ژیونایۆ شېعرەی هۆرامیۍ
بەشۍ: نۊهەمە
نویستەی: #ڕەئوف مەحموودپوور#
یەکەمین بەیاڼامه و ژیونایۆ شێعرێ هۆرامیێ
دەقوو ئارۊی ئیتر خوانەی حازرە نېیەنە تاوەکوو بەئاسانی وەردەسنەبۊ، بەڵکوو دەقێوە دەمهەراش و ئەکتیڤ چنی وەردەنگېوە وریا و هووشېیاری گنۊ چەلەحانێ و بەئاسانی وېش مەدۊ دەسۆ. پەی بەدەس ئاورڎەیش لازما وەردەنگ وېش ئامادە کەرڎەبۆ و زەینە و ۋیریش وزۆ هەرمانە و تەنانەت زەحمەتوو شۊنیرەگېڵایچ بدۆ بە وېش. مەبۊ چانەی غافڵێ بیمێ کە دەقی سەردەمیانە، یەک ڕەهەندی و یەک مانایی نېیا و کریۆ چنی جۊروو ئامادەیی و هۊشیەتوو وەردەنگی ناواخن پېشکەش کەرۊ. چوونکای دەقی ئارۊیانە گرڎچیوی مەدرکنۆ و بەشێوەش مازۆوە پەی وەردەنگی تاکو جە ڕۊتوو دال مەدلوول (دەنگاژ دەنگاژۆ)یەنە لەیەکش بدۆوه.
ڕەنگە مەژگوو وەردەنگو ئېمە خوو پنە دریا (موعتاد) بۊ و عادەتش بە شیوازێوە تاییبەتتی کەرڎەبۆ و سەرو ئەسپوو وېشۆ نەوەزۊرە، بەڵام بە دڵنیاییەوە دەقی ئەکتیڤ کاتیێ گنۊ گەمه و هورڕووشکنایۆ دەقی وېیەردەی، وەردەنگیچ هورڕووشکنۆوە و چنی ڕۆتوو وېش، وەردەنگی تاییبەتت وێزۆوە یان پەروەردەش کەرۊ. ئینەیچ هەنگامێنە جە وەرۋستەی ڕۆتەکەی. ئەزموونەکېچ ئینەشا سەلەمنان. هەرئینەن ئیتر ئېمە وەردەنگی یەکسانما نېیا و جە ڕاسیەنە باویچش مەمەنۆ، بەڵکوو بەپاو زانیاریی و ئامادەیی و وریایی کەسەکا، وەردەنگیچ فاڕیۆ و جۊروو مامەڵەی ئاڵ و گۆڕش سەرنە مێ. ئیتر وەردەنگ ماتڵ نېیا تاکو بلۆ سەرو خوانێ ئاماڎێ و چەمەڕاو مانا یان لەزەتێ تاییبەتتی جە دەقی کەرۊ، بەڵکووم بەپاو زەینه و وېش چنی دەقی گنۊ دەمدوو و مانا یان لەزەتش چنە کەشف کەرۊ. پەوکای دوور نېیا وەردەنگیچ بەجۊرێوە خەللاق بۊ بەتاییبەتت کاتیێ وەردەنگ تاکو ئاستۊ ڕەخنەگری بەرزبۊوە. چی قۆناغێنە ڕۆتوو ڕەخنەیچ سەرهۆرمڎۊ و وەردەنگی ئامادە و ساحیب هاز، گنۊ وانایۆ دووباره و دەقەکاو و کەشفی تازەی و تەنانەت هورسەنگنای دەقەکایچ . چېگەنە ڕۆتی شێعریی ڕوو بە پەردا‌خیی ملۊ. پېسە واچی کاروانەکە بە کامڵی گنۊ ڕا، بەڵام ڕاکێ ئەوەنەبڕیێنە و مەنزڵە نادیارە.
کۆتایی:
جە کۆتاییەنە ماچوو:
نەرم
پېسە قژاو شەمێ و
بێدەنگ
پېسە ناڵه و شێعرێ
گېیان کارەوان
ئارام ئارام.[1]