ڕۊمانەو (چېرو دارتفێنە)
ئەژناسنای و هۆرەوگېڵنای پەی هۆرامی: ڕەزا بەهمەنی
نامۍ کتېبی: چیرو دارتفێنە (بنەو تفەکېنە)
نویسەر: ژیوار ڕەشید، بە زوانی سۆئێدی
بەشۍ: چوارەمە
چا وەختۆ ئی خیاڵە کۆتەنە سەرەما تاکو ۋڕنای یانە کۆنەکەی، چن فەردێ کڵاشێما چنیێبێنێ. کڵاشەکێما بە وەسیلەو فەرەیدوونی کیاسێ پەی پاوەی تاکو ورەشۆشا.
فەرەیدوون ساحێبوو دوکانێوی گولانەی بۍ جە بنکۆنە. کڵاشەکېش بەرڎۍ و هەرجارە چەنی وېش چن کیسێ چیمەنتۆ و ئا کەرەسە کە پەی وەشکەردەی یانېوی لازما، ئەسانېش و ئارێشۆ.
بە هێمەت و ئۆمێڎو هەرمانەی شەو و ڕوە، یانە لواوە سەر. هەرچی یانەکە بەرز بێوە شاڎیی و شۆقو کناچەکا فرەتەر بێ.
ڕوێوشا شەمسە و ڤیانە و چن دانێ جە کناچەکا لوێبێنێ پاوە، وەسایێل بارا پەی یانەکەی، چا وەختەنە یاوێ وەرو دوکانو فەرەیدوونی، مەڵڵا عەبدۆڵڵا و جەماعەتەکەش چا نیشتێبێنېرە.
مەڵڵا عەبدۆڵڵا شەمسەش چڕیە چۊوەرو دیار بۍ قسێ فرێش پەنە بێنێ پەیش:
ئادەی شەمسە باس کەرە بزانوو قەسرەکێتا کۆگە یاوا؟! چېوێ فرەتەرێم ئەژنەویێنێ؟ دیارا خەریکەنی پا منیەی قەرارەکەو وېتەرە! پاسە نیا؟ ئەوەڵ جار کناچېوەت ئاردە لاو وېتو واتت ئاوارێنەو کەسش نیا، دەنگما نەکەرد! کەردێت بە دوێ و یەرێ دەنگما نەکەرد. ئیسە پاسە بزانوو یانەکەت کەردەن (.......) ئادەی جواب دۆ؟!
شەمسە زانێ مەڵڵا عەبدۆڵڵا داخەو چیشی دڵشەنە بێ، وەختوو وېش یاونابېش لاو شەمسەی دانێوە چا کناچاشە پەی مارە کەرۊ تاکوبۊ بە ژەنەی چوارەمەش.
کناچەکێ نەک تەنیا گۊششا چی دەنگ و باسا شل نەبۍ، بە قسەکاشا خوێنێ و یەنگێ مەڵڵا عەبدۆڵڵای کەرۍنێ و قل قل لوێنێ دمارە.
پیای ئەجۊشا مادامێو چېوێوی زیاڎە ئینا دلێ گەڵاشانە ئیتر مشیۊ قسێ هەر قسێ ئاڎییشابۊ! ڤیانە ئینەیە ۋاچۍ و گردو کناچەکا خوێنێ.
یانە تەمامیا! یانېو کە پەڕ بۍ جە ئەشقوو تەنیا کناچا، یانېو کە بە ڕەنجو کناچا و ئاوات و ئارەزوێ کناچا بینا کریا. پەنجەرێ گۆرێ و و ئاشپەزخانە و هاڵ و حەمام کە بە نەقشەو ڤیانێ تەڕاحی کریێبێنێ.
ڕۆ ئاخری وەختێو یانەکە تەمامیا، ڕوێو بۍ کە هەرگیز جە ویر مەشۆوە، بە دەنگو گۊرانیە چەپڵا ئۆسمان و حەمەحسەینی بنەو تفەکێنە و وەراوەرو یانە تازەکەیۆ، کناچۍ دەسشا گرت و هۆپڕای شاڎی دەسش پەنە کەرد، مەتی مەنیجێشا ئاردەنە دلێ و سەرچۆپیەکەشا دا دەسشۆ. ئا ڕوە خەم بارش کەردەبۍ و شۆقو شاڎیی دلێ دیڎەو یوە یوەو کناچەکانە دیار بێ، ڤیانە جە گردی زیاتەر هۆرئێوە و شاڎیی کەرۍ. پاسشە پەنە ئاما مەڵڵا عەبدۆڵڵا و جەماعەتەکەش زوانشا ماسانە دەمشا.
هەر ئەچی وەختەنە بۍ کە ڤیانە کەوتەنە سەرەش کتېب و دەفتەرېوی گۆرە پسانۆ و ژەنی دەگاکێ چڕۆ لاو وېشا و فێروو سەوادیشا کەرۊ.
ڤیانەی ئازێ و نەتەرسە، بۍ ئانەیە پەرسە بە کەسی کەرۊ، لوا و جە بڵنگۆ مزگیەنە جاڕش کېشا تاکو ژەنەکا دلێ دەگای جە ویر و بڕیارەکەیش ئاگادار کەرۊوە.
ئینە ئەوەڵ جار بۍ دەنگو ژەنێ گنێ دلێ بڵنگۆ مزگی دەگای.
ڤیانە ئی کارشە دەس پەنە کەرد و کناچەکێ و بەشێو جە ژەنا دەگای سەواددارێ بیێ و ئیسە ئیتر تاوێنێ هەم بواناوە و هەمیچ بنویسا.
ڤیانە داواش کەرد ئۆ کناچەکا تاکو هەرکامە داستانوو ژیوای پەڕ جە ڕەنج و ئازارەکاشا، چا دەفتەرەنە بنویسا.
کتېب تەمامېیاو ڕاز و داستانوو دانە بە دانەو کناچەکا دلێشەنە نویسیا. ڤیانە گرد جارێو ۋاچۍ ئی کتېبە مشیۊبۊ بە یۊ جە عالتەرین کتېبەکاو دنیای و گردو ژەنا کوردسانی مشیۊ داستانو ژیوای وېشا دلێ ئی کتېبېیەنە بنویسا.
ژیوای بەردەوام بێ، شاڎیی و شۆقو ئارەزو پەی ژیوێوی وەشتەری هەرچی ڕۊ بۍ دلێ دڵو کناچەکانە فرەتەر بێ.
بەڵام بەڵام ! ئی وەشی و شاڎییە ئاڼە مەبەرۆ!
جە هەمان کاتەنە کە نویسەر خیاڵۍ و وېیەردەو ئەڎێش و بە سەرئاماکاش پا سۊز و هۆنەرە زەریفۆ گېڵنوۆوە، چۆلایچۆ باسوو ژیوای واقعی ئیسەو ئازادی کە جوانێوی (22) ساڵەن و ئینا دانشگانە گېڵنۆوە.
چی بەشەنە ملۆنە دلێ سایکۆلۆژی و دەروون گەرایی جوانێوی خارجی کە دلێ کۊمەڵگەو سۆئێدیەنە چەنی تووشوو کارەساتا و ژیوێوی سەمەرەیبۊ.
ڕەزا بەهمەنی.[1]