بنەچەو بەگزاڎەکا هۆرامانی
بەشۊ سېڼزەهەمۍ

عەلی مەردان سان:
پەی نیایۆ کېشە و ئاژاولا مېیانو سانەکا هۆرامانینە، بەشێ جە حوکمرانەکۍ ئەردەڵانی کۊششان چا بارۆ کەردەن، خەڵکانۍ وېشان یاونێنۍ دەسەڵات، پەی ئانەی بتاوان هەرچیشان گەرەک بۊن کەراش، یۊ چا حوکمڕانا کە دایېم پا ڕارە هەرمانەش کەردېنە (خەسرەو خانو ئەردەڵانی) بېیەن.
خەسرەو خان جە دۆری دوەمو دەسەڵاتیشەنە کە ساڵەو (1179ک/ 1765ز) تاکو ساڵەو (1204ک/ 1789ز) درېژەش کېشان، کېشمەکېشی فرەش پەی سانەکانو هۆرامانی وەشکەردەن، پەی زیاتەر یاوایش بە ۋایەکەیش (عەلیمەردان بەگ کورو حسێن سان) و هانەگەرمڵەیش کەردەن بە سانو هۆرامانی و فەرمانو حوکمڕانی ئاڎییش جە دەربارو وېشەنە بە ڕەسمی ۋەلاکەردەنۆ.
مەڵڵا عەبدوڵڵای قازی جە کتېبو (تارېخو هۆرامان) ینە نویستەنش؛
(عەلیمەردان سان) سەرەتاو حوکمڕانیەکەیشەنە تاکو یەرۍ چوار مانگۍ چەنی خەڵکی خاس نەبییەن، بەڵام دماتەر پەی ڕازیکەردەی خەڵکو هۆرامانی، چن کارێش کەردېنۍ، پەی نموونەی:
1-سەرانەش کەردەن بە دوۍ قرووشۍ.
2-هەرگیز جە دە قەرانا زیاتەر جەریمەو خەڵکیش نەکەردەن.
تا ماوەو پەنج ساڵا چەنی (حەمە تایېر سانی) برایش پېوەرە حوکمڕانیشان کەردەن، دمای ئا ماوەیە حوکمڕانی لهۊنیش ئەسپاران بە (فەتح عەلی سان) ی.
دماتەر فاڕیایێ دلۍ دەسەڵاتو ئەردەلانەکانە ڕوۋەشدا، (جافر خانو زەندی) ئاما سەرو ویلایەتو کوردەسانی، ۋاڵۍ (حەمە تایېر سان) ی ژەنیش بۍ، پا بۊنۆ حوکمڕانی هۆرامانیش ئەسپارا بە ژەنبراکەیش، دمای ئانەی (یوسف سان) هۆرامانی جیامازۊن، ڕوە کەرۊ شارەزوور، بە هامکاری لەشکەرو (ئیبراهیم پاشاو بابانی) هېرشش ئاردەن سەرو هۊرامانی، ئینەیچ بېیەن بە هۊکارو دابەش بییەی هۆرامانی پی تەرزە:
(عەلی مەردان سان) جە (نۆسووڎە) حوکمش کەردەن و باقی خاکو هۆرامانی چېرو دەسەڵاتو (حەمە تایېر سان) ینە بییەن.
(عەلی مەردان سان) ڕاو گېڵایۆشەنە پەی (نۆسووڎۍ) نەوەش مەگنۊ و هەر چاگە ساڵەو (1223ک/ 1808ز) کۊچی دمایینش کەردەن.[1]