کۊڵە پشتیەی کەلتوریە
نویستەی: #فەرزین هەورامی#
20 ساڵ چېوەڵتەر کە ڕوەم نېیا غەریبستان، قسمەت پاسەبی، وەمایێو دڵوەشی ئانەبی کە جە یۆتۆبوری سوئێدیە پەنام گېرتە. کۊڵێو هۆرامیێ چی شارەنە بێنۍ کە گردینشان، ورکەو، هەم و غەمو زوانیشاو، فەرهەنگیشاو، شۆناسی لاشاوە ورکێوی قوڵ بێ.
سەرەنجم دا هەریۆ بە جۊرێو، سەرە وەریسێوشا گېرتەنو، گردیۆ پێوەرە هۆڵو تەقەلاشا ئانەن گڵێمەی ڕەنگینەو هۆرامانی مەسیرو وېش پیمۆو نەگنۆ زەمین.
یۆ چا کەسە ئازیزا کە ئەژناسام کاک حەمەڕەزا بەهمەنی بۍ.لاو وېما بە حەمەڕەزاو فەتاح بەگی نامېش بەرێنمۍ، بە بۊنەی هامدەگایی بېیەی، هامفکر بېیەی پېسە ۋېیەردەی سیاسی، هەرپاسە ڕەفاقەتی نزیک چەنی تەهای برایما، دلۍ خېزانو ئېمەنە نامۍ کاک حەمەڕەزای فرە ئەژنەوێنۍ. بەڵام ئانە دۆرانێو بۍ کە من زاوڵە بیەبێنۍ ، وە من ئاڎی تەنیا جە ڕاو چن دانا ڕەسمە قەڎیمېیاوە کە دلۍ ڕەسمەکایچەنە قژېش لولۍ بێنۍ ئەژناسێناوە. لاو منێوی نائاشنا بە کاک حەمەڕەزای کە وەڵتەر نەڎیەبێم، چەنی جیاوازی (20) ساڵا سن و ساڵی، هەرپاسە پاشنامو فەتاح بەگی بڕېو پېش داوەریێشا لاو منۆ وەش کەردەبېنۍ ، کە ئی شەخسە ڕەنگا حەر فرە دوربۊ جەمنی ئاوەخت (21) ساڵی جە نەسڵو هەرمانبەریو، هیتیاری،
بەڵام وەشبەختانە پېش داوەریەکێو من هەردوېشا غەڵەت بەرشیێ. کاک حەمە ڕەزێو، فرە خاکی، هۆنەردۆس، وە فرە صاحیب ئاوەزو، کۊمەڵایەتی بەرشی. دیارا بڕېو صیفاتاش سەرسام کەردا، چەنی نەسڵەکاو شۆنەو وېشەرە فرە ڕەفێق بۍ، وە بەپاو توانایش هامکاری گرد کەسی کەر ۍ، زو چەنی ئینسانەکاو دۆربەریش تەماس گېرێ، وە وەڵۍ ئانەیە کە تەعەصۆباتی سیاسی، ئایدئۆلۆژی، وە یا عەشایری ڕاو پەیوەندیەکاش کۊرە کەراوە، عەینەکۍ ورد بینیێ ئینسانیۍ کەرۍ چەمېش.
جە دلۍ جەمعێوۍ سیاسیێنە کە وەڵتەر فیشەکیو، خۆمپارەیو، ونئو، قینۍ پاسەشا کەردەبۍ کە چی پەڕو دنیایچۆ کۊمێنتەکێماو، دیالۆگەکێما پېسە فیشەکەکاو ئۆگەی گڕەشا پۆ وارۍ، کاک حەمەڕەزا چاگەیچەنە بە وێقارو، صاحیبو سینېوی فراوانیو، ئەهلو دیالۆگی سەردەمیانەی بێ.
