=KTML_Bold=شوباتی داهاتوو=KTML_End=
#ئاریان فەرەج#
شوباتی داهاتوو لە کوردستان هەڵبژاردنە، هەڵبژاردنێک کەمتر لەوانی پێشتر و زۆرتر لە یەکەمین هەڵبژاردنی ساڵی 1992ی دەستپێک دەچێت، ئەو دەمەی بۆ یەکەم جار داوای چانسمان لە جيهان کرد و بە متمانەوە گوتمان: ئێمە شایستەی دەرفەتین.
پێدەچێت شوباتی داهاتوو هەڵبژاردنێک نەبێت بۆ کێبڕکێی حیزبییانەى هاوشێوەی ئەوانی رابردوو، بەڵکو دەرفەتێکی درەنگ وەخت بێت بۆ چانس وەرگرتنەوە و تۆخکردنەوەی وێنەی کاڵوەبووی دیموکراتییانەی ئەزموونی هەرێمی کوردستان و گیان و شەرعیەت بە بەرداکردنەوەی دامەزراوە لەشەرعیەتکەوتووەکانمان و دووبارە سەلماندنەوەی شایستەییمان.
شوباتی دادێ، کەمتر دەرفەتە بۆ سەرکەوتنی ئەم يان ئەو حیزب، زیاتر دەرفەتە بۆ سەرکەوتن و دووبارە هەڵسانەوە و سەرپێکەوتنەوەی کوردستان. چاوی ناوخۆ و دونیاش کەمتر لەسەر کێبڕکێی ئەجێندای حیزبەکانە و چاوەڕوانییەکان زیاتر لەسەر گەڕانەوەی هەموو لایەکمانە بۆ پرنسیپە سەرەکییەکانی دەسپێک و راستکردنەوەی لارییەکان.
لە شوباتی داهاتوودا پێدەچێ پێویستبێ دووبارە سەری رێگەی سەلماندنەوەی ئەو راستییە بگرینەوەبەر کە: ئێمە گەلێکی دیموکراتخوازین و دەمانەوێ لە تاقیکردنەوەی دیموکراسی دا سەرکەوین. سەرەڕای هەر نووچدانێک، بەڵام هەر سوورین لەسەر شایستەیی و سەرکەوتن. وەک چۆن کاتی خۆی چاوەڕوانیمان لێدەکرا لە ژیانی دیموکراتیانە و هەڵبژاردن لە وادەی خۆیدا، ببینە نموونە بۆ عێراق و تیشک بۆ ئەوێندەر بدەینەوە. دەبێ هەر وابین نەک هەڵبژاردن نەکەین و بشمانەوێ بە دیموکرات لەقەڵەم بدرێین، یاخود بەهانە بدەینە دەست دادگای ئەوێندەر بەرمەبنای دواخستنی هەڵبژاردن و لەدەستدانی شەرعیەت، دامەزراوەکانمان لەکار بخات!!
شوباتی داهاتوو پابەندیمان بە پرنسیپە سەرەتاییەکانەوە دەمەزەرد دەکەینەوە، لار و وێرى و کەموکاسييەکانمان بەره و چارەسەر دەبەين، بەڵام هاوکات دەست به و راستييەشەوە دەگرين کە سەرچاوەی بوون و مان و دەسەڵات و شەرعیەتی ئەم هەرێمە، گەلەکەى و دۆزی رەوای گەلەکەیەتی، نەک سەرکەتن و لێوەشاوەيى دەستەبژێرە سياسييەکەى، ئەم هەرێمە موڵکی کوردستانییانە کە هەر تاکێکیان لەپێناو دروستبوونی دا چیرۆکێکی پڕ زووخاوی بەسەرهاتووە، بۆیەش دەمێنێ و هەڵناوەشێتەوە و لە بەین نابرێت، کايە و دەستەبژێرە سياسييەکەشى شتێک نين جگە لە ئامراز و کەرەستەى خزمەت بە گەل و بەرژەوەندییە باڵا و نەگۆڕە نیشتمانییەکانی.
