نامۍ: مەڵڵا ئەحمەڎ
نازنام: خەرپانی
نامۊ تاتەی: مەڵڵا عەبدوڵڵا
نامۊ ئەڎێ: کافیێ
ڕۊ پېڎابییەی: #01-07-1900ز.#
ڕۊ مەرڎەی: #03-03-1989ز#
یاگۊ پېڎابییەی: #خەرپانی _ هۆرامان#
یاگۊ مەرڎەی: #سلېمانی#
$ژیۋاینامە$
مەڵڵا ئەحمەڎو خەرپانی؛ نامۍ تەمامەش مەڵڵا ئەحمەڎ کوڕو مەڵڵا عەبدوڵڵای کوڕو مەڵڵا ئەحمەڎی کوڕو مەڵڵا قاڎری کوڕو مەڵڵا ئیسماعیلیەن، تاریخو (#01-07-1900#ز.) دلۍ دەگاو خەرپانی، پانیشتو کوردەسانی ئامان دنیا، بنەچەشان جە زانایانو (بانە)ین و باباگۆرەشا جە مەڵڵایانو (بانە)ین، ئیسەیچ وەچەکېشان مەڵڵا جەلال ئیمام و وتاروانو مزگی گۆرەو (بانە)ین، چېگەیچ مەڵڵا نوری وتاروان و مەڵڵاو مزگی سلېمانین.
جە سەرو ئەڎێچشۆ، ئەڎاش نامېش مامۊسا ژەن (کافیێ)، کناچې مامۊسا مەڵڵا تاهیری، کوڕو مەڵڵا ئیبراهیم و کوڕو مەڵڵا حسێنی کوڕو عالم الکبیر و بېیارێ، هامسەرەیچش نامېش (ئایشێ) کناچې شێخ ئەحمەڎ و خەرپانی جە بنەیانەو شێخ عبداللەو خەرپانی، هەر جە زارۆڵەییۆ، وستەنشا وەرو وانای جە شارەکڵەو بېیارێ، کە جەنابو مامۊسا مەڵڵا قاڎری گۆرە، چەنی مامۊسا مەڵڵا عەبدولعەزیزی پەی ماوەو (5 ساڵا وانانش، دماتەر پەی وانای زېیاتەری ڕوەش نییێنە ئێران چەنی مەڵڵا تۆفیقی هامسەفەرۍ یۊترینی مەبانۍ، ئەچگە، جە کاشترومارا جە خزمەتو مامۊسا مەڵڵا سەید حەبیب اللە وانانش تاکو ساڵەو گرانیەکەی. دمای ئا قاتیە، مەڵڵا ئەحمەڎ سەرەمڕە بېیەن جە وانای و لوان خزمەتو مامۊسا شێخ عەبدولکەریمی و جە مەدرەسەو ئەحمەڎبڕنەی، دماتەر گېڵانۆ پەی پریسی، دماجار لوان پەی عەبابەیلێ کە یاگې تەدریسی بییێنە پەی خزمەتو هەر دوە مامۊسایا؛ مەڵڵا حەمەسعیڎ و باباڕەسوڵی، ئەچاگە وانایش تەمامنان، دلۍ ئاهەنگێ گۆرەینە ئیجازەو مەڵڵاییش وەرگېرتەن، دماتەر سەرو داواو خەڵکی و قێخا محەمەڎو خێڵو حەمەیی، مامۊسا مەڵڵا ئەحمەڎ لوان پەی ئاگهی، پېسە مەڵڵاو دەگایەکاو تەپوسەفای و تەپەکوڕەی و شەشکەکې و بەشارەت و کوڵکنی و گۆمەلارە، کە تاکو ئیسەیچ دلۍ ئەرشیفو مامۊساینە چڼین عقدێ و مەسائیلێ شەرعیێ مەنێنێ، هەر ئەچاگەیچ خەریکو تەدریسی بېیەن، چڼەها فەقێیش بییێنێ، دماو چن ساڵێوە گېڵانۆ پەی زاڎگاو وېش، خەرپانی، ئەچاگە پېسە مەڵڵاو مەدرەسەی و هەم پېسە قازی دەسبەکار بېیەن. تاکو ئیسەیچ بەڵگۍ و سەنەڎۍ و عەقدۍ خەڵکو خەرپانی پارێزیێنێ. مەڵڵا ئەحمەڎ سەرو بنەماو شەرعەو خوڎا و پېخامئاوەری (د.خ) نەرم و نیانی و ئاسانکاری و هامکاری هاموەڵاتیاش کەرڎەن. دمای گېرتەرەی دەگایەکانو هۆرامانی بە فەرمانو دەیەڵاتو بەعسی، کۊچی زۊرەملېشان پەی دلۍ ئوردووگا ناچارییەکا، مامۊسا مەڵڵا ئەحمەڎ خەرپانی پېسە چەمساخێ و مۊچیاری کەرێ خەڵکی ئاوارەی، خزمەتشانە بۍ. دمای کیمیاۋارانو شارو هەڵەبجەی، مامۊسا پېسە فرەو خەڵکو ناوچەکەی ئاوارەو ئێرانی بېیەن و جە ئۆردوگاو گەلیارانی سەربە کەنگاوەری نیشتەجا بېیەن. مەڵڵا ئەحمەڎوخەرپانی، دمای ساڵێ جە ئاوارەیی، شەوەو جمعەی (03-03-1989ز.)، دەمژمارو (12) شەوۍ، وەفاتش کەرڎەن و جە زیارەتگاو مەڵڵا مەقسوڎی جە شارو پاوەی ئەسپەردە کریان، دوې ڕوێ دماو وەفاتیش هامسەرەیچش وەفاتش کەرڎەن، دماو وېشا کوڕ و کناچېشا جیا ئاستێنێ بە نڵمەکانو حاجی محەمەڎ زاهید و حاجیە خەدیجەی، کە ئاڎیچۍ چنەها وەچېشا دماو وېشا جیا ئاستێنێ، پېسە بنەیانەو مەڵایا م.مەڵڵا نوری محەمەد زاهید یاگەگیرو تایفەو مەڵڵایا. ئیسفاڎەم جە پەلیانەو مامۊسا نازم مانیای، کە فۆتۆگرافەر و ڕۊنامەنویسەن، وەرگېرتەن.
ئەسعەد ڕەشید.[1]