[مەیلی ناو ئازیزانەکەم]
(ئێمە لە یاران بەجێماوین)
لەناو دنیای کاتی و ناکام، یاران یەک یەک نەمان لە لام... ئەوان چوون و من بەجێمام... بۆ حاڵی خۆم وەها دامام... وەکوو (نوورسی) تێر لەو غوربەتەدا گریام... گریام، کە من بەجێماوم... لە دۆستانم دابڕاوم... چاوەڕوانی لیستی ناوم... وەک نێچیری نزیک داوم... بۆ قەدەرێک دانراوم.
یاران! لە یەکتر دابڕاین، ئێوە لەو بەر، من لەم بەرم... تەمەن وەک سێبەری هەورە و ڕێگای بەرزەخ وا لە بەرم... هاکا سەرە گەیشتە سەرم... بەرگی سپی کرا بەرم... دۆشەک بوو بە گڵی نەرم... لە جێی سەرین، بەردێک خرایە ژێر سەرم... بۆیە وەکوو گەڵای ڕەزان کە سەرما هات خەزانەکەن، خەزانەکەم... لەم غوربەتە بێزارم و مەیلی ناو ئازیزانەکەم.
یاران دوێنێ ئێمە و ئێوە گوڵوەنەوشەی بن دارێ بووین... ڕێبواری ڕێ، لە پێدەشتی بنارێ بووین... هاوکارێ بووین... خەریکی کاروبارێ بووین... گەشتی کوێستانی خاڵخاڵ و... خەندە و گریە و ناڵەناڵ و... ڕۆژو و هەفتە و مانگ و ساڵ و... یادەوەری شیرین و تاڵ... بەڵام ئێستا لە یەک دوورین... ئەمڕۆ ئێوە کۆچەرین و... ماڵتان لەو لوتکە شانەیە... بۆ گڵکۆتان دوو کێلی بەرد نیشانەیە.
کە ماڵتان لە دنیادا بوو... دەستمان لە یەک گرێدابوو... بەناو کۆسپ و چاڵ و پێچا ملمان نابوو... پەیمانمان بە یەکتر دابوو... هەرچەندە لە ئێوە دوورم... لەسەر پەیمانەکەم سوورم... عەوداڵی ڕێبازی نوورم.
یاران! ئێوە تەمەنتان زوو کۆتای هانی... کە پێکی مەرگتان نۆشی و، سەراپا کفنتان پۆشی و، خەونی دنیاتان تێپەڕی... نەوبەهارتان سەوزەی تەڕی... هەڵبزڕکا و پوشی پەڕی.
یاران! ئێمەش ڕۆژێک دادێ لاشە تینی لێ ببڕێ... لەناو هێلانەی جەستەدا مەلی ڕۆحمان هەڵبفڕێ... ئەوسا وەکوو گۆزەی بن کڵ... لاشە دەشکێ و دەبین بە گڵ.
ژیان هاتن، مردن چوونە... دوای هەڵاتن، ئاوابوونە... ڕۆژێک دادێ زەوی حەملی فڕێ دەدا... لە دایک بوون و جەم بوونە... فەرمانی بێ چەند و چوونە... وای لەو کەسەی وا دەزانێ مەرگ مانای فەنابوونە.
لەو ڕۆژەدا مرۆڤەکان هەردوو بەشن... ڕوخسار سپی، یاخود ڕەشن... ڕوخسار سپی جوان و گەشن... لە ڕەحمی خوا بەهرەوەر و خاوەنبەشن... بەهەشت پەیمانی خواوەندە... بۆ ئەو بەندەی کە پابەندە... کاتی خەڵات وەرگرتنە... وادەی شکۆفە کردنە... وەچە و باوان جەمکردنە... نە نەخۆشی و نە پیریە و نە مردنە... نە ڕۆژوو و نە نوێژکردنە... نە سەرپێچی و دەرکردنە... ئاهەنگە، یاریکردنە... سوپاسی خواوەند کردنە... نە ئاخێکە، نە ئۆفێکە... شوکرانە و ئۆخەی کردنە... مووەکانیان هەمووی ڕەشە... ڕوخساریان ڕووناک و گەشە... شەنگ و شۆخن، تازە لاون... بە خامەیەک نەخشێنراون... بە فریشتە چوێنراون... میوانی ڕێزلێگیراون.
کەس کەسی تر وەڕس ناکا... هەست بە خەم و ترس ناکا... چی دەنۆشێ، چی دەپۆشێ، ئامادەیە و پرس ناکا.
گۆشتی مەل و میوەی تازە... نیگەران نین، هەمووی هەر بەکەیف و سازە... موڵکی زۆری بێ ئەندازە... هەمووی عەنتیکەیە و شازە.
هەرچی دەبینی نەخشاوە... چڵە گیایەک نەلەخشاوە... وای لەو نگین و بەختەیان... ئاوریشم و تاج و تەختەیان... گوڵزارە، بەهارستانە... باڵەخانە چراخانە... هەر ساتێکی ئەو ژیانە... هەموو دنیای بە قوربانە.
ئەوە ئاکامی ئیمان و چاکەکاریی... بەختەوەریی، پایەداریی... میوانداریی خودای باری... ئیقامەیەک بە یەکجاریی... منداڵ وەک دەنکە مرواری... خزمەت دەکەن، دەخنێنەوە و دەکەن یاری.
یاران هەرکەس کەڵکەڵەی چوونە بەهەشتی لە سەردایە... با خێراکا و لە خۆی ڕایە... چاکە بکاتە دەسمایە.
هۆزانەوان: #مەلا غەریب پێنجوێنی#
دیوانی: #هەنسک و هیوا#. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=