پەی دووری یارۍ، شاعېر هەر داڎ و بېڎاشەن، شەوان تاکو وە ڕۊ هەر فەریادشەن، ئارەزووش هۊرگېرتەی عەسا و کەشکوڵیەن، مەجنوون ئاسا حەزش جە کەش و کۊیەن. هەرچن ئی شېعرۍ دلۍ دیوانەکەو میرزا ئۆلقاڎرینە تۊمارە کریێنە، بەڵام من ئەجۊم شېعرەو شاعېرێ تەرینە کە وېش خزنانەنە دلۍ یانەو شېعراو میرزای، هەرچن سەرەتا بە سەلېقێ شاعېرانە مجیێنەرە، بەڵام دېڕە دمایینەکانە لاسەنگەو بۍ ڕەنگە بەرمەگنۊ.
قیبلەم یاڎمەن...
قیبلەم یاڎمەن، قیبلەم یاڎمەن
تا مەحشەر مەیلت هەر نە یاڎمەن
پەی وەسڵ باڵات شەوان داڎمەن
ڕۊوان پەی دووریت هەر فەریاڎمەن
(دایم الاوقات) ئاهوو ناڵەمە ن
ناڵەی من باعیس عەجز عاڵەمەن
چوون مەجنوون ماوام نە هەردە چۊڵەن
ئیرادەم کەڵپۊس عەسا و کەشکۊڵەن
تەمام بېتاقەت بېئارام تۊم
تەمام سەرگەردان خۊش خەرام تۊم
تەمام پەشېوحاڵ پەشېو ڕەنگ تۊم
تەمام بېزوان لاڵ و لەنگ تۊم
تەمام بېدەماخ وەفا و مەیل تۊم
وە مەیلت مەجنوون کۊی دووجەیل تۊم
قیبلەم جەمینت جەی دنیا تاقەن
دیڎەت مەعلوومەن فتنەی ئافاقەن
زوڵفت چوون قەیتان ساف و بېگەردەن
گره و جە شەوبۊی کۊساران بەردەن
گۊنات گوڵ تەبەق گوڵنار شارەن
نامت نە عاڵەم دایېم دیارەن
لېوت چوون کاغەز ئاڵای مەرجانی
بەتاڵ کەردەن ڕەنگ لەعلی یەمانی
نمەز دەهانت غونچەی نۊخېزەن
یا قتووی مەعجوون ئەفلاتوون بېزەن
بۊنی هەناسەت عەتر عەتارەن
یا شەفای دەرمان دەرد بیمارەن
زنجت نارنجەن یا سەیف خانسار
یاقوببەی مەعدەن تەڵای دەست‌ئەفشار
گەردەنت بلوور یا تاج تاۋوس
یا شیشەی بلوور خاس کەیکاووس
بینیت تەخت عاج یا سەفحەی سیمەن
یا گوڵی گوڵزار باخی نەعیمەن
نافت ناف موشک ئاهوانی بەڕ
نەرم‌تەر جە پەڕ، شیرین‌تەر جە زەڕ
خولاسەی کەلام جە پا تاکو وەسەر
هیچ عەیبت نیەن نەمام نۊبەر
بەڵام جە دووریت ها بیم وە قەقنەس
دەخیلەن فەڵەک هیجران وەسەن وەس
دیسان هەم جە نۊ چەرخی وەردەوە
مەجنوون حەواڵەی لای لەیل کەردەوە
یا خۊ بدەر پېم تۊ مەیلت ئەی گوڵ
بەڵکم نەمروونە من وەی دەرد دڵ
با ئیستە وە حاڵ دەردم نەزانی
مەردەیم وەشتەرەن جە زیندەگانی
یاری ئازیزم عومرم چاوەکەم
جاگەی ئاسایش خورد و خاوەکەم
ئا وەختە قەسەم وە من مەوەردی
ئیکرام شیرین شاهی مەکەردی
مەخیزیای بە ناز به و دەماخەوە
وە یەک تای چارشېو تۊی دوولاخەوە
گا جە دەروازە، گاگا جە یانە
گاهێ جە ئەیوان یا باڵاخانە
شەرت شەرعی بۊ شای شیشە گەردەن
هەر وە یاڎم بی تاکو وە ڕۊی مەردەن
وە دیڎەت قەسەم شۊخ شیرین حاڵ
جە دووری باڵات، ها بیم وە زوخاڵ
ئازیز نەواچی واڎەش خەلافەن
وە خاسان قەسەم دەرونم سافەن
نەخاو نە خۊراک نە کەیف نە ئاهەنگ
نە زەوق نە شاڎیی نە چەقانەی چەنگ
نە هەوای دءسی نەمەیلی یاری
نە تاوش ڕاە، جە ڕاویاری
عومدەی خەیاڵم وەسڵ باڵاتەن
ئارەزووم دیڎەن خاڵ ئاڵاتەن
وەیویرم گەرمەن جە دووری دینت
پەی زوڵف ئەفشان دەوری جەمینت
جه و ساوە زووخاو عەشق تۊم وەردەن
مەر حەبام چەنی بەشەر نەکەردەن
سا ئازیز بۊرێ خانمە خاسەکەم
ڕۊحی ڕەوانم چاوە ڕاسەکەم
ئەر فرسەت دابۊ چەواشەی چەپ‌گەرد
لەیلۍ سەڵامەت مەجنوونش نەمەرد
هەرکاتێ زانای دیسان هەم جە نۊ
ماڵام نە دیڎەم گەرد پاڵای تۊ
وەر ناستش دیڎەم، نەداروو تاوان
کۍ جە دنیای دوون، وە مەرام یاوان
هەر وەختێ عەرزەم نیازتەن وانی
مەبۊ جوابم زووتەر بکیانی
باقی وەسەلام یاری وەفاڎار
بانوی بانوان، نازاران شار.[1]