درەختۍ وېڕەسۍ
ئەوەنویستەی و دەسکاریکەرڎەی: ئەسعەد ڕەشید
بەشۍ دوەمە

درەختو براڵوۍ:
درەختێ مېیانییەن، بەرزیش(2-4) مەترەن، گەڵاڕېزەن، بنەشۆ قەڎێ زیاتەرش هەن، تۊکڵو دارەکەی قاوەییێ جوانی بریقەدارەن، جە لقەکاش(گۊچانە، داردەس، کوتەک) وەشکەران، دارێ بەردارەن، بەرێ خڕی ڕەنگاوڕەنگی گولانەی تۊمدار گېرۊن، کە ڕەنگەی سیاوە، زەردە، سوورەش، هەنە، سەرەتاو هامنینە مەیاوۊن، بەرەکەش چن سوودێ تەندرووستیېش هەنۍ(ڕېکۋستەی عادەو ژەنۍ، پاککەردەیۆ سینەی جە چڵکی، پەی تاڵەی(سپڵ)، هەسۍ بەهېزۍ کەرۊن).
بەلوو:
بەرزیش(1-30) مەترېن، گەڵاڕېزەن، وەرگەگیرەن، تەمەن درېژەن، جە کۊتاو هامنینە مەیاوۊن، جە سەردەمو گرانینە، هاڕیانو کریان بە نان، سوودی تەندروستیش هەن(پەی مایسیری، لەم لوای یان ڕەوانی) بەکارئامان.
چەقالۍ:
دارێ مېیانییەن، بەرزیش(2-5) مەترېن، گەڵاڕېزەن، دڕەیینەن، بەردارەن، بە فەریکەیی، یان دمای وشک بېیەیۆ بەرەکەش مەۋریۊن.
کەتیرە، جەوی، سرېشە، هەنگووژاوی:
درەختێ باڵا کوڵەن، بەرزیش(20-50) سانتیمەترېن، بە گیواویچ نامش بەران، گەڵا و لقەکېش توپەڵۍ و پەڕېنۍ، ولێ چەرمۍ مەگېرۊن، ڕەگەکەش پېسە دەرمانی بەکاربریۊن، بەرو ئی دارەیە کەتیرەن، پی تەرزە:
قەڎو دارەکەی، بەرزی (10) سانتیمەتراوە جە زەمینیۆ بڕان، چواردەورش پاک کریۊوە و چاڵی کریۊن، دمای ماوێ لینجاوێ بەرکەرۊن(کەتیرە)، دمای وشک بېیەیۆش، مەگنۊرە وار بنەو دارەکەی، کۊکریۊوە و ورەشیۊن.[1]