شوباتی دادێ دەرفەتى دووبارە دڵنياکردنەوەى هەموو لایەکە لەوەى: ئێمەی سەت ساڵ بۆ ئازادی و مافی مرۆڤ تێکۆشاو، ئازادی و مافی مرۆڤ و ئەو پرنیسپانەی دەیان ساڵە جیهانیان کردووەتە دۆست و پشتیوانمان، بە پرنسیپی نەگۆڕ و باوەڕی پتەوی خۆمان و مافی بەدەستهاتووی گەلەکەمان دەزانین و لێیان ناکشێینەوە، نە گەلی ئازادیخوازی خۆمان و نە جیهان لە خۆمان نائومێد ناکەین.
دۆست و خەمخۆران دڵنيادەکەينەوە کە ناوی پیرۆزی پێشمەرگە لەسەر سوپایەکی نیشتمانیی یەکگرتووی پابەندی خاک و وڵات دەنەخشێنين، نەک لەسەر هێزێکى پەرتەوازە و سەر بە بەشی حیزبەکان. دامەزراوە و دەزگا نیشتمانییەکانمان کە بە خوێن و خەبات بەدیهاتوون، بەرز و بە هەیبەت و دوور لە هەر دەستتێوەردانێک رادەگرین. وەک سایە و سێبەر و مەرجەع لە ياسا و ياساسەروەريى دەڕوانین، هێزە سیاسییەکانمان سەرباری لێکنەچوون و جیاوازی، بەڵام نەک هەر پشتی یەکدی بەرنادەین و پشتی میللەتەکەمان ناشکێنین، بەڵکو لە ئاستانەی داکۆکی لە ماف و نان و ئیستحقاقی گەلەکەماندا، هەموو دەبینەوە یەک و یەک دەست و یەک بازوو. ئێمەیەک کە رۆژگارێک رێگەی پێکەوەیی و یەکدەستیمان پێشانی پێکهاتەکانی دیکەی عێراق دەدا، بە یەکڕیزی ماف و دەسکەوت و بەرکەوتمان بۆ گەلەکەمان بەدیهێنا، چۆن لەو بەغدایەی کە ئێستا جگە لە دەنگی زوڵاڵی یەکدەنگی، هیچ دەنگێکی دیکە نابیستێ، لێکدەترازێین و هەر یەک لە ئاوازێ دەخوێنین!
بە کورتی و کرمانجى: ئەگەر چاومان لە هەستانەوە و بەهێزبوونەوەیە، دەبێ ئەو ئومێدانەی سەرەوە بە خەونی ئەرخەوانی و شاعیرانە نەزانین، دەبێ شوباتی دادێ بکەینە شوباتی پتەوکردنەوەی باوەڕە نەگۆڕەکان، دەمەزەردکردنەوەی بنەما دیموکراتییەکان، گێڕانەوەی هێز و شەرعیەت و متمانە بەدامەزراوەکان و جۆشدانەوەی ژیانی سیاسی و بەرزڕاگرتنەوەی بەرژەوەندییە باڵاکانی گەل و تەرخانبوونی هەمووان بۆ چارەی کێشەکانی ژيانى خەڵکی خۆڕاگر و قەیرانباری کوردستان.
هەر لەم سۆنگەیەشەوە بوو سەرۆک #نێچیرڤان بارزانی# لە وتارەکەیدا لە پێنجەمین کۆنگرەی یەکێتیی نیشتمانی کوردستان، هیچ ئەرکێکی لە پێش هێزە سیاسییەکان و بەتایبەت پارتی و یەکێتی لە ئەرکی سەرخستنی هەڵبژاردنی شوباتی داهاتوو بە گرنگتر و چارەنووسسازتر نەزانی، چونکە بە باوەڕی ئەو، هەڵبژاردن کە بنەماى سەرەکيى رەواييى دەسەڵات و حوکمڕانييە، دەبێتە مایەی بەهێزبوونەوەی هەرێمی کوردستان و هەر بەوەش دەتوانرێ رۆڵ و ئامادەيى و کاريگەريى پێویست لە بەغدا بۆ بەرگرى لە ماف و نان و دەستکەوتەکانى خەڵک دەستەبەر بکرێت. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=