لاچەمۍوی خېرا سەرو ڕۊمانەو (دێڕ بە دێڕ حەسرەت)
بەشۍ: یەرەمە
نویستەی: #هەورامان ڕۆستەمی#

شەخسیەت پەردازی:
یۆتەر چا خاڵا کە حەز کەروو پەیتا بەیان کەروو، شێوازوو ئەژناساو شەخسیەتەکاو ئی داستانێن، بە پەیلواو من ئێڼە ژیرانە و ئۆستادانە شەخسیەتەکێ ئەژناسیەینێ کە پېسەو کەلاسوو دەرسی تارېخو نیشانەو مسیارەکاش بڎەی.
پی شێوە نویسەر ئی کارشە کەردەن کە پەلەش نەکەردەن پەی ئەژناسناو شەخسیەتەکا، هەر کام یاگێوە تایبەتەنە باسش کەردێنێ، پەی نموونەی چن جارێ نامۍ فاتمێ مامۆزایش یام کەمال و جەمالی برایش مارۆ و هیچ مەواچۆ، چوون چا سێکانسەنە ئاڼە کەمال ڕۊڵش نەبېیەن و ویەرۆ سەرشەنە، بەڵام یاگێوەنە کە کەمال ڕۊڵی عالتەر وینۆ و چا فەزانە ئەوەجاش هەن کە ئېمە جەماڵی یام کەمالی بژناسمێ، ئێتر دەس کەرۊ بە ئەژناسنایش و باسوو بەژن و باڵای و ڕەفتار و کرداریش کەرۊ، کە نۆعوو وېشەنە تازەگەرین و فرە دڵچەسپا و سەرو وانەری چا ئەوەڵاوە بە ئەژناسناو شەخسیەتەکا مەژغووڵ نمەکەرۊ.
دیالۆگ:
بە وردی دیالۆگ هەن دلێ ئی داستانێنە، بەڵام بە نێسبەتوو شەخسیەتەکاش و فرە بېیەیشا فرە کەما، بەڵام هەر یاگێوەنە گەرەکش بیەبۆ چېوێو بېیاڤنۆ زەینوو وانەری دیالۆگەنە پەڕوو پۆسی ئاردەنش و کاروو وېش کەردەنش، پەی نموونەی چن کەلیمێ و جۆملێ ئینەی دلێ ئی داستانێنە و یەک دنیا قسە و باس هەن سەرشا کە نویسەر تەنیا قاڵبوو دیالۆگێوی کۆتایەنە ئاردێنېش و تەفسیر و دەرکشا وستەنش سەرو شانەو وانەری، پەی نموونەی تەنیا ئېشارە کەروو بە چن خاڵا.
چی چەم نمەوزی فاتمێ مامۆزایت.فەرهەنگوو غەڵەتوو مۆقایێسەو بەینوو زاوڵا.
خوا تەختە ڕېک وزا.
پەی کناچۍ عەیبا
شێتەنی، ئاوڕووما بەری
هاگات ئاوڕوو تاتەیت بۊ تۊ کناچېنی.
بەژنت گېیانش وستەنەنە ولە گوڵاواو گجیەکەیت.
هەر ڕەنگێو کەریەنە ماناش پنە مڎەی.
کناچۍ کناچۍ وېتانە، من پیایانە کناچېم دەینە.
هەر عەسر وەڵێ ئانەی یۆترینی وینا مشیۊم مارە بڕیا، نامەحرەمێنێ.
مەکان:
فەزاسازی و فەزا وەشکەردەی.
هەر کەس ئاشناییش بۊ بە قەڵەموو نویسەری مزانۆ کە ئەسەرە وەڵینەکاشەنە ڕېک‌وپێک ئېشارە نەکەرۍ پەی مەکانوو داستانەکێ، یام واچۍ دەگایېوەو هۆرامانی یام پېسەو سەبکوو بەختیار عەلی نامۍ تاشێ پەی دەگا و شارەکاش، بەڵام دلێ ئی کتېبېیەنە نویسەر بە وردەکاری ئېشارە کەرۊ بە مەکانوو داستانەکێ و دەقێق و بە درۆسێ نامۍ دەگایەکاو دەورو بەروو شاروو هۆرامان تەختی مڎۆ، باسوو باخ و هەوار و زیارەت تەڵانەکاش کەرۊ، پیشالیار، سەرو پیری، کەماڵا، بەڼەن.
فەزاسازی دلێ ئی داستانێنە فرە عال نېیا و بەڵام لاوازیچ نیا، پەی نموونەی وەختێو باسوو یانەو وېشا یام یانەو هەسوورەیش کەرۊ تەنیا ماچۊ دوێ چەمۍ یانێ بێنێ، یانە بنارینەکە، ئۆتاقەکێ.
نویسەر بەهەر مەرامێو هەن کە من نمەزانووش ئاڼە باسوو وردەکاریەکاو مەکانی مەکەرۊ، پاسە باسوو هەستوو وېش کەرۊ و پەیوەنیش چنی گېرمێ، ئاڼە فەزاما پەی مەخۆلقنۆ کە وەختێو ماچۊ لوایمێ باخەرە منی وانەر هەست کەروو کە ئینانێ باخەنە.یام ئینانێ پیشالیار،
بەڵام تەنیا بەنام بەردەی کۆلیەتوو مەکانی و وەزعیەتی جۆغرافیایی مەحاڵەکەی ڕازیە بۊ و فرەتەر هەوڵش دان کە ڕۊحیاتوو سارای جە باری دەروونیەوە بژناسنۆ پنەما نەک چېوانێوتەر.
زەمان:
هەرپاسە کە جە سەرەوە ئېشارەم کەرد، زەمانوو ڕەوایەتوو داستانەکێ وېش تازەگەریش پوەن، بە فاڕای زەمانی وانەر زەینش جە مانیایی مسیۆوە.
پەی زەمانوو دلېنەو ڕۊمانەکێ نویسەر بە ئېشارەش بە چن خاڵا مۆستەقیم مەواچۆ ساڵەو چڼی بۍ، بەڵام وانەر وېش مشیۊم بزانۆ کە زەمان پنەما ماچۊ کە ئی داستانێ وەختێو بېیېنە کە ماشین بېیەن، جاڎەو بەڼەنی بیەن، تەلەفوون بېیەن، بەڵام باسوو مۆبایلی نمەکەرۊ، ماهوارە و تەلەفزیۆن و
کە پاسنەن زەمانوو ئی داستانێ فرە کۊن نیا.[1]
‌