مەیلو جارانی، دەسەواچێ، هەم حەسرەتێ فرەو عاشقەکا و شاعېرەکان، نەمەنەی مەیلو جارانی، گەرمی و گوڕی وەشەویسی، کاڵ بېیەیۆ مەیلی مېیانو دڵوازەکانە حەسرەتێ قووڵ جیامازۊن دلۍ دڵیشانە، هەر پەوکەی سەرەتاو گلەییەکاشا پاسە دەسپەنەکەران، باس جە ساردی و سڕی دڵوازەکاشان مەکەران.
میرزا ئۆلقاڎریچ پېسە تەماموو شاعېرەکا داخ جە دڵەن پەی مەیلو جارانو وەشەویسەکېش، بەڵام وېش هەڵای مەیلش گەرمەن، بەوەفان. میرزا مەڵامەتو سەردی مەیلو ئازیزی بە مەیلێ تازەی مزانۊ، چەنی کەسێ تەری:
کېت کەرد باخەوان شەمامە و لیمۊت
کۍ دیان بوخچەی یەخەی عەنبەر بۊت
توخوڎا بەین نۊت چەنی کۍ سازان
توخوڎا تۊ یە کېت وە ئاوات وازان.
بەڵام وېش مەیلی جارانش هەر مەندەن، مەر بە مەردەی، ئڼا تا ئەلحەڎ سەرای سەنگ هەر یادشەن.
من خۊ تاکە ڕوح نە بەدەن داروون
وەسڵ باڵای تۊ وە چەم مەداروون
وەفای قەڎییمیت هەر نە یادمەن
نمەشۊم نە ۋیر تا وە ڕۊی مەردە

قیبلەم جارانت...
قیبلەم جارانت قیبلەم جارانت
تۊ خوڎا تۊ جە کۊن مەیل جارانت
کۊن ئەو وەفا و مەیل سوب ئېوارانت
کۊن ئیشارەی گەرم پەنای دارانت
کۊن نیگای نازک سەحەر کەردەکەت
کۊن جام دادەی قەیس دایېم وەردەکەت
کۊن ئەو شەوق و زەوق نازئەندازەکەت
کۊن عیشوەی خرام ڕېزەی ڕازەکەت
کۊن خەشم و خەدەنگ لەنجە و لارەکەت
کۊن گەرمی شۆڕش یادگارەکەت
کۊن هەوای هەردان نۊ وەهارانت
کۊن نیگای نەچیر سەر دیارانت
کۊن عەتر شەمیم مېخەک بەندەکەت
کۊن دەستەی زوڵفان ئاڵا شەندەکەت
توخوڎا ئەو کۊ شیی عومدەی مەیلەکەت
کېت کەرد وە مەجنوون کۊی دووجەیلەکەت
توخوڎا کېن دەس پېچ سەرمایەی شەوقت
کېن داروغەی دڵ بازاڕ زەوقت
توخوڎا وە کېت دا تۊ مەیل پارت
وەکېت سپەردەن باغچەی گوڵزارت
کېت کەرد باخەوان شەمامە و لیمۊت
کۍ دیان بوخچەی یەخەی عەنبەر بۊت
توخوڎا بەین نۊت چەنی کۍ سازان
توخوڎا تۊ یە کېت وە ئاوات وازان
توخوڎا تۊ پەی چېش ئەوەند سەردەنی
توخوڎا سا تۊ کۍ نەڕا بەردەنی
باڎەی بۍ شەرتیت جەلای کۍ نۊشان
جامەی دوو ڕەنگیت جە لای کۍ پۊشان
شېوەو چ کەسێت نە دڵ کەرد پەسەند
لای کۍ تۊ دەرسی بېوەفاییت وەند
توخوڎا تۊ پەی چېش بېوەفاییت وەرد
قەتع گوزەرگای هەر جارانت کەرد
ئەرۍ بېئەنساف یار بەینەت کەم
خۊ شەرتمان کەرد من و تۊ وە هەم
تا وە ڕۊی مەردەن سەراچەی گڵکۊ
نەویەرین جە هەم هەرگیز من و تۊ
تۊ ها جە وەردا عەهد وېت شکەست
دەرگای شەرت و شۊن وەفاڎاریت بەست
من خۊ تاکە ڕوح نە بەدەن داروون
وەسڵ باڵای تۊ وە چەم مەداروون
ئانە فام و مەیل هەر زیاڎ مەبۊ
خاتر وە خەیاڵ تۊ هەر شاڎ مەبۊ
جە سەودای عەشقت ساتێ نیم خاڵی
پۊشانم نە وەر بەرگ عەوداڵی
ڕۊوان تۆ نە دین شەوان دادمەن
وەفای قەڎییمیت هەر نە یادمەن
نمەشۊم نە ۋیر تا وە ڕۊی مەردەن
سەوگەند ئەو سەوگەند چەنی تۊم وەردەن
تاسەر وە حەڵقەی تەنافت نەشۊ
تا چەم وە کەعبەی تەوافت نەشۊ
تا پام وە پاوەند عەشق تۊ نەشۊ
تا دڵ وە مەینەت مەشق تۊ نەشۊ
تا سەدای شینم چوون جاران نەشۊ
تەپڵ بەڎنامیم وە شاران نەشۊ
تا هوون جە زامم وېنەی ئاو نەشۊ
تا نەتۊی جەرگم جۊی زووخاو نەشۊ
تا ئەسرم وېنەی شەتاوان نەشۊ
تا ناڵەم وە پای سەرکاوان نەشۊ
تا دووی هەناسەم وە ئەفلاک نەشۊ
تا سۆز ناڵەم نە تۊی خاک نەشۊ
شەرتەن غەیر جە تۊ، دڵ وە کەس نەشۊ
خەیاڵم پەی غەیر وە عەبەس نەشۊ
سیوای تۊ هیچ کەس وە دڵسوز نەکەم
سیوای تۊ پەی کەس هوزە و هوز نەکەم
غەیر جە تۊ هەنی کەس وە لەیل نەکەم
کەس وەجای ئومېڎ وەفا و مەیل نەکەم
کەس وە ئاشنای دیڎە و دڵ نەکەم
یانەی کەس هەرگیز، وە مەنزڵ نەکەم
غەیر جە تۊ دیڎەم کەس وەیار نەکەم
وە سەوگەند کەس ئیعتبار نەکەم
پەی کەس سەر وە کۊی رَای مەینەت نەکەم
ڕەفیق ناڕای بیبەینەت نەکەم
شەوان ۋیر مەیل وەفای کەس نەکەم
هەنی ڕای جە دەس جەفای کەس نەکەم
سەیادی هەردان شابازی نەکەم
سەیاحی شاران دڵوازی نەکەم
غەیر جە تۊ ئازیز کەس وە دۊس نەکەم
ۋیم ئەوگار دەرد بەڵا و کۊس نەکەم
وە مەیلت قەسەم نۊ نەمام نۊ
مەیلم کەس نیەن سیوای مەیل تۊ
شەوێ چوون شیرین شۊخ شەم‌چارە
بۊ وەلای کۊکەن سیای ستارە
مەرهەم دەر وەڕووی زامان کاریم
گۊش دەر وە ناڵەی شەوان بېداریم
بەڵ وە ئامای تۊ ساکن بۊ دەردم
کۊتا بۊ دووکەڵ هەناسەی سەردم
وەرنە وە تیرت چەپەرەن جەرگم
حازر کەر خەڵات ئیمشه و پەی مەرگم
باقی وەسەلام ئازیز دڵبەر
ها کەوت ئەو دیوان ڕۊی یەوم‌المحشر.[1]