ڕۊمانەو (چېرو دارتفێنە)
ئەژناسنای و هۆرەوگېڵنای پەی هۆرامی: ڕەزا بەهمەنی
نامۍ کتېبی: چیرو دارتفێنە (بنەو تفەکېنە)
نویسەر: ژیوار ڕەشید، بە زوانی سۆئێدی
بەشۍ: پەنجەمە
چی بەشەنە داستان ملۆنە دلێ ڕۊح و ڕەوانوو جوانێوی کە هەم چەنی یانەی و هەمیچ چەنی بەری کېشێش هەنێ.
ئازاد و نەریمان دوێ ڕەفێقێ خارجیێنێ و هەردوێ سۆئێدەنە گۆرێ بېیېنۍ. دەسیاری و نەسێحەتێ نەریمانی پەی ئازادی، نیشانە مڎۆ کە کۊمەڵگا چن بۍ ڕەحمانە مامەڵە چەنی ئی جوانا کەرۊ. هەرچن ئی جوانێ چېگە گۆرێ بېیېنۍ، وەلێم جە ژیوای عادی و ئاساییشانە ڕۊ نېیا تووشوو گەرە و گرفتی نەبا.
ژیوای (ئازاد)ی و ڕەفێقە کناچەکېش (ئێلێن)ە، نیشانە مڎۆ کە سەرەڕاو بېیەی دیمۆکراسی و ئازادی کۊمەڵگای، وەلێم جەرەیانېوی ڕاسیستی نادیار ئینا دلێ جامێعەیەنە کە فرەو ئا گرفت فەرهەنگیێ و مەزهەبیێ و داب و نەریتا مارۆنە دلێ و ژیوای جوانە خارجیەکا خرابنۆ و جە کۊمەڵگای دوورێشا وزۆوە.
قسێ ئاخری:
هەرپاسە مزانمۍ ئەدەبېیاتی داستانی سۆئێدی جە ئۆرووپانە ئەر قسێ ئەوەڵی نەکەرۊ، بۍ گومان ئینا ڕەدەو ئا وەڵاتانە جە دنیانە قسێوەشا هەنە پەی واتەی.
نویسەرو ئی کتېبیە، بۍ هیچ ئی لاوئۆلێو، ئینا ڕادێێوی بەرزەنە و ساحێبوو قەڵەمېوی ڕەوانی و ویرێوی تێژیا.
ئی کتېبە جە دەسگاو چاپ و پەخش نووشتێدیەنە کە یۊ جە گۆرەتەرین شرکەتاو چاپەمەنیەکا سۆئێدیا، بەر ئامان و جە ماوێوی کەمەنە نامېش لوێنە دلێ جامێعەو ئەدەبی سویدی و تاکو ئیسە زیاتەر جە دە ڕۊزنامۍ مەشهوورێ سۆئێدی سەرەش بە خاسی نویسەنشاو چانەیەنە کە جایێزەو ساڵێ بەرۆ.
من دڵوەش هەنا پانەیە کە ئی ڕۊمانە ئێژایی ئانەیشە هەن تاکو بە گرد زوانێو هۆرگېڵیۆوە. ئیجا ئەر بە هۆرامی و کوردی تەرجمە کریۊوە، پردېوە وەشە کەرۊ پەی یاونای پەیامېوی عالی بە ئەدەبېیاتی داستانی کوردسانی. چوون نویسەرەکەیچش هۆرامی زواناو دەسەڵاتوو نویسەیش بە هۆرامی هەن، ئۆمێد ملۆ سەرو ئانەیە کە ڕوێو بتاوۆ ئی کتېبیە کەرۊ بە هۆرامی.
هەرپاسە ئی ڕۊمانە متاوۆ پەیامېوی عال و مۆچیاریکەربۊ پەی ئا جوانا کە بە نەسڵی دوەمو خارجیا حەساب کریا، ئانێ کە سۆئێدەنە گۆرێ بېیېنۍ، گرد متاوا وېشا دلێ داستانوو ئی ڕۊمانېیەنە ویناوە.
قسێوەیچ چەنی کاکە ژیواری:
کاکە ژیوار تۊ مایێ شانازیەنی، هەم پەی هۆرامانی و هەمیچ پەی سۆئێدی. دەست وەشبۊ و بە ئۆمێدوو ئایەندېوی پەڕ جە ڕۊمانەکا تۆ.
ڕەزا بەهمەنی.[1]