یاڎو قەڎییمیا
بەشۍ: دوەمە
مەحموڎ بەگو بەڵخەی
(تەڵاقم کۆتەبۊ ئەوېتەرېچت ڕاسېبېنی)
پایینو دەرەو بەڵخەی ماچاش پەنە سوڵی، کە بە بڕواو من ئی واژی جە زوانو تورکاوە زەمانەو ئوسمانیاوە ئامێنەنە دلی قەڵەمڕەو زوانو ئیمە کە ماناو (ئاوۍ) بەخشۊ. سوڵی یاگیوەی کویسانەنە ئاوەو گردو دەرەو بەڵخەی گلیرە بۊوە واگە، ئینا چیدیموو دەگاو هاواری و گنو بنەو کەش و شنروی. باخ و باخاتیوی وەشش چەنەن ، باخو سوڵیچ هنو کاک حەمە مینیا کە مەشهورا بە حەمەمین حەمەلاو، ئاڎ ئینا ژیانەنەو یادش گرامی بۊ. سوڵی تاکو دیریو سەمەرش مەنوو پۆکەی جارا باوبی خەڵک واچی بابلمی پەی سوڵی پەی لاو حەمەمینی هەنگور و هەنجیر واردەی. مامو حەمەد و ئوسمان بەگی جەنی مام مەحمودی ( خوڎا عەفوەشا کەرو) هەر بە زاروڵەی ڕەفیقی یوترینیبا. کە با بە هەرزەکاریچ و تاکو کۆتایی تەمەنیچشا هەمیشە وەشی و ناوەشیشا پیوەرەبېیەن. ئی دوە کەسایەتیە مەجلیسشا هەمیشە گرمەش ئامابېیەن چەنی قسەوەشا، فرەو وەختیشا بە ڕاوکەردەی یان مەنەیۊ کەشۆ بەردەن سەر.
ڕویو پاییزیوی دیر بوو، وەلیم هەڵای هەنگوری و هەنجیری یاگە دوورە کویسانەکاوە هەر مەنی با. مام حەمەد کەڵکەڵەو ڕاویو کەشیش گنو سەرە و ، ماچو: مەحمود ؟؟؟!!!
مام مەحمود: بەڵە
مامو حەمەد: ماچی چیش بلمی پێ لا حەمەمینی شەوی لاشۆ بیمی و چادمای کەشیو کەرمی؟؟؟؟
(مام مەحمود هەمیشە قسی وەرانوەری بە یەک دەفعە حاڵیش نەبی پۆکەی عادەتیوش بی قسی دوبارە کەریوە بە یوی. جیای ئینەیە واچو (ها ؟) لەفزو (ها)کەی بە (عا) واچی، کچیو گورج (عا)کەی واچی.
مام مەحمود: عا ؟
مام حەمەد: واتم چی نەلمی ئیشەو سوڵی بیمی و ساحبی بلمی پێ دۆرو (نێجەی) و کەشو هاواری؟
مام مەحمود: کورە هەزار جار بلم.
سەرەتا نەئیشنوو ڕیکی گناو بەڵخەوە تفاق و ویشا و ساچمە کاشا کەرا شانەشاو و گردە نسارەرە ملا سوڵی. یاوا سوڵی بڕیو چڕا ئۆ حەمەمینی کەس دیار مەبوو جوابشا بڎۊوە. پاینو باخیۆ ئەڎاو کاک حەمەمینی، مامژەن ڕەعنا، خوا جە گوناهاو ئادیچی وەش بوو، پاینوو باخەکەیۆ جوابشا مدوە، : هۆ بەڵە هۆۆۆۆو. مام مەحمودیچ عادەتەکەو ویش قزەڵقۆرت!!! منەنا چەنی محەمەدی ئامێنمی، واچە بە حمەمینی چنگڵیو هەنگورو هەنجیر بارو بۍ پەی لایما!!!! (دیار بوو یاگی دیاریکریێ و تایبەتە بیینە)، مامژەن ڕەعنایچ : مەحمود بەگ گېیان دەی فەرماودی وەزدیرە با چایوتا پەی کەروو.
مام مەحمود: لابەرە وەختو ئەرەنیشتەی نیا، واچە حەمەمینی زوو بێ و کچیو تفاقیچ بارو!!
مامژەن ڕەعنا: دەی خاسا سەرو چەما، خاسا.
دمای ماویوی حەمەمین بە چنگڵیو هەنگورو هەنجیرۆ مەیو لاشاو، خێراماو وەش ئامایشاکەرو، دەسکەرا قسەو باسکەردەی. دیار بوو قسەو باسو کەشەوانا پەرسو ڕاوکەردەیاو کوڵیتو فڵانە کەشی و، ئاوەوەرەو فڵان هانەی و، ژەرەژ کوشتەی و هتد.
مام مەحمود: دەنگ و باسو کەشی حمەدمین؟
حمەد مین: هەر فرە وەشا بڕوا فەرماوە مامو ئیساڵ ئڼە ژەرەژ هەن دنیا چارش مەکەرو. ئەوەڕو لوانی دەرەو هاواریم نیاوە هەشتم کوشتی.
مام مەحمود: ئەی تەڵاقم کۆتەبوو درو مدەی. هەتیم دلی دەرەیەنە یو کوڵیت منیوە؟
حەمەمین: بڕواد بوو درو مەدەو، چو وەڵیچۆ لوانی نێجەم نیاوە، لەتیوم پەی ئامێ تەقنێم وەنە لوانی سەرشا میەو یەری بەقی لنگە فری کەرا، سەرەم بڕیو، چینەیەنە بینی بنیەوشا توشەبەرەکیم میەو بنەو هەژگەکی ئۆ لایەنە خشە خشیو مێ، لوانی میەو هۆریشیویچ ساچمیوی دانش بنەو گوشیش، ئادیچم گرت سەرەم بڕی. ئاڕوە ئەجیم تازە ج ئەدا بېیەنا.
