بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ ویس و چوارەمە
ئاودارایچ جە هۆرامان، دیسان هونەرێ تەرو هۆرامییەکا نیشانە مڎۊن، ئاڎیچ (نۊباوەن)، کە دابەشکەرڎەی ئاوەکۍ ملو باخەکارە بە کات و هەم بە سەرەن. گرڎ باخێ کاتێوەش پەی نریانەرە پەی ئاودارای، کە خاوەن باخ پېوەسەن پا سات و کاتیۆ.
پېسە وەڵېنە باسمانکەرد، زەمینو باخا جە هۆرامان، تەخت نییەن، بەڵکوم بە فرەیی کەشەن، کە بە تەڵانۍ کریان بە باخ، چەنی ئانەیچە جە کەشە دوورەکاوە فرەو خەڵکی باخۍ دەیمیېشا نیێنېرە کە چن جۊرە دارێنۍ پەنەۋازیشان بە ئاودارای نییەن، پېسە دارو قەزوانۍ، کە سەرچەمێن پەی بەرهەمئاوەردەی (وېژەنی). جە کۊتاو فەسڵو وەهارینە (واران بڕان)ی، خاوەن باخ چەنی چن هەرمانبەرێ بە (ترېشتە) چن یاگێنە قەڎو دارەوەنەکەی زامڎار کەران، ئینجا بە هەڕە (کوچەڵۍ) وەشکەرانو لکناشان بنەو بەشە زامڎارەکارە، دارو وەنەکۍ (قەزوانی) جە یاگە زامڎارکریاکانە ئاوێ تاڵە مجۊرە دلۍ کۊچەڵەکا، کە پەنەش ماچان (وېژەنە تاڵە).
جە ئاخر و ئوخرو هامنینە، وېژەنە تاڵەو دلۍ کوچەڵەکا گلېرکەراوە، دماتەر گریناش و کەراشەنە فەردە. کەشە دەیمیەکۍ سوودێ تەرشان چەنە وینان، کە ئاڎیچ سەرچەمێنۍ پەی ئاڵفو حێوانی.
کەلوپەلو باخەوانی:
خاوەن باخۍ یام باخەوانۍ، پەی هەرمان و کارو دلۍ باخەکاشا، پەنەۋازیشان بە چن ئامرازێ هەن، پېسە (زەنگەن، خاکەنازە، پیک، نۋېڵ، تەۋەر، ترېشتە، تەۋەرزین، داسە، دواردی) پەی زەمین کاڵای و داربڕیەی و تەۋەن ماڕای و جۊماڵ کەرڎەی و هۊرپاچای دارا و گیواو دروونای، ...هتر). هەرمانکەرڎەی بە (بېڵە) وەشتەرەن و ئاسانتەرەن جە هەرمانکەرڎەی بە (زەنگەن). بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]