۊ
مەرهەم نمای ئېش ڕووی زامانم ڕۊ
پاکیزە پەروەر ئیمامانم ڕۊ
مەحکوم وە ئەحکام حوکم شەرعم ڕۊ
ئالوودەی تاعەت تەقوا و وەرعم ڕۊ
زاهیر چەم نە خاو دڵ بېدارم ڕۊ
جە ڕۊی قیامەت مایەدارم ڕۊ
کەنجور خانان گەنج پاکم ڕۊ
خەزېنەی پەنهان سەرای خاکم ڕۊ
بەست مەخلووقات نەجاتدەرم ڕۊ
حیجاب سڕپۊش سایەی سەرم ڕۊ
جەناب ئەعلا دەرەجاتم ڕۊ
ئاغەی شیرین تەبع شای ساداتم ڕۊ
شەرتەن تا مەحشەر هەر بواچوون ڕۊ
ئاغە پەی ناکام فەوت مەرگ تۊ
وە فدای شەوق زەوق هەر جارانت بام
خەلیفە و مورید سەرکارانت بام
وەفدای تەفەروج ئاما و لوات بام
وە خزمەت‌کاران فەرمافەرمات بام
وە فدای باڵاپۊش جەبهەی شانت بام
وە جەمع سادات ڕۊی دیوانت بام
وە فدای عەمارەت شا دەستوورت بام
وە فدای جای خاڵی بۍ حزوورت بام
وە فدای ئموورات پەڕاکەندەت بام
وەفدای ڕەخت و خاو وە جامەندەت بام
وە فدای ۋیەردەی ماهوو ساڵت بام
وەفدای تەداروک وەزع و ماڵت بام
وەفدای ناکامی و نۊجوانیت بام
وەفدای تەعزیە و عەزاخوانیت بام
وە فدای فەرزەندان وەبۍ نازت بام
وەفدای موخلیسان پەڕ ئیخلاست بام
وە فدای عاجزی دەردی سەرت بام
وە فدای ئاموشۊی سپیوەرت بام
وە فدای ئیحساسات بۍ درېخت بام
ڕاگەی تەویڵۍ یانەی شېخت بام
وەفدای دەرد سەخت بار لېوت بام
وەفدای ئەسپ زین بۍ ساحیوت بام.[1]