مەجنونیچ لوان پەی کابەتۊڵڵای
نویستەی: #ئەسعەد ڕەشید#
دمای بۍ ئۊمېڎ بییەی تاتەیش و کەسوکارەکەیش کە واز جە وەشەویسی لەیلۍ بارۊن، دمای وېڵ بییەی و دېوانەبییەی زېیاتەریش، یاوێ ئانەی کە بەراش پەی یانەو خوڎای و نزا کەرڎەی پەیش کە بارو عەشقی سەرو شانەیشۆ گېرۊرە، کۆتېڕا.
کاتێ مەجنون و تاتەش یاوێ وەردەم و کابەی (یانەو خوڎای)، تاتەش دەسېس بەرزۍ کەردێ و لاڵیاوە ئەو خوڎای کە عەشق و وەشەویسی لەیلۍ دلۍ دڵ و دەرون و قەیسی (مەجنون)ی کوڕیشەنە هۊرکەنۊ. هەر چا عانەنە مەجنون دەسېش گېرتۍ کابەیۆ و بە دەنگی بەرز لاڵیاوە ئەو خوڎای گۆرەی کە وەشەویسی لەیلۍ دلۍ دڵیشەنە زېیاتەر بکەرۊو زېیاتەر ڕېخە کوۊرە.
ئیتر تاتەش کە ئینەشە دی نائۊمېڎ بی و دەسو مەجنونیش گېرت و گېڵێوە پەی زاڎگا و ماواو وېشان.[1]