یاڎەوەریێوەم جە شەوەو بەڵخەی
زەمانیو کە بەلخە قەرەبالخ و ئاوەدان بی، لامزگی ویرەگانە جمەش ئێ چەنی خەلکی، هەرزەکاری پرتەقاڵی شانینی سەرو سورەچنارەکەو مزگیەرەو ئیمەیچ زاروڵی بینمی لوینمی چۆدیم و دەساوەکینە گیرینمیشاوەو وەرینمیشا. ژەنی هانەوە ئەیینێ و دلی ئا قەرەباڵغیەنە سەرە ۋزینیرەو بە سەتڵەکیشاوە یام کونەکەیشاوە لوینێ یانە. هیشتای ڕژیمو سەدام حسێنی نامابۍ سەرو دۆری، لاکین ئەحمەد حەسەن بەکر ڕەئیسو ئێراقی بی. حیزبە حیزبالی هیشتای نەلێبی یانەو کەسی و هارگاو یانەکا هەر یەک هارگابۍ. کوچېو ئەمن و ئاساییش بۍ، ڕزق و ڕوزی تاکو ڕادیو مەردم قەناعەتش پەنەبی. قۆمی و سیلەو ڕەحمی فرە عال بی و هیشتای یاگینەبی. خەلکی زیاتەر بە کارو کاسپی باخداریۆ خەریک بی. هامنەنە خەڵکو دەگی دەگا ئازی جیاو کوچش لوی باخ. سەمەرەکەیشا جەمکەرینی و دینیش خەرجی و قوت و زاروڵا. زمسانیچەنە بەشو ئانەیە هەر قاییم کەرینی کە پەکەشا نەگنوو. خو ئەر ساڵەیچش فرە توشەبیێ، خەڵکو دەگێ هامکاری یۊترینی کەرینی. ئەر هەرمانکەردەی بیێ پەنەش واچینمی دەسەوام، ئەریچ بارەهییزمیو بیێ تاکو یاووو لا قوتەرلیوی پەی گڕنای سوبەی خەڵکو دەگێ درێغی نەکەری.
شەوینە شۆنشینی لا یەکتری و شۆچەرە واردەی ئانە هەرباس مەکریوو. جیای گردو چراخانیوی فانوزەبی، تازە تاک و ترا لوکزە ئامێبینە. ویرم مێ وەرویوەی فری وارێبی، بڕواتا بوو وەشەویسا، ئا پەشتەو یانەو ئیمە کە ئیسە بېیەن جادەو سەیارەکاشا مارا لا مزگیەنە مدرناشا ، ئڼە وەروەش چەنەبی خەڵک سەرو بانېیەنە لوی پەی لامزگی. تاتەم ماچو بابلمی پەی یانەو لالو حەمەیم. مەشهورا بە حەمە شوان کە کەرو لالو تاتەیم. ئەڎایچم ماچو پی وەروینە کوگە بلمی، یاگیوۆ گیروەرمی. دیاربی تاتەم هەر عەزمەش جەزمەبی ، کاشی عەمەل ئاما دمای نماو مەغریبی و نان واردەی، سیفی گریێ و پیازی سوری ئێرانیما بینی فرە لەزەتیی بینی، تەمام تاریکناشەرەو لوایمی پەی یانەو لالو حەمەی. لالو حەمەیچم بە حکمو ئانەیە کە شوانەو بەڵخەی بی، دوی تووتی خاسی و توکنی زلیش بینی، فرە تەرسینمی وەرو توتەکا، وەلێم کە نزیکی بېیەیمێ وەش بەختانە نە تووتەما دی و نە حەپە، مەزا چکو بینی. دوی یەری پلەکانی وەرو بەرەکەیشانە بینی، تاتەم لواسەرو پلەکانەکاو بەرەکەش نېیا ملۆ، چیڕەو هوڕو بەرەی لالۊژەن سوەیبی ئاما دەمماوە، کە لوایمی چوەر، کە جە سەرداو بەری نەجاتما بی و بوق و گەرماو سوبەی ئاما گژیماوری هەست و نەستیوی فرە وەشش وست زهن و من. چەنی ئانەیە بۊوەو یانەو زمسانی ئاما گژیمۆری. بویوە کە هەرگیز جە یاڎەوەریەکامەنە گمە نمەبوو، بۊوەو دووکەڵی و هەڵیزاو، کاڎانو گزرەی و چەنی بۊوەو خیگە و ڕوەنی تیکەڵە بییبی. هەتا پاڵاوەژەکەنە بینمی ئی بوی بەتەمامی هەست پەنە کەرینمی، بەڵام کە بەرەو سەرتەر لوینمی بۊوەکی فرەتەرەبی و وەشتەرەبی. چادمای کە لوایمی یانەو میمانی نیشتیمیرە، بوەکی تەنها مەنۆ بۊوەو کاڎان و گزرەی و هەنارو بەی. چادمای من حالیم بی کە ئایانە نیشتیبینمیرە چەنەش پاڵشەنە کاڎانەکەشانە، تەنها بە پەردیو جیاکریابیوە. چوون دمای ئانەیە کە خەیلیو نیشتیمیرە لالوژەن سوەیبیم پەردەکەش لاداو لوا ئۆ دیم و چۆسەرۆ سینیوی فافونی چەرمەنە هەرچی شەوجەرەو زمسانیبی ئاردش ئی دیم. سینیەکەش پەرکەردەبی هەچکوچی و وەزی و لەپورتی هەنجیراو هەنارو بەی. پەی یەکەم جاری کە لەپورتیم واردی ئاشەوە بی. لالو حەمەم ماچو هەنجیرەکی باخ و وەحشیەنی وەردی فرە شیرینی و عالینی.
هەزار وەشڵەیم پا شەوی و پا زروف و زەمانەیە.
هۆرامان عەبدولڕەحمان.[1]