زانایێ ئایینى و خەباتکەرێ کوردینى و رێکا سەرخوبوون و دەولەت بوونێ و هۆزانڤانێ ئازادى بوونێ، ناڤێ وى مەلا محەمەد کورِێ حسێن ە، ل ساڵا(1325 ێ مشەختى _02-11-1905ێ زایینى)، ل گۆندێ (بێدە)ل دەڤەرا (رێکان)ژ مالباتەکا دیندار و ناڤدار هاتیە سەردۆنیایێ، ژ رێڤە(دەسپێکێ)مالا وان ل گۆندێ (بێدە)بوویە، و پاشى مالا خۆ ڤەدگۆهێزنە گۆندێ(مرێبا) ل دەڤەرا(شێخان)،ودژیێ (7)سالیێ دا بابێ وى دچیتە بەردلۆڤانیا خودێ مەزن، وپشتى مرنا بابێ خۆ ب دوو سالان دزڤریتەڤە دەڤەرا (رێکان)و چەند هەیڤەکان دمینیتە ل وێرێ وپاشى جارەکا دى دزڤریتەڤە گۆندێ(مرێبا)و قەستا گۆندێ (خورت) دکەت بۆ فەقیاتیێ و ل دەڤ (مەلا سالحێ خورتى)دخوینیتن،وهەروەسا ب مەرەما خاندنێ چوویە گۆندێ (بێرکیات)ژى ل دەڤەرا (بەروارى ژێرى) یا،پشتى شەهرەزا و زانا بووى و باوەرناما (مەلاتینیێ) وەرگرتى، دبیتە مەلایێ گۆندێ (رویلکێ)، وپشتى هنگى ل چەندین گۆندێن دیتر گۆتارێن ئایینى خواندینە وەکى گۆندێن (بێساتێ، کانى گۆلێ، کەمێ، کوپێ.....)،و هەژى یە بێژین کو سەیداى دبیاڤێ خەباتا کوردینیێ دا ژى مشە بزاڤ و هەڵویستێن وەلات پارێزیێ تومارکرینە، کو ژبەرکو ناڤهاتى هەر ل دەسپێکا دامەزراندنا پارتى ئێک ژ رێکخستیێن پێشەنگ بوویە، لەوما گەلەک جاران ژلایێ رژێما بەعسا عیراقێ یا بنگوربووى ڤە ئالوزى بۆ پەیدادکرن ودهاتە تاوانبارکرن،بۆ نموونە ل ساڵا(1963)ێ حکومەت دهێتە مالا وان ل دەڤەرا بازارێ نەبى ل مویسل ومالا وان دهێتە دۆرپێچ کرن، بۆ گرتنا مەلاى،لێ سەیدا ل مال نەبوو، وخزمێ وى(حەجى تاها)دەمێ زانى دچیت و مەلاى ب ڤێ چەندێ ئاگەهداردکەتن، وسەیدا دهێتە هنارتن بۆ گۆندێ(مرێبا)ل دەڤەرا(شێخان)،و ڤێ جارێ دشێتن خۆ ژدەستێن بەعسییان قورتال بکەتن، وهەروەسا ل سالا(1967)ێ ژى ل گۆندێ (مرێبا)مالا وان دهێتە لێنێرینکرن(تەفتیش)کرن کو مەلاى ل وى دەمى کارێ(برین پێچیێ) دکر،لێ سوپاس بۆ خودێ ل ڤێ جارێ ژى قورتال دبیتن،و پشتى بزاڤ و خزمەتەکا مەزن پێشکێشى ئایین و وەلاتێ خۆ کرى ژ ئەگەرێ وەرگەریانا ترومبێلا وان دناڤبەرا گۆندێن (قەسروک) و(باجەلا_کەڤروکا) ل رۆژا(1412ێ مشەختى_ 17-07-1992زایینى) دچیتە بەردلۆڤانیا خودێ مەزن،ول سالا(2008)ێ دیوانا وى ژلایێ نڤیسەرا هێژا (ژیان عەبدولحەمید عومەر)هاتیە بەرهەڤکرن وچاپکرن.