ئانە نەبۍ جەنابش صاحیب نەزەر نەبۊ، یاخێر چەمېش جە ڕاسیەکا قۆجنۆ، نەخێر قسێو وېش فرە بە نەرمونیانی باس کەرۍ، گۊش پەی مۆخالفیش گېرۍ، وە جە دیالۆگەنە هەدەفش بەزنای وەرانوەری، یا وێ زاڵ نیشاندای وېش نەبۍ، بەڵکوم نزیکۆبېیەی ویروڕا جیاوازەکا بێ.
صیفاتێوتەر کە منی فرە نزیکو کاک حەمەڕەزای کەرېوە، هۆنەر دۆسی و ذۆق و شۆقی هۆنەریش بێ، بەتایبەت هۆنەرو گورانیا، کە فرە جارێ پاڵنیەرێو خاس بۍ پەی کارە هۆنەریەکام.
زیاتەر چینیشا، کاک حەمەڕەزا چن دانۍ نمایشنامۍ هۆرامیانېش چی شارەنە ئەنجام دۍ کە فرە یاگێو ڕازیبېیەیو خەڵکی بێنۍ. چا جۊرە کارانە پەی من کە وېم پڕۆژەێ هۆنەریم ئەنجام دان خاس مزانو سەرەڕای نەبېیەی بودجەیو، ئیمکاناتی فیزیکی چن وەختو، ئانڕژیو، تەحەمولێو بە خەرج دریان.
کاک حەمەڕەزا زادەو، پەروەردەو دۆرانێویو، نەسڵێویا، کە هۆرگیرو هەزاران تابلۆ، نەمادو ئەرزشو، زد ئەرزش، وە یا ئا کۆدە کەلتوریە نایابانە کە مەگەر تەنیا حەواسی ورد وینو کاک حەمەڕەزای بتاوۊ، جارێوتەر ئېمەشا پەنە ئاشنێ بکەرۊوەو، پېسە بەشێو جە کەلتوری قەڎیمی کوردەواریو، هۆرامانی وزۆشەنە دلۍ لاپەڕەکا ڕۊمانەکەیش.
کاک حەمەڕەزا بەشێو چا ورد وینیاشە دلۍ نمایشنامەکاشەنە ڕا کەردېوە، بەڵام زروف و هەم وەزعەکۍ پاسە ئاما وەرۆ دیارا چاڕانە نەتاواش درێژە بە هەرمانەکېیش بڎۆ . جا هەر پیبۊنۆ ئی جارەشا کتېب و ڕۊمانەش هۊرچنیە.
جە ماوەو چوارساڵانە تاکو ئیسە دۆۍ ڕۊمانۍ فرە تایبەتێش پېشکەش بە کتېبخانەو هۆرامانی کەردێنۍ، کە ئەر نەسڵو مەشغوڵو، گرفتارو ئارۊی فرە دەرک بە ئەهمیەتیشا نەکەرۊ، ئانە دیارا مشۊم نەسڵە ئارامەکێو دماڕۆی پەڕە بە پەڕە بواناشاوەو، کەراشا بە سەرچەمەی کەلتوریو، بەڵگەنامەیی گۆزەشتەیشا.
هەرچن گرفتاریو، مەشغوڵیاتو ئۆروپای ، ئیسە کۊرۆنایچش چەنیبۊ، پاسەش کەردەن منو کاک حەمەڕەزا کە ئینایمۍ یەک شارەوانېیەنە یۆتری زوو زوو نمەوینۍ، بەڵام پەرۍ وېرەگا قسمەت نەسیب بی لوانی پەی لایش وە ئاخرین ڕۊمانش بە نامۍ چنارەیش دلۍ تەڵانە زەریفەکاو پەشتەو یانەیشۆ پەنە پېشکەش کەرڎا.بە ئۆمیڎو سەربەرزیو، موەفەقیەتی زیاتەری پەی جەنابیشا.
ئۆمێوارەنا فرسەت پێڎا کەرو گردی بوانوەو، هەمدیسانیچ داوا کەروۆ کاک حەمەڕەزای بەشکەم چنارەی کەرۊ بە کتېبی صۆتی.[1]