مام مەحمود: تەڵاقم کۆتەبوو ئینەیچتە درو مدەی. هەتیم!!!! ئی هۆریشە چەنی لوا قەرەوڵ و ئی تفەنگ و توو پیوە چەنی یەری بەقا کوشتت؟ ڕیشەد بەربێ.
حمەدمین: کورە مامو دەعبا هەر فرە فرەن، تو ئیساڵ کەی زیانیۆ تاکو بزانی چ باسا، ڕو جمعەی بی، ئەری خوا ئەجوم ڕو جمعەی بی (سەعیە کەری ڕوەکەش هوشگنوە) ، چا پاینۆ نیشتەبینیرە لەتیو ژەرەژی پۆدەسۆ پڕی کەردشاوە ئیدەس هەر فرە نزیکمەنە داشاوە، ساجمیوم تەقنیوەنە بی ڕومەڵخەزان، بی بە توزو خوماریو مەپەرسە، لوانی مدیەو فڕکە فڕکو باڵا مێ، یەری بەقیو چیڵیوەم کوشتیبینی، ئەمان بەقی هەر یوشا ئنەو قەلیوی بی!! ژەرەژ هەر فرە فرەن مامو، چیش فەرماوی؟؟!
مام مەحمود: تەڵاقم کۆتەبوو ئینەیچشا هەر ئەصڵو ئەساسش نیا، مەردەد مەردە ژەرەژی ئنە حیزەنە بەیو پاڵو تونە نیشوە، تو کوشیش.
مام حەمەد: خوا ڕیشەد بەربارو حەمەد مین، دەی جا هنو هەری (د..) کەرە قەڵەم ئینەیە منۋېس.
مام مەحمود: لابەرە وەسین حەمەدمین. ئیمە ملی بزانمی دەنگ و باس چیشا، تو چێبە نمو!! تاکو مەیمێ بەش کچیو هیزمە وشکی گلیری کەریۆ و ئێریو کەرۊ پەی چایەکەیو بزانمی خوای چیشش قسمەت کەردەن!!
حەمەمین: خاسا مامو گېیان.
مام مەحمود: حەمەد من ملو پی شانۆریە،تویچ وەرەتاوۆری لوە ! هەرکامما تفەنگما تەقنا ئیتر مەیمیراوە وار لا حەمەد مینی.
پی جورە مام مەحمود و مام حەمەد ڕیکی گنا . یاوا نیمەو کەشی بڕیو مدراو گوشەقوڵاخ مدرا، هیج مەبوو، ناخەڵافەنە تەقەو تفەنگیوی مێ. مام حەمەد دڵو ویشەنە ماچو ئەری وەڵا مەحمودی تەقناش، هەرچی جە مام موحمودیا ئەجۊش مام حەمەدی تەقنا. بەهەرحاڵ هەر یۊشا ئەجۊش ئەویتەریشا تفەنگەکەش تەقنا، گرکەس نیمەو کەشیەنە گیڵوە. پاینو کەشیۆ یەکانگیری باوە،
مام مەحمود: مانی نەبی، ها، دەست وەش چیشت کەرد، تەقەت زوو هورست؟
مام حەمەد: تەقەو چیشی، مەگەر دەنگو تفەنگو تو نەبی؟
مام مەحمود: ئێ بەشەڎ بڕیو، کورە نەوەڵا من تفەنگم نەتەقنان. ئی مشیوم کیبیەبوو ئی کەششە ئارو تیکدا ئۆ ئیمە. دەی تازە هیچ بابلمێ ، .
مام حەمەد: تو جاریو با بلمی ئیسراحەتیو کەرمی و چایو وەرمی و ، چادمای یەواش یەواش گردە دەرۆری ملێ، واچمی چیش هەڵبەت خوای نەکەردەن قسمەد ئی جارە.
هەردوی مەیاوە لا کاک حەمەمینی، مدیا ئێرش کەردەنۆ، کتریەکیش چایەکەش لولەکیشەنە مجیای مجیو وەخت و گریایشاو، چۆلایچۆ جوار ژەرەژی نریێنیرە.
مام مەحمود و مام حەمەد فرە سەرەشا سڕمەنو!
مام مەحمود: ها حەمەمین ئینە چیشا ئی وەزعی؟ کی ئامان لات دماو ئیمە؟
حەمەد مین: وەڵا کەس نامان لام، خێر بەیدۍ.
مام مەحمود: ئەی ئی ژەرەژی کی کوشتنینی؟
حەمەمین: وەڵا ویم!
مام مەحمود: چەنی؟ مەشیو تفەنگیو تەقا تو بیەبی؟
حەمەمین: وەڵا من تەقەو تفەنگو کەسیم نەژنېیەن، بەڵام لەتیو ژەرەژی ئامێ داشا ملمەرە، هەر عاسمانەنە تاپڕیوم کەرد دلیشارە ئا چوارە تەپ تەپ کۆتیرە.
مام مەحمود: تەڵاقم کۆتەبوو ئەویتەریچ وەڵینە واتیت هەر ڕاسینی.
(نێجە)، پەڵە باخیوا ئینا پاڵو هاواریو نزیک و پاڵانیایەنە، نەجەش فرەن ئیتر باخەکەیچ نامیش بە نێجە بەرکەدینە.
(شان)، لێ کەشی بە دریژیەرە ، سەرەرە پەی واری یان وارۆ پەی سەری. لاو کەشیویەرە وەزیەرە یان سەرگنی پەنەش ماچا شانۆری.
هۆرامان عەبدولڕەحمان.[1]