داستانۊ گوڵ و بولبولی
بەشۍ پاڼزەهەمە

بەچە بولبول بەبۍ ڕەفېق، سەرەش نېیا وە ڕاو گوڵزاری، بەبۍ ئارام هەتا یاوا دلۍ گوڵشەنی، وەختێ یاوا نزیکو گوڵشەنی، پېسە شېتی پەڕوباڵ مەشانۍ و بە ئاوازێ ناسک مەوانۍ.
پەردەی سەبووریی، پارە کەرد نەوجا
ئاشق بۍ ڕەفیق، سەر نېیا، وە ڕا
بیی وە ڕەفیقش جە ڕا، عیشقی یار
مەکەرد بەڵەدیش، مەسکەنی گوڵزار
لاڎێ، جە لایێ نەگرتش، ئارام
تەی کەرد، مەنزڵان، جە سوب تا بە شام
بەس کېشا عەزاب، جەفای بۍشمار
تا، یاوا، بە شەهر، مەسکەنی گوڵزار
دیواری گوڵشەن دیار دا، جە دوور
تاقەت پېش نەمەند عاشقی مەهجوور
پەڕ و باڵ مەشەند، وە بۍئەختیار
یاوا، نیشت نە ڕووی، دیواری گوڵزار
بە هەر تەرەفدا، وېنەی سەرسامان
نیگای گوڵشەن کەرد، جە سەر تا دامان
حەسرەتمەندانە، جە سەرتا، بە وار
نیگای گوڵشەن کەرد، پەی دیداری یار
فەرشش کریابۍ، تەمامی چەمەن
بە لالە و سونبول، چەنی یاسەمەن
بە ئەکابریی، شاهانە دەستوور
نوورجېش مەخېزۊ، نووری عەلا نوور
نەرگس و نەسرین، لالە و ڕېحان بۍ
ئاب، نە ڕووی گوڵان، چوون دوڕ غەڵتان بۍ
بنازوون، بە سونع لوتفی ئیلاهیی
چەترش پېکابۍ، چوون چەتری شاهیی.[1]