Beramberî Pêla Şofînî Yekrêziya #Kurdan# Çareserî Ye
Idrîs Hiso

Di dema ku Sûriyê ji Bakur heta bi Başûrê xwe bi xwînê hatiye rengkirin, kesên ku heta duh di bin basikê rêjîmê de bûn û mîna genan xwîna milet dimijandin û mafê xelkê binpê dikirin û hevbeşê hikûmet û rêjîma Be`s a nijadperist bûn, xwe kirine nûnerê gelê Sûriyê û dibêjin em dê mafê wî bistînin û gerdena wî azad bikin.
Kesê ku çûye jibo mafê gelê Sûriyê bidest bixe û îro Serokê Şanda Opozisyonê ya Danûstendinan e li Cinêv, Es`ed Zu`bî, di hevpeyvînekê de ku hate ragehandin ev hevpeyvîn berî çend mehan bû, bi tundî êrîşê dibe ser Kurdan û wan bi xayin û nemirov bi nav dike, û gelek sixêfan jî derheqê wan de dike, herwiha sivkayî bi Pêşmergeyên Kurdsitanê û Şervanên Kurd dike û dibêje: “Kobanê bajarekî Erebî Sûrî ye. Artêşa Azad ew rizgar kir, lê Amerîka 10 Pêşmerge rê kirin jibo bêje ku Kurdan ew bajarê Erebî rizgar kir.” Herwiha serkirdeyê rêjîma Sûriyê û Mamosteyê Opozisyona Şoreşa Sûriyê! Dibêje: “Rêjeya Kurdan li Sûriyê bi tenê ji %1,e ”
Ji bilî gelek sixêfên ku mirov şerim dike li wan vegerîne û qîmet bide xwendevanên wan gotinan.
Rojane bi xêra torên komelayetî û ragihandinê rastiya zihnîyeta Opozisyona Sûriyê ku xwedê giravî bi navê miletê Sûriyê diaxivin zelal û eşkere dibe, bi giştî ew kurdan heta wek mirov jî nabînin, û zen dikin ku ew û tirk tenê xwedan welat û erd in.
Ev yek gelekî ji bo me Kurdan baş e, lewma divê em nas bikin aya hevalbendên me kî ne?
Heta niha diyar dibe ku beşekî mezin ji serkirde û rewşenbîrên Ereban nikarin têbighên ku heger di welatê Sûriyê de ew û Kurd hevbeşên vî welatî ne, heger em nikaribin pêkve bijîn, bila em dirawseyên baş bin, ew qasî me ne mirov dibînin bila xwe ji me dûr bixin.
Daxuyaniyên bi vî rengî ji mêj ve li ser zimanê serkirdeyên opozisyonê hatine der, ji Burhan Xelyûn bigre, heta Coric Sebra, ‘Eta ‘Eta û vê dawiyê Es’ed Zu’bî û tiştê nehatiye diyarkirin dê xirabtir be.
Li gorî min daxuyaniyên bi vî rengî ji kesên ku heta doh, darê zorê li dijî gelê Sûriyê ligel Rêjîma Esed di destê wan debû û xwîna milet dimijandin, vêja di şev û rojekê de heger hatibin nav refên opozisyonê ev nayê wateya ku wan nerîn û ramanên xwe guhertine, belkî hatine ku di riya opozisyonê tiştê di nav rêjîme de jidest dane careke din bi navê ‘irûbet, Islam û mafê gelê Sûriyê xelkê bixapînin û berjewndiyên xwe biparêzin.
Ji aliyekî din ve zihniyeta bi vî rengî gereke zingilê metirsiyê li cem lêbide û em li xwe vegerin aya rewşa Kurdan li gorî guhertinên ku li Rojhilata Navîn dibin dogunce.?
Rewşa Kurdan ya ne liserhev û dabeşbûna wan bo ser çend hêlekî û nebûna yekhelwîstî derbarê mafên serekî yên Kurdan û şêwe û rengê bidestxistina wan mafan, dihêle ku nûnerên me di danûstendinan de bê hêz bin û dengê wan jibo mafê gelê Kurd û gelê Sûriyê winda be û bê qîmet bibe, lewma jibo ku em karibin rêgiriyê li vê pêla şofînî, nijad perist û kultêrxur li Sûriyê bigrin, berî her tiştî divê mala Kurdî were rêkxistin û helwêsta Kurdan jibo mafên serekî û rewa yên Kudan yek helwêst be.
Girîngtirîn xal ew e ku Kurd bi yek dengî xwe ji hemû şandên Opozisyon û Rêjîmê vekşînin û doza şandeke serbixwe û cuda ya Kurdî bikin, çimkî doza Kurdan û pirsgirêka wan li Sûriyê pirsgirêk û dozek neteweyî ye û cuda ye ji kêşeyên taifî û mezhebî li Sûriyê, herwiha Kurd li ser zemînê bi serkeftî şerê Têrorê dikin, beramberî vê serkeftinê Kurd hêjane ku şanda wan ya taybet hebe.
Duyemîn xal ku ew jî gelekî giring e û piştî yekbûna helwêsta siyasî tê, ew jî ew e ku bi hebûna vê pêla nijadperist û radîkal li dijî Kurd û pêkhateyên din yê Sûriyê û Rojavayê Kurdistanê, girînge ku Hêzên Leşkerî yên Kurdî li Rojavayê Kurdistanê bibe yek, bi wateya ku leşkerekî Kurdî û Artêşek Niştimanî were avakirin îdyolocî û baweriya wê ew be, parastina berjewndiyê Gelê Kurdistanî bi hemû pêkhateyên xwe li Rojava Kurdistanê.
bi hebûna yek helwêstî û hêzek kurdî wê Gelê Sûriyê bi giştî piştevaniya me bike, wê demê wê karwanê me bi riya xwe ve here û “ewtewta” hin segan dê ti bandorê li karwanê mirovatî û mafperweriyê neke.
Ji xwe di vê derbarê de kaseytiyên wek Zu’bî ne tenê ji aliyê Kurdan nayên qebûlkirin, herwiha piraniya gelê Sûriyê jî wan qebûl nake, jiber diyar e bê kî bi mafê gelê Sûriyê re ye û kê şoreş û xelkên şoreşê firotiye û pere jî li mêvanxaneyên Stembolê xerc kirine.[1]