بنەما بنەڕەتیەکۍ ڕاوڕەچەو یارسانی
بەشۊ یەکەمۍ
دیڎگاو یارسانەکا پەی وەشبېیەی دنیێ:
یارسانەکۍ ماچان جە ئەۋەڵۆ هیچ چېوێ نەبېیەن، (مەولا) دوڕ بېیەن دلۍ دەریاینە (ڕۊخانەینە) ، دلۍ هەرچاگە زیانەرەو دنیاش خولقنێنە و نامۍ وېش نیان (خاوەنکار) ، عەرش و کورسیش وەشکەردەن، (72) هەزار ساڵۍ کەنارو ڕوخانەینە بە تەنیا بییەن، دمایی جوبرەئیلش وەشکەردەن پەی هامڕازی ۋېش، ئینجا فریشتەکۍ تەرېش وەشکەردېنۍ (ئیزرائیل، میکائیل، ئیسرافیل) ، وەختێ گەرەکش بېیەن مروڤی وەشکەرۊن، فەرمانشدان بە فریشتەکا خوڵەو کەشو (سەرەندیل) یش پەی باران، ئیزرائیل خوڵەکېش ئاوەردېنەو خەمیرەشا چەنە وەشکەردېنە، ئینجا سەرو شېۋەو (مەولا عەلی) قاڵب مجیانەرە و (خاوەنکار= خوڎا) دلۍ تەنو (مەولا عەلی) نە ۋېش ئاشکەرا کەردەن، فریشتەکۍ گردشان قلۊرەشا پەی بەردەن، چن دېڕێ جە سروودەو ژمارە (1) چا بارۆ:
حەوت دووتەن بەیان، بۋاچان پېتان
نە حەقیقەت بزانان، مەعلووم بۊ لېتان
ئەوسا نە لەو بۍ، نە ئاریا بۍ
نە ئەرش بۍ نە فەرش، جیهان دەریا بۍ
مەولا ڤە دوڕ بۍ، دوڕ ڤە تەی دەریا
ڤە دوڕ بەرئاما، جیهان کەرد مەهیا
نام وېش نیا، ڤە خاۋەنکار
عەرش و قورش و فەرش، ئەوسا دا قەرار.
بە درېژایی دۆرەو ژیۋای، خوڎا حەوت جارۍ ملۊ دلۍ تەن (لاشە) و مروڤی، هەر جارێچ چوار فریشتېش ئینێ چەنی، یارسانەکۍ پاسەمزانا کە (محەمەد د.خ) یۊ بېیەن چا فریشتا چەنی (عەلی کوڕو ئەبوتالیب) ی ئامان.[1]