نامۍ: مەهجووری
نازنام: کوردەسانی
$ژیۋاینامە$
مەهجووری کوردەسانی
مامۊسا محەمەڎ عەلی قەرەداخی ماچۊ:
ئا کۊڵەپەشتە دەسخەتۍ چێوەڵ دیېنېم، نامۍ (مەهجووری)م دلۍ هیچکامیشانە وەرچەم نەکۆتېنە. ئانەی ئینا وەردەسەنه کۊڵەپەشتەکەو بابا مەردوخی کوردەسانین، کە نامۍ مەهجووریش تۊمارەکەردېنە، سەروەختو ژیوای مەولەوینە بییەن، نامە شیعریېشان پېوەرە فاڕێنێ، بەڵام ئېڎییچ (مەهجوورە)ن، نەک مەهجووری. هەرپېسە دلۍ شېعرەکېنە نامېش پا جۊرە ئامێنە.
مەهجووری، پېسە شاعېرە وەڵینەکا ئا سەردمە کۊنا، تەنیا بە زوانی هۆرامی شېعرېش نویستېنۍ، چوونکوم زوانو ئەدەبی و نویستەی بییەن، مەهجووری پلێوە باڵای ئەدەبییەو زانستییەش بیېنە، بەڵام چەنی داخۍ ئاڎیچ پېسە فرەو شاعېرانو تەری ، فرەو بەرهەمەکانیش دلېنە شیېنۍ، کەمێشان نەبان کە دلۍ کۊڵەپەشتەکەو بابا مەردوخینە دیارېنۍ، مەهجووری پېسە شاعېرە وەڵینەکا دیارەن شارەزایی خاسش بییەن دلۍ ئەدەب و زوانەکانو عەرەبی و فارسینە، شېعرېچش بە هەر دوە زوانەکەی نویستېنۍ و هۆڼێنێ. بەداخۆ، ئی شاعېرەیچمان پېسە پەنەۋازی زانیاری تەماممان سەرو چەنیبییەی ژیوایش و کۊ بەرهەمەکانیش وەردەس نییەن، بەرهەمەکېش پژگیێ و وەڵێنۍ. بڕێشان فۊتیێنۍ و ئانېچشا کە مەنېنۍ پېسە کۊبەرهەمیش وەردەسۍ نییەنۍ و جەمۍ نەکریێنێ. ئانەی چېگەنە شایانو باسین، یاگەدەسو زانای گۆرەو کورڎی شېخ محەمەڎ مەردۊخی کوردەسانین، کە تەمەنێ فرەش ئەچا مێڎانەنە سەرفکەرڎەن، دەمو ژیوای و نام و نیشانو بەشێ فرەو جە شاعېرەکانو ناوچەو هۆرامانی و کوردەواریش پەی ئېمە زیڼۍ کەردېنێ و تۊمارېش کەردېنۍ.
مەشۊم ئېمە ئانەمان وەرچەماوەبۊن کە مەهجووری و تەماموو ئا شاعېرا هەکە نامېشان دلۍ بەیاز و کۊڵەپەشتەکانە پەی ئېمە تۊمارەکریێنە، چەنی بڕێ جە شېعرەکاشان کە بە زوانی هۆرامی و فارسی و تاکو ڕادێ بە عەرەبی واتېنېشا و جییامەنېنۍ، یاگۍ شانازی ئېمە و میللەتەکەیمانۍ، چوونکووم ئا بەرهەمېشا پېسە چراوێ ڕۊشنۍ بەشێ فرەو تارېخو میللەتەکەمانیشان ڕۊشن کەردەنۆ، ئانەی کە ئارۊ بتاومۍ وېئەرمانایش پۆوە بکەرمۍ، هەر ئا گەنجینە ئەدەبییە پەڕ گۆهەرەنە کە ئینا وەردەسمانە.
چن نموونێ جە شېعرەکانو مەهجووری کوردەسانی:
ئېم شەو دەروونم .....
ئېم شەو دەروونم جۊش نارشەن
ئارەزووی دیدار، وەسڵ یارشەن
پاسە دیارەن ها نە کار سازیی
ئەر وەسوەسەی نەفس، نەدەرۆش بازیی
کاسەی دیدەی کەس وکترنیروی! وەس
نە دەرگای بېچوون، فەرد فریاد ڕەس
نسر ... ! کەچ کەرڎەن گەردەن
ئیلتیجا بە زات، بې هەمتا بەردەن
بەڵگە ئاینەی قەلب ژەنگاریی
صەیقەل پەزێر بۊ، جە لوتف باریی
پاک بۊ نوورین بۊ پەرێ جیلوەی یار
ساقی یار . . . چېش گېرۆ قەرار
ئەوسا (مەهجووری) فاریغ بۊ جە هەم
وېش بسۆچنۆ، چوون پەروانەی شەم.
ئەرۍ سیای بەخت .......
ئەرۍ سیای بەخت مەجنوونی شێوە
مەجنوون کەی چوون من، شێت بییەن لێوە؟!
ئەو یا دۆست یا دۆست شۆغڵ و کارش بی
ویردو ئەورادش، زیکر یارش بی
نوورێ نە دەرون پەیدا کەرڎەبێ
وېش پەی ئەو نوورە، شەیدا کەرڎەبێ
ڕاە بە کار وېش بەی تەور بەردەبێ
غەیر نام لەیلې، گشت گوم کەرڎەبێ
پەری حیجازی! پەی طەور غەیبوور بې
شەو ڕۊ هامڕاز وەحش و طویوور بې
تۆ ماچی عەبای عیشقم ها نە دۆش
نە مەجنوونەنی، نە مەست، نە مەدهۊش
پەی چېش جەی یادش نمەبی زووخاڵ
نمەبی وە گەرد، باد بەردەی شەماڵ
ماشاڵڵا جە قەیس لێوەی وێڵەکە
وامەندەی مەدهۊش، سمکۆی خێڵەکە
بەی طەور ساڵێک بی نە ڕای موستەقیم
بە لەیلې لەیلې، گیانش کەرد تەسلیم
مات و (مەهجووری) دڵ بې وەجدەکە
با ئوستادت ! (قەیس) نەجدەکە
با نام دۆست هەی دۆست هەر نەفیکرت بۊ
شەو ڕۊ دایېم، (الڵلە) زیکرت بۊ
بەڵکو جە ئەلطاف (ڕەحمان الڕەحیم)
چەنی ئیسم و زات، گیانت بۊ تەسلیم
ئېم شەو جە ئەلطاف .....
ئېم شەو جە ئەلطاف ساقێکەی دووشین
شنۆی تا بە صوب، بە بادە نۊشین
جە شنۆی نەسیم جامەکەی پڕ مەی
دڵەی حەریفان، بې مدریای خوەی
دیدەی بەد دوور بۊ جە جیلوەی ساقیی
فانی بین جە زیکر ، یا باقیی باقیی
چوون جە بادەی صاف دەوری دا بە وېش
دڵەی سالیکان، مەجزووب کەرد بە وېش
جە هەر مورغێ دڵ ئارامێ سەندش
هەر یەک نە دەورش، تۊڕدامێ تەندش
ئێستە (مەهجووریی) شادیشەن ئەر چەند
پاش نە کەمەندەن ، تا هەزار و ئەند
ئەی دامە باعیس ڕستگاریشەن
خەڵکان مواچان، گرفتاریشەن.
ئەسعەد ڕەشید.[1]