شنۊی سەحەر خېز
بەشۍ پەنجەمە
دماجار میرزا بە شەماڵی ماچۊ: حەتمەن وەختێ مەگنی واتەو گۊشگېرتەی چەنی قیبلەکېم (وەشەویسەکېم) ، مەپەرسۊت چەنە: تۊ کېنی؟ چکۊ ئامانی؟ چېشەن پېت هەواڵ؟، تۊچ جوابش دۆ واچە من دېوانەکەو وېت کیاستەنا، فەرهاد ئاساکە، مەجنوون وېڵەکە، منش وە قاسیدی کیاستەن وەلای تۊ، خەیلێن بۊی باڵات نەسیم نەڎان نە دەماخش، دیڎەش لېڵاوەن، گۊشش کەڕەن، داوام چەنەتەن ئەر مەرهەم یا میشک بڎەیم پەنە با پەیش بەروون، بنیۊشان نە سەر زامانش، بەڵکم ساڕېژ بان.
جه و درەنگەدا بشۊ وە پا بۊس
چەم شاڎ کەر وە تۊز، پاک پاڵای دۊس
ئەڵبەت مەپەرسۊ، ها چېشەن شەماڵ
جە کۊ ئامانی، چېشەن پېت هەواڵ
واچە قەیسەکەی زەید تەواساکە
فەرهاد ڕەختەکەی مەجنوون ئاساکە
زام زەدەی خەمان جگەر پارەکە
چەم جە ئەسرین کەیل بۍقەرارەکە
قامەت وېنەی نوون خەم خەم کەردە کە
ئاوارەی وەتەن ڕوخسار زەردەکە
دېوانەکەی وېت دڵ ناشادەکە
فەرهاد سانی، ڕەنج وە بادەکە
فیدات بام ئازیز نەونەمام نۊ
من وە قاسدی کیاست وەلای تۊ
وەخاڵت قەسەم گەردەن وېنەی بەت
هووناو جە زامش جاریەن چوون شەت
یەند ناڵان پەی تۊ وە کاواندا
یەند وېش داوە تاف شەتاواندا
خەیلێن بۊی باڵات نەسیم نەدان بۊش
دیڎەش لېڵاوەن کەڕ بیەن جە گۊش
جە دووریت پاسە نۊشانش تاڵی
هەر وە هەزارحاڵ من کەردەن حاڵی
خجڵەت دەر وەرووی ستارەی سەحەر
ئەر موسڵمانی پەنەم باوەڕ کەر
هەرکاتێ زانای ئانا ئاڎییچ مەرد
ئەویچ چوون یاران تەشریف وە گڵ‌بەرد
دیارەن ئازیز ئەر مەندەبۊش مەیل
وە قەترەی ئەسرین دیڎەش مەبۊ کەیل
مەپەرسۊ ئەحواڵ خاتر خارەکەش
مەجنوون بەڎبەخت بیۍقەرارەکەش
ئەر ڕەنج وەرین من نەڎان وە باڎ
دیڎە وە باڵای کەس نەکەردەن شاڎ
یا مەرهەم یا مشک مەسپارۊت وە دەست
باوەر با ماڵووش نەجای زام شەست
خوڎا حافیزی کەر هەی وە دماوە
دەخیلم شەماڵ زوو پەنەم یاوە
با ماڵووش نەزام من عەهدم کەردەن
یا ساکن جە ئېش یا شاڎ وە مەردەن
وەرنە تا مەحشەر زامم ئەوگارەن
دەوای ئېشی نېش مەرهەمش چارەن
(قاڎر) تا زیندەن خەم نە خەیاڵەن
جا‌ن فیدای لەیلەن عەبد شەماڵەن.[1]