بەسێ و کوڕو شوانەی
بەشەو یەرەمی
بەسێ، کاتێ زاناش کوڕەکە جە شەڕوو شەیتانی نمێرە واری، دەسش کەرد گرەوای و ئەوەڵاڵیای ، واتش: برا قەسەمت مڎەو پا نان و مەکەیە پێورە سەرو خوانوو تاتەیمەو واردەنما، واز بارە چی ۋیرە پیسەیە، نامووسوو ئی واڵێتە پارێزنە، خوڎا هۊر نمەگېرۆ.
کوڕەکە زاناش بەسێ بە وەشێ نمێنە ڕا، پەلاماروو کورپەکەیش دا و باوشیشەنە ئەڕفاناش. واتش: بەسێ!
ئەر وېت نەوزی ئێختیارم، وەرو چەماتوو کورپەکەیت سەرە بڕوو. بەسێ کاتێ دیش ئا هەتیمە چەمېش سوورۍ بیێنێ و خەنجەرە ئینا دەسشەو و کوڕەکەیچش ئەڕفانان، واتش: ئەی حەرام زادەی خوڎا نەژناش، بې شەخسیەتی نمەک نەژناس، گەرەکتا پاسنە تەرسنیم؟ پا خوڎا کە ئیسە چی مەڕە چوڵێنە دەنگو کەساسی و داماگیم مژنەوۆ. نە تەنیا ئا زاڕوڵە ، وێچم لەت و پەت کەری، نمازوو دەست بیاوۆ بە نامووسیم.
کوڕەکە کاتێ ئێنەشە ئەژنەوی، یەکسەرە شێت بی و پېسەو وەرگی هاریش پەنە ئاما و نەما خەنجەرەکې و نیاش ملۊ کورپەکەی. تاکو بەسێ ئاما و واچۊ ئانە چېش کەری، سەرەو کورپە بې تاوانەکەیش وەراوەرۆ چەماو ئەدێ داماگێ سیاو بەختێشۆ جیا کەرڎەو. واتش: بەسێ پاسیچ کەروو بەوېت، ئەجۊ هەرپاسە وازت چنە ماروو؟ دەی ئیتر واز بارە و وېت وزە ئێختیارم. تاکو خرابتەرت چەم پەنە نەکەوتەن!
بەسێ واتش: چېشت چەنە ئاما کەرڎت، جەرگم بڕیت. ئیتر چ غەڵەتێو کەری؟ قسێ یوەنە و مەکەرووش بە دۆی، تاکو تۊ مەنەنی دەست نمەیاوۆ نامووسوو من. هەر چی قسانە کوڕەکە بە خەنجەرەکې کەوتەنە لاشەو کورپەکەی و دەس و پایێوەش بڕی و جیاش کەرڎێ، ئیجا بە خەنجەرەکې پەلاماروو بەسێش دا. واتش: یا مشیو دڵت دەی پەنەم، یا دڵت دەی بە ئی خەنجەرێ. ڕزگار بییەیت نیا. خەنجەرێش نییا سەرو سینەو بەسێ، بەسێ هیچش پەی نەمەنە بېوە، تەنیا ئا هەناسە ئەوەکڵوزیا نەبۊ ڕوو بە ئاسمانی کېشتش و تەماڎارو ڕەحمو خوڎای کە ڕزگارەش کەرۊ. پەڵاماروو مەچەکوو کوڕەکەیش دا، مەچەکش ئاما دەسشەو. بە گرڎو زوریش کە قینېیەنە چن وەراوەر بییەبێ. مەچەکوو کورەکەیش وەر نەدا و بەرزش کەرڎە و چەقناش لەمەو کۊرەکەیەرە. تاکو کوڕەکەی واتش ئانە چېش کەری، خەنجەرەکېش بەر ئاوردە و دیسان چەقناشەنە سەرو دڵیشەرە، ونی فوارەش کەرد و کوڕە خاو بییەو، جە تەکانێ کەوت.
بەسێ هۆرستەو لوا ئەو لاوە دەس و قاچە بڕیاکەو کورپەکەیش جەم کەرڎەو، وەرو دەمیشەنە نیاشەرە. جە لایێوە ئی دیمەنە و جە لایێوتەر دیمەنەو ئا هەتیمە کوشییایە و جە لایێ تەرەو دیمەنوو سامناکوو ئا مەڕێ، ئا ڕۊە سیاوەیە ئامابێ وەرەو پەیش، بەسێ نقمەو خیاڵا بییێبې و چی دنیانە نەبې.
تاریکی شەوۍ دنیاش گېرتەنەرە. جە دیواخانوو (مەمەن دئاغا) دەگاو (گرگاشێ) جوانێ و پیا ماقووڵێ نیشتێنېرە، بازارو قسا و داستانا گەرما، باس ئاما سەرو ئازایی و نەتەرسی. هەر کەس یاگو وېشەنە وېش بە پاڵەوانێو زانێ. هەر یو دەس کەرې بە داستانێوە جە ئازایی و نەتەرسی وېش. چا کاتەیچەنە زەمانەو تفەنگ و نەتەرسی و زرێنگی بې. پېسەو ئیسەیە نەبې، زەڕ و سەرمایەت نەبۊ، هیچت نیا.
مەمەند ئاغا سەرو دیواخانەکەیەو نیشتەبێرە، واتش: گرم و گاڵش گەرەک نیا، کامتا تاوۆ ئۍ شەو بلۊ پەی مەڕوو سەراشانی و بێوە! ئینەنە پیاوەتی و ئازایی. بزانوو کێ تاوۆ بلۊ؟
بێ‌دەنگی دیواخانەکەش گېرتەرە، کەس ورتەش چۊوە نێ، ئێڎ تەماشەو ئەوی کەرې و ئەو تەماشەو ئێڎی کەرې. مەمەند ئاغا ئاماوە دەنگ و واتش: جارێوتەر دەس نەکەرڎې قسە زل کەرڎەی. ئانا گرەو کەروو، بە قەبرەو تاتەیم هەر کەس ئۍ شەو بلۊ پەی مەڕوو سەراشانی، ئی دەسەسەڕەیە چاگە بنیورە و بێوە، دەسەسەڕەکەش مێشەنە بەر ئارد، کناچەکېم مارەش پەی کەروو و منیوش یاگۆ کوڕو وېم. دەی ئیتر بزانوو کامتا ئازا هەن و تاوۆ ئی گرەوەیە بەرۊوە؟
هۊرگېڵنای پەی سەرو زوانی هۆرامی: ئاریا یۆسفی.[1]